Numbers 32 - Labrador Inuttitut Heritage Bible

¹ Rubeniblo kinguvângit Gadiblo kinguvângit nergjuteᴋoteᴋarput unuktovaksoarnik, nunalo Jazer nunalo Gileade takungmatikik, nute, nergjuteᴋautiksatsiangovoᴋ.

² Gadiblo kinguvângita Rubeniblo kinguvângita Mosese Eliasarelo ajoᴋertuijoᴋ ilagêktullo angajoᴋângit tikipait, oᴋautilugillo:

³ Atarote, Dibonelo, Nimralo, Hesbonelo, Elealelo, Sebamelo, Nebolo, Beonelo,

⁴ Nunat Nâlekab sâlagijangit ilagêktut Israêlikut sângine nergjuteᴋautiksauvut, kivgatillo nergjuteᴋoteᴋarput.

⁵ Oᴋarpullo: Saimaneᴋsigupta ijîkpit sângangne, nuna tamanna tunijaule kivgarnut perᴋutauᴋovlugo; ikârᴋoniaratigut Jordanemik.

⁶ Mosesiblo Gadib kinguvângit Rubeniblo kinguvângit oᴋautivait: Katangutise unatarnermut aijuksauvât, ilipse ᴋikartiluse tamânê?

⁷ Sôk Israêlikut ômatingit maksuajungnaitipisigîk, ikâromajungnaitilugit nunamut Nâlekab tunijanganut tâpkonungâ?

⁸ Taimailiolauᴋput atâtase, tiligapkit Kades-Barneamit nautsertoriartorᴋovlugit nunamik.

⁹ Majorarmatta Eskolib naᴋsanganut nunalo takolugo, Israêlikut ômatingit maksuajungnaitipait aijomajungnaiᴋovlugit nunamut Nâlekab tunijanganut tâpkonunga.

¹⁰ Nâlekablo ningarninga katsungailerpoᴋ taipsomane, angermariklunelo oᴋarpoᴋ:

¹¹ Angutit tâpkoa majoralauᴋtut Egiptenemit jâreᴋartut 20nik ununersaniglo, neliatalônêt nuna angerutigilauᴋtara Abrahâmut, Isaarmullo, Jâkomullo takoniangilât; ilungertorlutik malingimanga;

¹² Kâle, Jefunib erninga, Kênasekut ilanga, Josualo, Nunib erninga, kissimik; tâpkoa ilungertorlutik Nâlegaᴋ malingmako.

¹³ Nâlekablo ningarninga katsungaipoᴋ Israêlikunut, utitarᴋattarlutiglo arvertartipait sunaᴋajuitome jârit 40 nâvlugit, kinguvârêt tâpkoa idluitulilauᴋtut Nâlekab takkoane nungutauᴋârtinagit.

¹⁴ Ahâglo, ilipse makipose atâtase inangerlugit, inuit idluitut unuksisimajose, Nâlekab ningarninga ilungertortoᴋ Israêlikunut aglititsomavlugo.

¹⁵ Ilipse tunukupsiuk, tâpsoma sunaᴋajuitomêtuinarᴋoniarivait; inuillo ukkua tamaita asserolârpase.

¹⁶ Nimniutipâlle oᴋarlutik: Unnuiviksalioromavogut nergjuteᴋotiptingnut, iglugasaksoalioromavlutalo ᴋitorngaptingnut;

¹⁷ Uvagulle sakkogiluta atuinaujomavogut Israêlikut sivorleromavlugit tikiutiᴋârtinagit nunagijaksanginut; ᴋitorngavullo iniksaᴋarniarput iglugasaksoarne avalulingne nunab inungit pivlugit.

¹⁸ Angeraromalungilagut Israêlib ᴋitorngangit ilûnatik kingormgujiᴋârtinagit kingormgutijamingnik.

¹⁹ Kingormgujiᴋatigijomanginaptigik Jordanib ungatâne, kangianelônêt, kingormgujiviksaᴋarapta Jordanib miksiptingne, unane.

²⁰ Mosesiblo oᴋautivait: Taimailioromagupse, sakkolijarluse unatarnermut aijomagupse Nâlekab sângane,

²¹ Angutillo sakkolijartut ilûnatik ilipsingne Jordan ikârpatsuk Nâlekab sângane, ᴋemâtitsiᴋârtinago ômigijiminik sâminit,

²² Nunalo sâlagijauᴋârtinago Nâlekab sângane; tagva kingorngane uteromârpose pasijaksaunginiarluselo Nâlekamut Israêlikunullo; nunalo tamanna pigijaksarivase Nâlekab sângane.

²³ Taimailioromangikupsele, ahâk, tagva idluitulisimaniarpose Nâlekamut; missigijomârposelo idluitulinipse nelaudlalârmase.

²⁴ Iglugasaksoalioritse ᴋitorngapsingnut, unnuiviksaliorluselo nergjuteᴋotipsingnut; ᴋanipsingnillo anijut maliklugit, piniaritse.

²⁵ Gadiblo kinguvângita Rubeniblo kinguvângita Mosese oᴋarvigivât, oᴋarlutiglo: Kivgatit piniaromavut sorlo nâlegara perᴋojingmat.

²⁶ ᴋitorngavut, nuliavullo, perᴋutivullo, nergjuteᴋotivullo ilûnatik tamânêniarput iglugasaksoarne Gileademêtune;

²⁷ Kivgatille ikâromavut, angutît ilûnatik sakkolijartut unatarnermut, Nâlekab sângane sorᴋsugomavlutik, sôrlo nâlegara oᴋarmat.

²⁸ Taimaimat Mosesib Eliasar ajoᴋertuijoᴋ, Josualo, Nunib erninga, Israêlikullo kinguvârêngita angajoᴋângit erᴋanarnerpât perᴋovait tâpkoa pitjutigilugit.

²⁹ Mosesiblo oᴋautivait: Gadib kinguvângita Rubeniblo kinguvângita ilagiluse Jordan ikarniarpatsuk, angutît ilûnatik sakkolijartut unatarnermut, Nâlekab sângane, nunalo sâlagijaukpat sâpsingne; tagva nuna Gileade tuniniarpase tâpkonunga perᴋutauᴋovlugo;

³⁰ Sakkolijarlutigle ikârᴋatigijomangipase, tagva akunapsingne pigijaksaᴋartuksauvut nuname Kanaaneme.

³¹ Gadiblo kinguvângit Rubeniblo kinguvângit kiovut oᴋarlutiglo: Sôrlo Nâlekab kivgatit oᴋautilaungmagit, taimâk piniaromavogut.

³² Sakkolijarluta ikâromavogut Nâlekab sângane nunamut Kanaanemut, kingormgutijaksavullo pigijaksasiarijomavavut Jordanib miksâne.

³³ Mosesiblo Gadib kinguvângit, Rubeniblo kinguvângit, Manassiblo Josefib erningata kinguvângita abvangit tunitjivigivait Sihonib, Basanib ataningata, ataniovinganik, nuna iglugasaksoangillo tagvanêtut kiglingit tikidlugit, nuna iglugasaksoangillo avatânêtut.

³⁴ Gadiblo kinguvângita senavait Dibone, Atarotelo, Aroerelo,

³⁵ Atrot-sofanelo, Jazerelo, Jogbehalo;

³⁶ Bet-nimralo, Bet-haranelo, iglugasaksuit avalulit, saukallo unnuiviksangit.

³⁷ Rubeniblo kinguvângita senavait Hesbone, Elealelo, Kiriataimelo;

³⁸ Nebolo, Baal-meonelo, (assinginik atteᴋartilugit) Sibmalo; assinginiglo atteᴋartipait iglugasaksuit senajatik.

³⁹ Makiriblo, Manassib erningata, kinguvângit aivut Gileademut tigulugolo, sunairutivaillo Amorekut tagvanêtut.

⁴⁰ Mosesiblo Gileade tunivâ Makiremut, Manassib erninganut, tâpsomalo nunagivâ.

⁴¹ Jairiblo, Manassib erningata, iglugasait tagvanêtut tigujartorpait, atserarlugillo Havot-jairemik.

⁴² Nobablo tigujartorpait Kenat iglugasangillo, atserarpaillo Nobamik, atine maliklugo.