Numbers 3 - Labrador Inuttitut Heritage Bible

¹ Tamadja Aronib Mosesiblo kinguvângit uvlorme Nâlekab oᴋarvigilauᴋtangane Mosesemut ᴋaᴋᴋame Sinaime.

² Tamadjalo Aronib erningita atingit: Angajukleᴋ Nadabe, Abihulo, Eliasarelo, Itamarelo.

³ Tamadja Aronib erningita atingit, ajoᴋertuijut mingoartaujut, tâpsoma saimartitangit kivgartorᴋovlugit ajoᴋertuijônerme.

⁴ Nadabelo Abihulo toᴋolauᴋpuk Nâlekab sângane, tunergusermanik ikomamik takorngartamik Nâlekab sângane, Sinaib sunaᴋajuitungane, ᴋitorngaᴋalaungituglo; Eliasarelo Itamarelo kivgartorpuk ajoᴋertuijônerme atâtamik Aronib najorningane.

⁵ Nâlekablo Mosese oᴋarvigivâ, oᴋarlune:

⁶ Aronib kinguvângit maungautikit pitilugillo Aronib ajoᴋertuijôjûb sânganut, kivgartorᴋovlugit tâpsominga.

⁷ Kamatsiartuksauvullo tâpsoma pijariaᴋartanginik ilagêktullo ilûnatik pijariaᴋartanginik ilagêktut tupingata sângane, tupiub pijarialingit piniarlugit.

⁸ Pairᴋsijuksauvullo ilagêktut tupingata pitanginik, Israêliblo ᴋitorngangita pitanginik, tupiub pijarialingit piniarlugit.

⁹ Levikullo tunijaksarivatit Aronemut erninginullo; tunijaumarikput tâpsomunga Israêlib ᴋitorngangit pivlugit.

¹⁰ Aronelo erningillo ilijaksarivatit, tâpkoalo ivlersijuksauvut ajoᴋertuijônermingnik; takorngartarlo ᴋanilertoᴋ toᴋotaujuksauvoᴋ.

¹¹ Nâlekablo Mosese oᴋarvigivâ, oᴋarlune:

¹² Uvanga Levikut tiguvakka Israêlib ᴋitorngangita akornganit, erniangoᴋârtut ilûnaita igliarmik angmaijut Israêlib ᴋitorngangine simerlugit; Levikut perᴋutigijomavakka;

¹³ Erniangoᴋârtut tamaita perᴋutigigapkit, uvlorme taipsomane erniangoᴋârtut tamaita nuname Egipteneme anaulaurapkit, erniangoᴋârtut ilûnaita inungnelo nergjutinelo Israêleme annerilauᴋpakka; perᴋutaujuksauvut uvamnut; Uvangauvunga Nâlegaᴋ.

¹⁴ Nâlekablo Mosese oᴋarvigivâ sunaᴋajuitome Sinaime oᴋarlune:

¹⁵ Levikut kitikit atâtamik kinguvângit maliklugit, ᴋitorngarêngningit maliklugit; angutit ilûnaita taᴋᴋeᴋartut atautsimik ununersaniglo kititaksarivatit.

¹⁶ Mosesiblo kitipait Nâlekab oᴋausinga maliklugo sôrlo perᴋojaulaurame.

¹⁷ Tamadjalo Levib erningit, attingit maliklugit; Gersone, Kohatelo, Merarilo.

¹⁸ Tamadjalo Gersonib erningita atingit, ᴋitorngarêngningit maliklugit; Libnilo Simeilo.

¹⁹ Kohatiblo erningit, ᴋitorngarêngningit maliklugit: Amramelo Itsarelo, Hebronelo Usielelo.

²⁰ Merariblo erningit, ᴋitorngarêngningit maliklugit, Malilo Musilo. Tamadja Levikut ᴋitorngarêngningit atâtamik kinguvârêngit maliklugit.

²¹ Gersonemit Libnikut Sîmeoikullo pivut; tamadja Gersonib kinguvângit.

²² Kititaujut tâpkonangat, angutit unurningit maliklugit, taᴋᴋeᴋartut atautsemik ununersaniglo, kititaujut tâpkonangat 7,500ovut.

²³ Gersonekut ᴋitorngarêngit tangmârtuksauvut ilagêktut tupingata tunuane kangiane.

²⁴ Eliasafelo, Laelib erninga, angajoᴋaujuksauvoᴋ Gersonekut kinguvângine.

²⁵ Gersoniblo erningit udjertoraksaᴋartuksauvut ilagêktut tupingane, tupermik ivsornaitomik, tupermiglo tâpsoma matuksanganik illullermik, matuksanganiglo sillallermik, ilagêktullo tupingata upkoangata tâlutanganik,

²⁶ Avalullo tâlutanginik, avalullo upkoangata tâlutanganik, tupiub tunerguserviublo ᴋanitâgingnêtûb silatâne, aklunânginiglo ilûnainik tâpkonane atortunik.

²⁷ Kohatemillo Amramekut, Itsarikullo, Hebronekullo, Usielekullo pivut; tamadja Kohatekut kinguvângit.

²⁸ Angutit ilûnatik kititaujut unurningit maliklugit, taᴋᴋeᴋartut atautsemik ununersaniglo 8,600ovut, ivsornaitovingmik pairᴋsijuksauvlutik.

²⁹ Kohatekut ᴋitorngarêngit tangmârtuksauvut ilagêktut tupingata seᴋerngane.

³⁰ Elisafanelo, Usielib erninga, angajoᴋaujuksauvoᴋ Kohatekut kinguvângine.

³¹ Tâpkoalo pairijaksaᴋartuksauvut iklervingmik, sâmiglo, nenneroaᴋarvingmiglo, tunerguservingmiglo, ivsornaitoviublo perᴋutinginik atortunik kivgartornerme, upkomiglo, tâpsomalo atoriaᴋartanginik.

³² Eliasarelo, Aronib ajoᴋertuijûb erninga, angajoᴋaujuksauvoᴋ Levikut angajoᴋaujunginut, aulatsijuksauvlune ivsornaitovingmik pairᴋsijuksanik.

³³ Merarimillo Malikut Musikullo pivut, tamadja Merarib kinguvângit.

³⁴ Kititaujut tâpkonangat, angutit ilûnatik unurningit maliklugit, taᴋᴋeᴋartut atautsemik ununersaniglo 6,200ovut.

³⁵ Surielelo, Abihailib erninga, angajoᴋaujuksauvoᴋ Merarikut kinguvângine: tâpkoa tangmârtuksauvut ilagêktut tupingata taggâne.

³⁶ Merariblo erningit pairijaksaᴋartuksauvut ilagêktut tupingata sâtojanginik, seningajunginiglo, napajunginiglo, manguvinginiglo, perᴋutinginiglo tamainik, atoriaᴋartanginiglo tamainik;

³⁷ Avalullo tupiub avatânêtut napajunginik, manguvinginiglo, kikiaktanginiglo aklunânginiglo.

³⁸ Moseselo Aronelo tâpsomalo erningit tangmârtuksauvut ilagêktut tupingata sângane kitâne seᴋiniub nuivingata nelâne, kamatsiarᴋovlugit ivsornaitoviub kivgartortaujariaᴋarninganik Israêlib ᴋitorngangit pivlugit; takorngartarlo ᴋanilertoᴋ tagvunga toᴋotaujuksauvoᴋ.

³⁹ Kititaujullo Levikunit, Mosesiblo Aroniblo kititangit Nâlekab perᴋojanga maliklugo, ᴋitorngarêngit maliklugit, angutit ilûnatik taᴋᴋeᴋartut atautsemik ununersaniglo, 22,000ovut.

⁴⁰ Nâlekablo Mosese oᴋautivâ: Angutit erniangoᴋârtut ilûnaita Israêlib ᴋitorngangine taᴋᴋeᴋartut atautsemik ununersaniglo kitikit, atingitalo unurningit kamagikit.

⁴¹ Levikullo ingmigolingatitaksarivatit uvamnut, (Uvangaugama Nâlegaᴋ) erniangoᴋârtut ilûnaita Israêlib ᴋitorngangine simerlugit; Levikullo nergjuteᴋotingit, pijariorutit Israêlib ᴋitorngangita nergjuteᴋotingine simerlugit.

⁴² Mosesiblo erniangoᴋârtut ilûnaita Israêlib ᴋitorngangine kitipait, sôrlo Nâlekab perᴋongmago.

⁴³ Angutillo erniangoᴋârtut ilûnatik, atingita unurningit maliklugit, taᴋᴋeᴋartut atautsemik ununersaniglo, kititaujut tâpkonangat 22,273ovut.

⁴⁴ Nâlekablo Mosese oᴋarvigivâ, oᴋarlune:

⁴⁵ Levikut ingmigolingatikit Israêlib ᴋitorngangita erniangoᴋârtungit ilûnaita simerlugit, Levikullo nergjuteᴋotingit tâpkoa nergjuteᴋotingit simerlugit; Levikullo perᴋutaujuksauvut uvamnut; Uvangauvunga Nâlegaᴋ.

⁴⁶ Israêliblo ᴋitorngangita erniangoᴋârtungita Levikut unurᴋijangit 273nik pisiarijaujarianginut,

⁴⁷ Tigusijutigijaksarivatit atunit kênaujanik sekelenik tellimanik; ivsornaitoviub sekelinga maliklugo tigujaksarivatit (sekele atauseᴋ geratut 20tut akkitutigivoᴋ);

⁴⁸ Kênaujallo pisiniutaujut tâpkoa unurᴋijangit pivlugit tunijaksarivatit Aronemut tâpsomalo erninginut.

⁴⁹ Mosesiblo kênaujat pisiniutaujut tâpkoa unurᴋijangit pivlugit, ununersaujut Levikut pisiarijanginit;

⁵⁰ Israêlib ᴋitorngangita erniangoᴋârtunginit kênaujat tiguvait; sekelit 1,365, ivsornaitoviub sekelinga maliklugo;

⁵¹ Mosesiblo kênaujat pisiniutaujut tunivait Aronemut erninginullo, Nâlekab oᴋausinga maliklugo, sôrlo Nâlekab Mosese perᴋolaungmago.