Numbers 35 - Labrador Inuttitut Heritage Bible

¹ Nâlekablo Mosese oᴋarvigivâ Moabib naternangine Jordanib seniane Jerikome, oᴋarlune:

² Israêlikut perᴋokit tunitjiᴋovlugit Levikunut iglugasaksoarnik iniginiartanginik kingormgutijanit pigijamingnit; nerrinasugviksaniglo iglugasaksuit avatângine tunitjijuksauvose Levikunut.

³ Iglugasaksuillo angerarviginiarpait; nerrinasugvillo ilingalârput nergjuteᴋotinginut, perᴋutinginullo, ômajoᴋotinginullo.

⁴ Nerrinasugvillo tunijaksarijase Levikunut iglugasaksuit ᴋarmangita avatâne ôktuteᴋartuksauvut tallertut 1,000tut avamut.

⁵ Iglugasaksuillo avatâne kitdlerme ôktortuksauvotit tallertut 2,000tut, avatânelo seᴋinerdlerme tallertut 2,000tut, avatânelo kangidlerme tallertut 2,000tut, avatânelo taggardlerme tallertut 2,000tut, iglugasaksuit ᴋerᴋanganêtilugit. Tamakkoa iglugasaksuit nerrinasugviksangit pigijaksarivait.

⁶ Iglugasaksuillo tunijaksarijase Levikunut imaiput: iglugasaksuit sixit saputjauviksat, tuniniartase toᴋotsijoᴋ inungmik ᴋemâviksangit: tâpkoalo tapilugit tunitjijuksauvose iglugasaksoarnik 42nik.

⁷ Iglugasaksuit iluengartut tunijaksarijase Levikunut 48ojuksauvut, tâpkoa nerrinasugvingillo.

⁸ Iglugasaksuillo tunijaksarijase Israêlikut pigijanginit pitjutigilugit, unuktunik pilingnit unuktunik tigusijuksauvose, ikituniglo pilingnit ikitunik tigusijuksauvose; atunit kingormgutigijatik maliklugit tunitjijuksauvut iglugasaksoarnik Levikunut.

⁹ Nâlekablo Mosese oᴋarvigivâ, oᴋarlune:

¹⁰ Israêlikut oᴋarvigikit, oᴋautilugillo: Jordan ikârupsiuk nunamut Kanaanemut piluse,

¹¹ Iglugasaksoarnik saputjauviksaujunik ilipsingnut ingmikôrtartitsijuksauvose; neliat toᴋotsijoᴋ inungmik, pijârinane, ᴋemâjungnarᴋovlugo tagvunga.

¹² Iglugasaksuillo tâpkoa saputjauvigijaksarivase akkiniartemit, toᴋotsijoᴋ inungmik toᴋotauᴋonago nangerungnarᴋârtinago ilagêktut sângine erᴋartortauniardlune.

¹³ Iglugasaksuillo tuniniartase iglugasaksoangoniarput saputjauviksanik sixinik.

¹⁴ Tunitjijuksauvose iglugasaksoarnik pingasunik Jordanib miksâne mattomane, amalo iglugasaksoarnik pingasunik nuname Kanaaneme tunitjijuksauvose; iglugasaksoangolârput saputjauviksanik.

¹⁵ Israêlikunut takorngartanullo tujormianullo ilipsingnôrtunut iglugasaksuit sixit saputjauviksaulârput; pijârenane toᴋotsijoᴋ inungmik ᴋemâjungnarᴋovlugo tagvunga.

¹⁶ Neliatale aipane annauguniuk sakkomut kikiangojomut, tâmna inuartôvoᴋ; inungmik inuartoᴋ toᴋotaujuksauvoᴋ.

¹⁷ Ujarᴋamullo tigumiartaminut miloruniuk toᴋonartomik, tamattomunga inuk toᴋoᴋovlugo, tagva inuartôvoᴋ; inungmiglo inuartoᴋ toᴋotaujuksauvoᴋ.

¹⁸ Sakkomullônêt ᴋejungmut tigumiartaminut annauguniuk toᴋonartomik, tamattomunga inuk toᴋoᴋovlugo, tagva inuartôvoᴋ; inungmiglo inuartoᴋ toᴋotaujuksauvoᴋ.

¹⁹ Aungmik akkiniartûb nangmineᴋ inuartoᴋ toᴋotaksarivâ; naipituaruniuk toᴋotaksarivâ.

²⁰ Omisungnermullo kapikuniuk, terliarsivlunelônêt miloruniuk toᴋoᴋovlugo,

²¹ Omigidlarlugolônêt tiglukuniuk aggangminut toᴋoᴋovlugo, tagva toᴋotsijoᴋ toᴋotaujuksauvoᴋ; inuartôvoᴋ; aungmik akkiniartûb inuartoᴋ toᴋotaksarivâ naipiguniuk.

²² Pijâriluganelo ômisungneᴋaluganelo kapikuniuk, terliarsiluganelônêt egitsivigiguniuk sunamut,

²³ Ujarᴋamullônêt inûb toᴋojutigijanganut, takonago miloruniuk toᴋolugolo, ômiginago, idluitomiglo piniarvigijomanago;

²⁴ Tagva ilagêt erᴋartuijuksauvut toᴋotsijoᴋ aungmiglo akkiniartoᴋ pivlugik erᴋartûtsit makkoa maliklugit;

²⁵ Ilagêllo inuartovineᴋ piulijaksarivât aungmik akkiniartûb agganginit, ilagêllo utertitaksarivât iglugasaksoarnut saputjauvigijanganut ᴋemâvigilauᴋtanganut; tagvanelo angerarviᴋartuksauvoᴋ ajoᴋertuijersoaᴋ orᴋsumut ivsornaitomut mingoartaumajoᴋ toᴋoᴋârtinago.

²⁶ Toᴋotsijorle iglugasaksuit saputjauvit ᴋemâvigijame kiglingata ungatânôrpat,

²⁷ Aungmiglo akkiniartûb naipipago iglugasaksuit saputjauvit kiglingata ungatâne, akkiniartûblo inuartoᴋ toᴋopago; tagva passijaunialungilaᴋ aungmik kovisigaloarune;

²⁸ Taimna nûtuksaulaungimat iglugasaksoarnit saputjauvigijaminit ajoᴋertuijersoaᴋ toᴋoᴋârtinago; ajoᴋertuijersûble toᴋungata kingorngane utertuinariaᴋarpoᴋ nunaminut pigijaminut.

²⁹ Tamakkoalo maligaksarivase erᴋartuinerme kinguvârêngnipsingne inigijapsingne tamaine.

³⁰ Inungmik toᴋotsijoᴋ, tagva inuartoᴋ, toᴋotaujuksauvoᴋ kigligiutsijut oᴋausingit maliklugit; kigligiutsijorle atausênaᴋ nelonaijaijuksaungilaᴋ inûb toᴋotaksauninganik.

³¹ Akkiksamiglo simmêjutiksamik tigusijuksaungilase inuartûb inôsinga pivlugo, toᴋotaksaukpat; toᴋotaujuksauvoᴋ.

³² Akkiksamiglo simmertiksamik tigusijuksaungilase ᴋemâsimajoᴋ iglugasaksoarnut saputjauviksanut pivlugo, uterᴋojomavlugo iniksaᴋarmiᴋovlugo nunamine, ajoᴋertuijersoaᴋ toᴋoᴋârtinago.

³³ Nunalo nunagijase naggonartitaksaringilase; nunalo sujungaititaujungnangilaᴋ aungmit kovimajomit tagvane, kissiane aungmik kovisilauᴋtûb aunganut.

³⁴ Nunalo nunagijase uvanga inigijara sujuktailititaksarivase; uvanga Nâlegaᴋ Israêlikut akorngane ineᴋarama.