Numbers 33 - Labrador Inuttitut Heritage Bible

¹ Tamadja Israêlikut ingergarneriᴋattartangit aularamik nunamit Egiptenemit, ingmikut katimgajut ingmikôrtarlutik, Mosesib Aroniblo aggangitigut.

² Mosesiblo sivumuarviningit aglalauᴋpait ingergarneriᴋattartangit maliklugit Nâlekab perᴋojanga maliklugo; tamadjalo ingergarneriᴋattartangit sivumuarningit maliklugit.

³ Ramesesemit aularput taᴋᴋiub sivorlerpâb uvlungita 15ingane; ᴋângerviub ᴋaungane Israêlikut anivut aggangnut ᴋotsiktunut Egiptenemiut ilûnatik takkoane,

⁴ Egiptenemiut iluversitilugit erniariᴋârtamingnik, Nâlekab toᴋotanginik tâpkonane; gudingoangillotauᴋ Nâlekab erᴋartorivait.

⁵ Israêlikullo aularlutik Ramesesemit tangmârput Suggoteme.

⁶ Suggotemillo ingergarlutik tangmârput Etameme, sunaᴋajuitûb kiglinganêtome.

⁷ Etamemillo aularivut sangulutiglo Pi-Hakirotemut, Baal-Zefonib nellânêtomut; tangmârpullo Migdolib nellâne.

⁸ Hakirotemillo aularlutik ingergavut imarbiub ᴋerᴋagut sunaᴋajuitomut; uvlullo pingasut nâvlugit ingergarlutik Etamib sunaᴋajuitungane tangmârput Marame.

⁹ Aularlutiglo Maramit tikiput Elimemut: Elimemelo puilaviᴋarpoᴋ 12nik, napârtuniglo Palminik 70nik; tagvanelo tangmârterput.

¹⁰ Aularpullo Elimemit tangmârlutiglo imarbiub suvloliub seniane.

¹¹ Imarbingmillo suvlolingmit aularput tangmârlutiglo sunaᴋajuitome Sinime.

¹² Sunaᴋajuitomillo Sinimit aularput tangmârlutiglo Dofkame.

¹³ Dofkamillo aularput tangmârlutiglo Aluseme.

¹⁴ Alusemillo aularput tangmârlutiglo Refidime, tagvane imeᴋangilaᴋ inuit imiksanganik.

¹⁵ Refidimillo aularput tangmârlutiglo sunaᴋajuitome Sinaime.

¹⁶ Sunaᴋajuitomillo Sinaimit aularput tangmârlutiglo ikligudlartut iluvingine.

¹⁷ Ikligudlartullo iluvinginit aularput tangmârlutiglo Hâzaroteme.

¹⁸ Hâzarotemillo aularput tangmârlutiglo Ritmame.

¹⁹ Ritmamillo aularput tangmârlutiglo Rimmon-pêrezeme.

²⁰ Rimmon-pêrezemillo aularput tangmârlutiglo Libname.

²¹ Libnamillo aularput tangmârlutiglo Rissame.

²² Rissamillo aularput tangmârlutiglo Kehêlateme.

²³ Kehêlatemillo aularput tangmârlutiglo Seferib ᴋaᴋangane.

²⁴ Seferiblo ᴋaᴋanganit aularput tangmârlutiglo Hârademe.

²⁵ Hârademillo aularput tangmârlutiglo Makhêloteme.

²⁶ Makhêlotemillo aularput tangmârlutiglo Tâhateme.

²⁷ Tâhatemillo aularput tangmârlutiglo Têrame.

²⁸ Têramillo aularput tangmârlutiglo Mitkame.

²⁹ Mitkamillo aularput tangmârlutiglo Hasmoneme.

³⁰ Hasmonemillo aularput tangmârlutiglo Môseroteme.

³¹ Môserotemillo aularput tangmârlutiglo Bene-jaakaneme.

³² Bene-jaakanemillo aularput tangmârlutiglo Hor-hagidgademe.

³³ Hor-hagidgademillo aularput tangmârlutiglo Jotbatame.

³⁴ Jotbatamillo aularput tangmârlutiglo Abroneme.

³⁵ Abronemillo aularput tangmârlutiglo Ezion-gebereme.

³⁶ Ezion-geberemillo aularput tangmârlutiglo sunaᴋajuitome Zineme, tamadja Kadese.

³⁷ Kadesemillo aularput tangmârlutiglo ᴋaᴋame Horeme, Edomekut nunangata kiglingane.

³⁸ Aronelo ajoᴋertuijoᴋ ᴋaᴋamut Horemut majorarpoᴋ Nâlekab perᴋojanga maliklugo, tagvanelo toᴋovoᴋ, jârit 40ingane Israêlikut aularningita nunamit Egiptenemit kingorngane, taᴋᴋit tellimangata uvlungita sivorlerpângane.

³⁹ Aronelo jâreᴋarpoᴋ 123nik toᴋogame ᴋaᴋame Horeme.

⁴⁰ Aradiblo ataninga, Kanaanemioᴋ, nunaᴋartoᴋ nunab Kanaanib seᴋᴋerngane, tusarpoᴋ Israêlikut tikilermatta.

⁴¹ Tâpkoalo aularput ᴋaᴋamit Horemit tangmârlutiglo Zalmoname.

⁴² Zalmonamillo aularput tangmârlutiglo Pûnoneme.

⁴³ Pûnonemillo aularput tangmârlutiglo Oboteme.

⁴⁴ Obotemillo aularput tangmârlutiglo Ije-Abârime, Moabekut kiglingane.

⁴⁵ Ijemillo aularput tangmârlutiglo Dibon-gademe.

⁴⁶ Dibon-gademillo aularput tangmârlutiglo Almon-diblataime.

⁴⁷ Almon-diblataimit aularput tangmârlutiglo Abârimib ᴋaᴋangine, Nebob nelâne.

⁴⁸ Abârimiblo ᴋaᴋanginit aularput tangmârlutiglo Moabib naternangine Jordanib seniane Jerikome.

⁴⁹ Tangmârsimavullo Jordanib seniane Bet-jesimotemit Abel-sittim tikidlugo Moabib naternangine.

⁵⁰ Nâlekablo Mosese oᴋarvigivâ Moabib naternangine Jordanib seniane Jerikome, oᴋarlune:

⁵¹ Israêlikut oᴋarvigikit, oᴋautilugillo: Jordan ikârupsiuk nunamut Kanaanemut,

⁵² Nunab inungit tamaita ᴋemâtitaksarivase sivunapsigut, ujaraᴋotingillo adsingoalit tamaita asserorlugit, gudingoangillo auktisimajut asserorlugit, poᴋtoningillo tamaita nungulugit;

⁵³ Nunalo pigijaksarivase nunagilugolo; nuna tunigapko ilipsingnut pigilugo piᴋovluse.

⁵⁴ Nunalo kingormgutijaksarivase immerutigilugo ᴋitorngarêngnise maliklugit; ununersaujunut tunitjijuksauvotit kingormgutijaksamik anginersamik, ikinersaujunullo tunitjijuksauvotit kingormgutijaksamik mikinersamik; immerautib nelautanga inuit nelianut, tamanna pigijaksarivâ.

⁵⁵ Nunable inungit ᴋemâtingikupsigik sivunapsigut, amiakôtitase kakkilautititut ijipsingnut itsomârput, kakkilautititullo senerapsingne, pagvisâdlaromârpâselo nuname nunagijapsingne.

⁵⁶ Imailingalârporlo: sorlo issumaᴋalaurama tâpkoa piniarvigijomavlugit, taimailiorvigijomârpapse.