Numbers 34 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlikut perᴋokit, oᴋautilugillo: Nunamut Kanaanemut tikikupse; — tamadja nuna kingormgutijaksarilârtase, nuna Kanaan kigligijangillo, —

³ Seᴋerngane pigijaksarivase sunaᴋajuitomit Zinimit, Edomib seniagut, kigliselo seᴋinerdleᴋ ilârpoᴋ imarbiub tarrioliub issuanit ununga;

⁴ Kigliselo sangulârpoᴋ Akrabbimib majoᴋangata seᴋerngagut Zine tikidlugo; issualo Kades-barneab seᴋernganêtuksauvoᴋ, torârtuksauvorlo Hazar-addaremut Azmon tikidlugo;

⁵ Azmonemillo sangujuksauvoᴋ Egiptenib kônganut, issoᴋarniarlune imarbingme.

⁶ Kigliselo kangerdleᴋ imarbiksoarmik kigleᴋartuksauvoᴋ; tamadja kiglise kangerdleᴋ.

⁷ Tamadjalo kigligijaksarijase taggardleᴋ; imarbiksoarmit nelunaikuseraksarivase ᴋaᴋaᴋ Hor tikidlugo,

⁸ ᴋaᴋamillo Horemit nelunaikuseraksarivase Hamatib pigiarninganut; kigliselo issoᴋartuksauvoᴋ Zedademe;

⁹ Kigliselo sangujuksauvoᴋ Zifronemut, issoᴋarniarlune Hazar-enoneme; tamadja kiglise taggardleᴋ.

¹⁰ Kigliselo kitdleᴋ nelunaikuseraksarivase Hazar-enanemit Sefam tikidlugo;

¹¹ Kigliselo unungartuksauvoᴋ Sefamemit Riblamut, Ainib kitâgut, unungarlunelo kigle aktoajuksauvoᴋ imarbiub Kinneretib talerpianut kitdlermut;

¹² Kigliselo unungartuksauvoᴋ Jordanemut, issoᴋarniarporlo imarbingme tarriolingme; tamadja nunagijaksarijase kiglingit avatâgut maliklugit.

¹³ Mosesiblo Israêlikut perᴋovait, oᴋarlune: Tamadja nuna kingormgutijaksarijase immerautikut, Nâlekab tunijauᴋojanga kinguvârêngnut 9nut abvanullo;

¹⁴ Kinguvârêt Rubenekut atâtamik iglungit maliklugit, kinguvârêlo Gadekut atâtamik iglungit maliklugit, kinguvârêllo Manassekut abvangit pisimajarêrmatta kingormgutijaksamingnik;

¹⁵ Kinguvârêt magguit abvalo pisimajarêrput kingormgutijaksamingnik Jordanib miksâne Jerikome unane, seᴋerngûb nuiviata nelâne.

¹⁶ Nâlekablo Mosese oᴋarvigivâ, oᴋarlune:

¹⁷ Tamadja angutit nunamik kingormgutijaksamik avgoijuksat ilipsingnut attingit: Eliasar ajoᴋertuijoᴋ, Josualo, Nunib erninga.

¹⁸ Kinguvârênillo tamainit atunit angajoᴋâᴋ atauseᴋ ilasiarijaksarivase avgoiᴋataujuksaᴋ nunamik kingormgutijaksamik.

¹⁹ Tamadjalo angutît atingit: Kinguvârênit Judakunit, Kâle, Jefunib erninga.

²⁰ Kinguvârênillo Sîmeonekunit, Semuel, Ammihudib erninga.

²¹ Kinguvârênillo Benjamikunit, Elidad, Kislonib erninga.

²² Kinguvârênillo Danekunit, angajoᴋaujoᴋ Bukki, Joglib erninga.

²³ Josefib ᴋitornganginit: kinguvârênit Manassekunit, angajoᴋaujoᴋ Hanniel, Efodib erninga.

²⁴ Kinguvârênillo Efraimekunit, angajoᴋaujoᴋ Kemuel, Siftanib erninga.

²⁵ Kinguvârênillo Sebulonikunit, angajoᴋaujoᴋ Elisafan, Parnakib erninga.

²⁶ Kinguvârênillo Isassarekunit, angajoᴋaujoᴋ Paltiel, Asanib erninga.

²⁷ Kinguvârênillo Asserekunit, angajoᴋaujoᴋ Ahihud, Selomib erninga.

²⁸ Kinguvârênillo Naftalikunit, angajoᴋaujoᴋ Pedahel, Ammihudib erninga.

²⁹ Tâpkoangovut Nâlekab avgoiᴋojangit kingormgutijaksamik Israêlib ᴋitornganginut nuname Kanaaneme.