Numbers 31 - Labrador Inuttitut Heritage Bible

¹ Nalekablo Mosese oᴋarvigivâ, oᴋarlune:

² Israêlikut akkiniutigikit Midiakunut, kingorngane tagva ilaliudjauniarpotit inuᴋutigijarnut.

³ Mosesiblo inuit oᴋarvigivait, oᴋarlune: Angutinik sorᴋsuktuksanik ᴋeneritse akunapsingne, Midiakunik unatariartortuksanik, nâmaksititsijuksanik Nâlekab akkiniarninganik Midiakunik.

⁴ Kinguvârênit tamainit, Israêlib kinguvârêngninginit ilûnainit, atunit 1,000nik tiliklertuksauvose unatarnermut.

⁵ Taimaimat tausendeoᴋattartunit Israêleme 1,000 tilijauvut kinguvârênit tamainit, 12,000, sakkolijarlutik unatarnermut.

⁶ Mosesiblo tilivait, 1,000 kinguvârênit tamainit, unatarnermut, tâpkoa Pinehaselo Eliasarib ajoᴋertuijûb erninga, perᴋutillo ivlernartut tiptulautillo kamasâriutit tigumiarlugit.

⁷ Sorᴋsugiartorpullo Midiakunut, sôrlo Nâlekab Mosese perᴋolaungmago; angutillo tamaita toᴋorarpait.

⁸ Midiakullo ataningit toᴋogivait toᴋorartaujut ilagilugit; Evi, Rekemelo, Zurelo, Hurelo, Rebalo, Midiakut ataningit tellimat: Balaametauᴋ, Beorib erninga, toᴋopât saviksoarmut.

⁹ Israêlikullo arnat Midiamiut ᴋitorngangillo tiguvait; nergjuteᴋotingillo tamaita, saugaᴋotingillo tamaita, perᴋutingillo tamaita aᴋsârnigarivait.

¹⁰ Iglugasaksoaᴋotingillo nunaᴋarvigijangine tamaita, tupersoangillo tamaita ikomamut nungupait.

¹¹ Tigujaksallo tamaita, aᴋsârnigaksallo tamaita tiguvait, inuillo nergjutillo.

¹² Inuillo aularutijat, perᴋutillo tigujat, nergjutillo aᴋsârnigât tikiutivait Mosesemut, Eliasaremullo ajoᴋertuijomut, Israêlikullo ilagêktoᴋsôninginut, tangmârvingmut Moabib naternangane, Jordanib seniane Jerikome.

¹³ Mosesiblo Eliasariblo ajoᴋertuijûb ilagêktullo angajoᴋângita ilûnatik anilutik pagreartorpait tangmârviub avatânut.

¹⁴ Mosesiblo sorᴋsuktuksat angajoᴋângit, angajoᴋaujullo tausendelingnut angajoᴋaujullo hundertelingnut utertut unatarnermit ningaridlarpait.

¹⁵ Mosesiblo oᴋautivait: Arnat tamaita inôtipisigîk?

¹⁶ Ahâk, tâpkoa, Balaamib atanertuiningagut, Israêlikut tapatipait Nâlekamik Peor pitjutigilugo, tamannalo pivlugo nusilingnartoᴋ tikilauᴋpoᴋ Nâlekab ilagêktoᴋotinganut.

¹⁷ Taimaimat mâna angutiarsuit tamaita sorutsit akorngane toᴋorarsigik, arnallo tamaita ilisimajut anguniarnermik toᴋorarsigik.

¹⁸ Sorutsille arnaujut ilûnaita, anguniarnermik ilisimalungitut, inôtisigik ilipsingnut.

¹⁹ Ilipselo tangmâleritse tangmârviub avatâne uvlunik sevenenik; tamapse inungmik toᴋotsisimajose, toᴋungajomiglônêt aktuisimajose, sujungaitileritse nangminipsingnik uvlut pingajuane uvlullo seveningane, ilipse aularutijaselo.

²⁰ Annorâselo tamaita, kissingnillo senamajut tamaita, tuktungajullo merᴋunginit senamajut tamaita, perᴋutillo tamaita ᴋejungnit senamajut, sujungaititaksarivase.

²¹ Eliasariblo ajoᴋertuijûb angutit sorᴋsuktut unatarnermut ailauᴋtut, oᴋautivait: Tamadja perᴋojaᴋ maligaksaᴋ Nâlekab perᴋojanga Mosesemut:

²² Goldelo, silberelo, ᴋaᴋorlerlo, kikiarlo, amertajarlo, aᴋitorlo,

²³ Ilûnaitalo ikomamut asserortausôngolungitut, ikomakôrtitaksarivase, sujungaititauᴋovlugit; sullele ivsornaititaujuksauvut imermut sujungailisautiksamut: tamaitale ikomamut asserortausôt imermut pititaksarivase.

²⁴ Uvlullo seveningane annorâse ergortoraksarivase, tagva ivsornainiarpose, tungânelo tangmârvingmut aijuksauvose.

²⁵ Nâlekablo Mosese oᴋarvigivâ, oᴋarlune:

²⁶ Aᴋsârnigât tigujaujut, inuillo nergjutillo, unurningit kitilersigik, igvit, Eliasarelo ajoᴋertuijoᴋ, ilagêktullo kinguvârêt angajoᴋângit;

²⁷ Aᴋsârnigâllo avilugit maggûlivlugit; abvangit tunilugit sorᴋsuktuksanut unatarnermut ailauᴋtunut, abvangillo ilagêktoᴋsoarnut;

²⁸ Nâlekable ilangiusiarijaksanganik tigusigit sorᴋsuktuksanit unatarnermut ailauᴋtunit; tamât atautsemik 500nit, inungnit, tuktuvangnillo, siuteᴋortojunillo, saukanillo;

²⁹ Tâpkoa abvanginit tigukit, tunilugillo Eliasaremut ajoᴋertuijomut, tunergutiksauᴋovlugit isautijauᴋattartut Nâlekamut.

³⁰ Israêlikullo abvanginit tigusijuksauvotit atautsemik 50nit tamainit, inungnit, tuktuvangnillo, siuteᴋortojunillo, saukanillo, tagva nergjutinit tamainit, tunilugillo Levikunut, Nâlekab tupinganik udjertortunut.

³¹ Moseselo Eliasarelo ajoᴋertuijoᴋ piniarpuk sôrlo Nâlekab Mosese perᴋolaungmago.

³² Aᴋsârnigâllo, sorᴋsuktut tigujaviningit kikilugit, imaiput, saukat 675,000,

³³ Tuktuvaillo 72,000,

³⁴ Siuteᴋortojullo 61,000,

³⁵ Inuillo, arnat ilisimalungitut anguniarnermik, 32,000.

³⁶ Abvangillo, unatarnermut aijovinit ilangiusiarijangit, katillugit saukat 337,500;

³⁷ Nâlekablo ilangiusiarijangit, saukat 675.

³⁸ Tuktuvaillo 36,000; tâpkonangallo Nâlekab ilangiusiarijangit 72.

³⁹ Siuteᴋortojullo 30,500, tâpkonangallo Nâlekab ilangiusiarijangit 61.

⁴⁰ Inuillo 16,000; tâpkonangallo Nâlekab ilangiusiarijangit, inuit 32.

⁴¹ Mosesiblo ilangertaujut, Nâlekab tunergusiarijangit isautijauᴋattartut, tunivait Eliasaremut ajoᴋertuijomut, sôrlo Nâlekab Mosese perᴋongmago.

⁴² Israêlikullo abvasiarijangit, Mosesib ilangertangit angutinit sorᴋsuktunit,

⁴³ Ilagêktut abvasiarijangit imaiput, saukat 337,500,

⁴⁴ Tuktuvaillo 36,000,

⁴⁵ Siuteᴋortojut 30,500,

⁴⁶ Inuit 16,000;

⁴⁷ Israêlikut abvasiarijanginit Mosese tigusivoᴋ tamât atautsemik 50nit, inungnillo nergjutinillo, tunilugillo Levikunut udjertortunut Nâlekab tupinganik; sôrlo Nâlekab Mosese perᴋongmago.

⁴⁸ Sorᴋsuktoᴋatigêksuillo tausendeoᴋattartut angajoᴋângit, angajoᴋaujullo tausendenut, angajoᴋaujullo hundertenut, Mosesib sânganôrput;

⁴⁹ Moseselo oᴋautivât: Kivgatit kititsiᴋauvut sorᴋsulauᴋtunik pairijaptingnik, ilaptingniglo atautsemiglônêt assinuartoᴋangilaᴋ.

⁵⁰ Nâlekablo tunergusiarijanga ᴋaipavut, ilûnata atunit nagvârtaptingnit, goldemit senamajut, ᴋelaumgujat singiujat, tajallo, ᴋeterdlermillo, siumiutallo, ujamillo, tarnivut ulapᴋoseromavlugit Nâlekab sângane.

⁵¹ Mosesiblo Eliasariblo ajoᴋertuijûb golde tiguvâk tâpkonangat, tagva perᴋutit senamajut.

⁵² Goldelo, tunergutaujoᴋ isautijaujoᴋ, angajoᴋât tausendenut angajoᴋâllo hundertenut tunijangit Nâlekamut sekeletut 16,750tut oᴋumaitigivoᴋ.

⁵³ Sorᴋsuktut atunit aᴋsârnisimalaungmatta nangminerijaksamingnik.

⁵⁴ Mosesiblo Eliasariblo ajoᴋertuijûb golde tiguvâk angajoᴋaujunit tausendenut angajoᴋaujunillo hundertenut, âlugolo ilagêktut tupinganut, erᴋaumajutiksauᴋovlugo Israêlikunut Nâlekab sângane.