Numbers 4 - Labrador Inuttitut Heritage Bible

¹ Nâlekablo Mosese Aronelo oᴋarvigivak, oᴋarlune:

² Kohatib erningit kitikit Levib erningita akornganit, ᴋitorngarêngningit atâtamik kinguvârêngit maliklugit,

³ Jâreᴋartunit 30nik ununersaniglo jâreᴋartut 50nik tikidlugit, ilûnatik kivgartorᴋataujungnartut, piniarᴋovlugit pijarialingnik ilagêktut tupingane.

⁴ Tamadja Kohatib erningita piniarijaksarijangit ilagêktut tupingane, perᴋutit ivsornainerpât pitjutigilugit:

⁵ Tangmârtertullo nûgiaᴋarpatta, Aron erningillo itertuksauvut, upkoblo tâlutanga pêraksarivât, iklerviglo kigligiutjineᴋtalik uliklugo tâpsomunga:

⁶ Tâpsomalo ᴋânganut pititsijuksauvut ulingmik ᴋabvit aminginit senasimajomik, issivitsivigilugolo ulingmik ᴋablunâᴋtajamik tungujortamik, akkigautîgiglo ilijaksarivakit.

⁷ Sâblo ᴋaᴋᴋôjaᴋtaliub takonâraksanik, pôgutallo, alupsautillo, ᴋajûtallo, ᴋallutallo kovisijûtit, ilijaksarivait ᴋânganut: ᴋaᴋᴋôjarlo soᴋᴋoserniangitoᴋ tagvanêtuksauvoᴋ;

⁸ Tâpkoalo ᴋânganut issivitsijuksauvut ulingmik ᴋablunâᴋtajamik aupaloriktomik, tâmnalo ulingmilugo ulingmut ᴋabvit aminginit senasimajomut; akkigautîgiglo ilijaksarivakit.

⁹ Tigusijuksauvullo ulingmik tungujortamik, uliklugillo ikomab nenneroaᴋarvinga, akᴋisûtingillo, taᴋᴋersûtingillo, argjaᴋautingillo orᴋsuᴋautingillo tamaita atorialit tâpsomunga;

¹⁰ Tâmnalo perᴋutingillo tamaita ilijaksarivait uliubᴋabvit aminginit senasimajûb atânut, pitilugolo akkigautimut.

¹¹ Tunerguserviublo goldeojûb ᴋânganut issivitsijuksauvut ulingmik tungujortamik, uliklugolo ulingmut ᴋabvit aminginit senasimajomut, akkigautîgiglo ilijaksarivakit;

¹² Atorialillo ilûnaita kivgartornermut, kivgartûtigijangit ivsornaitovingme tigujaksarivait immulugillo immûtemut tungujortamut, uliklugillo ulingmut ᴋabvit aminginit senasimajomut, pitilugillo akkigautemut.

¹³ Argjallo pêjaraksarivait tunerguservingmit, issivitsilutiglo ulingmik tungulângajomik ᴋânganut;

¹⁴ Tagvungalo ilijijuksauvut perᴋutinginik tamainik atorsôngojunik tâpsomunga; argjaᴋautinik, kapoᴋautiniglo, ᴋalugautiniglo, pôgutaujaniglo, tunerguserviub perᴋutinginik tamainik; issivitsijuksauvullo ulingmik ᴋabvit aminginit senasimajomik tâpsoma ᴋânganut, akkigautîgiglo ililugik.

¹⁵ Aroniblo erningitalo ivsornaitovik ivsornaitoviublo perᴋutingit immugêrpatigik, tangmârtertut nûtuksaulertilugit; Kohatib erningit ᴋaijuksauvut akkigaromavlugit; aktuijuksaungilalle ivsornaidlartunik, toᴋoᴋonagit. Tamadja Kohatib erningita akkigaraksarijangit ilagêktut tupingane.

¹⁶ Eliasariblo, Aronib ajoᴋertuijûb erningata, pairijaksangit imaiput, orᴋsuᴋ ikomaksaᴋ, tipitsiariksautiksarlo, tunergutiksarlo nerᴋiksaᴋ soraingitoᴋ, orᴋsorlo mingoarutiksaᴋ, tuperlo ivsornaitoᴋ perᴋutingillo ilûnaita, ivsornaitoviglo, tâpsomalo perᴋutingit.

¹⁷ Nâlekablo Mosese Aronelo oᴋarvigivak, oᴋarlune:

¹⁸ Kohatekut ᴋitorngarêngita kinguvângit pêjarniarasigik Levikut akornganit;

¹⁹ Imailiorvigilugille, inôᴋovlugit toᴋoᴋonagillo ᴋanilerpatta ivsornainerpângojunut: Aron erningillo itertuksauvut tâpkoalo atunit oᴋautilugit piniaraksarijanginik akkigaraksarijanginiglo;

²⁰ Tâpkoale itertuksaungilat ivsornaidlartut takojomavlugit, anikitomiglônêt, toᴋoᴋonagit.

²¹ Nâlekablo Mosese oᴋarvigivâ, oᴋarlune:

²² Gersonib erningit kitikittauᴋ, ᴋitorngarêngit atâtamik kinguvârêngit maliklugit.

²³ Jâreᴋartut 30nik ununersaniglo jâreᴋartut 50nik tikidlugit kititaksarivatit; ilûnatik itertut kivgartoromavlutik, suliaksat ilagêktut tupingane piniaromavlugit.

²⁴ Tamadja Gersonekut ᴋitorngarêngita piniaraksarijangit kivgartornerme akkigarnermelo;

²⁵ Akkigartuksauvut tupiub ivsornaitûb itsaksanginik, ilagêktullo tupinganik, tâpsoma matuksanganik, ulingmiglo ᴋabvit aminginit senasimajomik tâpsoma ᴋanganêtomik, ilagêktullo tupingata upkoangata tâlutanganik;

²⁶ Avatâtalo tâlutanginik, avatâtalo itertarviata upkoangata tâlutanganik, ivsornaitoviub tunerguserviublo nelânêtunik, aklunânginiglo, perᴋutinginiglo ilûnainik tâpkonunga atortunik, piniartuksauvut tamainik pijarialingnik tâpkonane.

²⁷ Gersonib erningita kivgartorningit tamaita aulataujuksauvut Aronemut erninginullo, akkigarningit tamaita piniarningillo tamaita; ilipselo tâpkoa kamajungit perᴋojaksarivase akkigaraksanginik tamainik.

²⁸ Tamadja tagva Gersonib erningita ᴋitorngarêngita piniaraksarijangit ilagêktut tupingane, tâpkoalo aulataujuksauvut Itamarib, Aronib ajoᴋertuijôjûb erningata, agganginut.

²⁹ Merariblo erningit kititaksarivatit ᴋitorngarêngit atâtamik kinguvârêngit maliklugit;

³⁰ Jâreᴋartut 30nik ununersaniglo jâreᴋartut 50nik tikidlugit kititaksarivatit, ilûnatik itertut kivgartoromavlutik, suliaksat ilagêktut tupingane piniaromavlugit.

³¹ Tamadjalo akkigaraksat kamagijaksarijangit kivgartornermingne tamâne ilagêktut tupingane; ivsornaitoviub sâtojangit, seningajungillo, napajungillo, manguvingillo;

³² Avalullo avatânêtut napajungit, manguvingillo, kikiaktangillo, aklunângillo, perᴋutingillo tamaita atoriaᴋartangillo tamaita; perᴋutillo tâpkoa akkigaraksarijangit kamagijaksarijangit kititaksarivase attingitigut.

³³ Tamadja Merarikut ᴋitorngarêngita kivgartornerijaksarijangit kivgartornermingne tamaine ilagêktut tupingane, aulatauvlutik Itamaremut, Aronib ajoᴋertuijôjûb erninganut.

³⁴ Mosesiblo Aroniblo ilagêktullo angajoᴋângita Kohatekut kitipait ᴋitorngarêngit atâtamik kinguvârêngit maliklugit.

³⁵ Jâreᴋartut 30nik ununersaniglo jâreᴋartut 50nik tikidlugit, ilûnatik itertut kivgartornermut suliaᴋaromavlutik ilagêktut tupingane;

³⁶ Kititaujullo tâpkonangat ᴋitorngarêngit maliklugit 2,750ovut.

³⁷ Tamadja kititaujut Kohatekut ᴋitorngarêngine, ilûnatik kivgartortut ilagêktut tupingane, Mosesib Arobiblo kititangit Nâlekab perᴋojanga Mosesemut maliklugo.

³⁸ Gersonekunillo kititaujut ᴋitorngarêngit atâtamik kinguvârêngit maliklugit,

³⁹ Jâreᴋartut 30nik ununersaniglo jâreᴋartut 50nik tikidlugit, ilûnatik itertut kivgartornermut suliaᴋaromavlutik ilagêktut tupingane,

⁴⁰ Kititaujut tâpkonangat ᴋitorngarêngit atâtamik kinguvârêngit maliklugit 2,630ovut.

⁴¹ Tamadja kititaujut Gersonekut ᴋitorngarênginit, ilûnatik kivgartortut ilagêktut tupingane, Mosesib Aroniblo kititangit Nâlekab perᴋojanga maliklugo.

⁴² Kititaujullo Merarikut ᴋitorngarênginit ᴋitorngarêngit atâtamik kinguvârêngit maliklugit,

⁴³ Jâreᴋartut 30nik ununersaniglo jâreᴋartut 50nik tikidlugit, ilûnatik itertut kivgartornermut suliaᴋaromavlutik ilagêktut tupingane,

⁴⁴ Kititaujut tâpkonangat ᴋitorngarêngit maliklugit 3,200ovut.

⁴⁵ Tamadja kititaujut Merarikut ᴋitorngarênginit, Mosesib Aroniblo kititangit Gûdib perᴋojanga Mosesemut maliklugo.

⁴⁶ Levikunit kititaujut ilûnatik, Mosesib Aroniblo Israêlikullo angajoᴋângita kititangit, ᴋitorngarêngit atâtamik kinguvârêngit maliklugit,

⁴⁷ Jâreᴋartut 30nik ununersaniglo jâreᴋartut 50nik tikidlugit, ilûnatik itertut kivgartortut sulianginik, akkigartullo sulianginik ilagêktut tupingane, piniaromavlutik,

⁴⁸ Kititaujut tâpkonangat, 8,580ovut.

⁴⁹ Nâlekab perᴋojanga maliklugo kititauvut Mosesib aggangitigut, ilûnatik kivgartornerijaksangit akkigaraksarijangillo maliklugit; taimâk kititauvut tâpsomunga, sôrlo Nâlekab Mosese perᴋolaungmago.