Numbers 36 - Labrador Inuttitut Heritage Bible

¹ Josefiblo erningita kinguvângita, Manassib erningata, Makirib erningata, Gileadib ᴋitorngangita kinguvângita angajoᴋângit tikilerput oᴋauseᴋarlutiglo Mosesib sângane, Israêlikullo kinguvârêngita angajoᴋângita sângine:

² Oᴋarpullo: Nâlekab nâlegavut perᴋolauᴋpâ, nuna kingormgutijaksaᴋ tunijauᴋovlugo Israêlib ᴋitornganginut immerautakut; nâlegavullo perᴋojaulauᴋpoᴋ Nâlekamut ᴋatangutipta Zelofehadib kingormgutijaksanga tunijaujuksaungmat tâpsoma paninginut.

³ Tâpkoale nuliarijaulerpatta Israêlikut kinguvârêngita assipta erningita ilanginut, tâpkoa kingormgutijangat ilangertauniarpoᴋ atâtapta kingormgutijanganit ilautitauvlunelo kinguvârêt tâpkoa ilagijomârtangita kingormgutijanganut; taimaglo ilangertauniarpoᴋ kingormgutijarmit uvaptingnut tunijaujomit immerautakut.

⁴ Jârillo 50ingat Israêlikut ᴋelarudjârtauviksangat neliutikpat, tâpkoa kingormgutijangat ilautitauniarpoᴋ kinguvârêt tâpkoa ilagilertangita kingormgutijanganut; taimâglo tâpkoa kingormgutijangat pêrtauniarpoᴋ atâtapta kinguvângita kingormgutijanganit.

⁵ Mosesiblo Israêlikut perᴋovait Nâlekab oᴋausinga maliklugo, oᴋarlune: Josefib erningit kinguvârêngit idluartomik oᴋarput.

⁶ Tamadja Nâlekab perᴋojanga Zelofehadib paningit pivlugit, oᴋarlune: Uiniglit pijomajamingnik; kissiane uiniktuksauvut atâtagijamik ᴋitorngangita kinguvârêngita ilanganik.

⁷ Taimâk Israêlikut kingormgutijangita ilangat nûtauniangilaᴋ kinguvârênit kinguvârênut; Israêlikut ilûnatik atunit ungainartuksaungmatta atâtagijamik kinguvârêngita kingormgutijanginik.

⁸ Kialônêllo paninga, kingormgutijalik Israêlikut kinguvârêngita neliane, nuliarijaujuksauvoᴋ atâtagijame kinguvârêngita ilanganut, Israêlikut atunit atâtagijamik kingormgutijangat pigênarlugo piᴋovlugit.

⁹ Taimâk kingormgutijat neliat nûtauniangilaᴋ kinguvârêt ilanganit kinguvârênut assinginut; Israêlikut kinguvârêngit atunit ungatsainartuksaungmatta kingormgutijamingnut.

¹⁰ Sôrlolo Nâlekab Mosese perᴋolaungmago, taimailiorput Zelofehadib paningit.

¹¹ Tagva Mala, Tirzalo, Hoglalo, Milkalo, Noalo, Zelofehadib paningit uinikput atâtamik ᴋatangutingita erninginik.

¹² Josefib erningata Manassib erningita kinguvângita ilangita nuliarilerpait, kingormgutijangillo nûlungilat atâtamik ᴋitorngangita kinguvârênginit.

¹³ Tamadja perᴋojat maligaksallo Nâlekab perᴋojangit Mosesekut Israêlikunut Moabib naternangine Jordanib seniane Jerikome.