Numbers 30 - Labrador Inuttitut Heritage Bible

¹ Mosesiblo Israêlib kinguvârêngita angajoᴋângit oᴋarvigivait, oᴋarlune: Tamadja tagva Nâlekab perᴋojijutigijanga.

² Angut angermaringnermik angerune Nâlekamut, angermarigune nelâgut oᴋarmariklune tarnine ᴋelaksorlugo, oᴋausine unioraksarilungilâ; ᴋanerminille anijoᴋ maliklugo piniarmariktuksauvoᴋ.

³ Taimaktauᴋ arnaᴋ angermaringnermik angerune Nâlekamut, ᴋelaksorlune nangminerminik oᴋauserminut ᴋelak sûtigijaminut, atâtame iglunganêdlune suli, inôsuktôvlune;

⁴ Atâtangatalo angermaringninga oᴋausingalo ᴋelaksûtigijanga tarniminik tusarpago, nipangervigikpagolo, tagva angerningit soᴋosingituksauvut, oᴋausingillo ᴋelaksûtigijangit tarniminik soᴋosingituksauvut.

⁵ Atâtangatale inerterpago uvlorme tusarvigijamine, angerningita tarnimelônêt ᴋelaksûtigijangita neliat soᴋosingituksaungilaᴋ; Nâlekablo issumagijungnaiviginiarpâ, atâtangata inertermago.

⁶ Ueᴋarlunele angermaringnermik erᴋsugune, silainartomiglônêt oᴋarsimagune, tarnine ᴋelaksorlugo,

⁷ Uingatalo tusarpago inertertaililugolo uvlorme tusarvigijamine, tagva angerningit soᴋosingituksauvut, oᴋausingillo ᴋelaksûtigijangit tarniminik soᴋosingituksauvut.

⁸ Uingatale inerterpago uvlorme tusarvigijamine tâpsominga, tagva angermaringninga erᴋsuktanga, oᴋausingalo silainartoᴋ, ᴋaninganit anijoᴋ, ᴋelaksûtigijanga tarniminik, sunaungititaksarivâ, Nâlekablo issumagijungnaiviginiarpâ.

⁹ Uigarnerûble avitaumajûblônêt angermaringninga, tarniminiglo ᴋelaksûtigijanga sunaugaloarpat, soᴋosingituksauvoᴋ.

¹⁰ Uigilauᴋtamele iglungane angermarilaurune, tarninelônêt ᴋelaksulauruniuk oᴋauserminut,

¹¹ Uigilauᴋtangatalo tusalauᴋpago, nipangervigilugolo inerterlaungipago, tagva angermaringningit ilûnatik soᴋosingituksauvut, oᴋausingillo ᴋelaksûtigijangit tarniminik soᴋosingituksauvut.

¹² Uingatale sulingitilauᴋpagit nelautsititaksaujungnaitilugillo uvlorme tusarvigijamine tâpkoninga, tagva anilauᴋtut ilûnatik ᴋaninganit angermaringningit pitjutigilugit, ᴋelaᴋsûtillo tarniminik pitjutigilugit, soᴋosertuksauvut; uingata sulingitipait; Nâlekablo issumagijungnaiviginiarpâ.

¹³ Angermaringnerit tamaita, oᴋautsillo ᴋelaksûtaujut oᴋumaiksartitsijut tarnemik tamaita, uingata maliktauᴋojungnarpait inerterutigijungnarpaillônêt.

¹⁴ Uingatale uvlormit uvlormut nipangervigênarpago, tagva palangatipait angermaringningit tamaita, ᴋelaksûtingillo erᴋsuktangit tamaita; palangatipait nipangervigingmago uvlorme tusarvigijamine tâpkoninga.

¹⁵ Sulingitipagille nelautsititaksaujungnaitilugillo tusarêramigit kingorngane, tagva nuliame idluituliningit nangmaraksarivait.

¹⁶ Tamadja tagva maligaksat Nâlekab perᴋojijutigijangit angut nuliangalo pivlugik, atâtaujorlo paningalo inôsuktoᴋ atâtame iglunganêtoᴋ sulle pivlugik.