Numbers 29 - Labrador Inuttitut Heritage Bible

¹ Takkillo seveningata uvlungita sivorlerpângane katimaniksaᴋartuksauvose opinadlartomik; oᴋumaitomik suliaᴋartuksaungilase; uvloᴋ tâmna tiptulausijarviksauvoᴋ ilipsingne.

² Tunergusertuksauvoselo tunergutiksamik ôtaksamik tipitsiariksautiksamik Nâlekamut; tuktuvangmik inôtsungmik atautsemik, saukamik angusâlormik atautsemik, saugârsungnik angutinik sevenenik, atautsemik jârelingnik, ᴋanoetoᴋangitunik;

³ Tunergutiksamiglo nerᴋiksamik tâpkoa tapiksanginik, senaugatsiarmik orᴋsumut akusimajomik, tellimaujoanik pingasunik tuktuvangmut, tellimaujoângnik maggûngnik saukamut angusâlormut,

⁴ Tellimaujoaniglo atautsemik atunit saugârsungnut sevenenut;

⁵ Tuktungajomiglo angutimik atautsemik tunergutiksamik ajortoêrutiksamik, ulapirᴋsartauniksapsingnut;

⁶ Tunergutiksaᴋ ôtaksaᴋ taᴋᴋêlaᴋsiut tapilugo, tunergutiksarlo ôtaksaᴋ soraijuitoᴋ, tâpsomalo tapiksanga tunergutiksaᴋ nerᴋiksaᴋ, tunergutiksarlo imiksaᴋ ilagilugo, ilusioᴋojaᴋ maliklugo, tipitsiariksauᴋovlugo, tunergutiksaᴋ ikomakut Nâlekamut.

⁷ Takkillo seveningata tâpsoma uvlungita teningane, katimaniksaᴋartuksauvose opinadlartomik; oᴋumaitomik suliaᴋartailijuksauvose, uvloᴋsiortuksauvoselo Nâlekamut uvlut sevenit nâvlugit;

⁸ Tunergutiksamigle ôtaksamik tunergusertuksauvose tipitsiariksautiksamik Nâlekamut; tuktuvangmik inôtsungmik atautsemik, saukamiglo angusâlomik atautsemik, saugârsungniglo angutinik 7nik, atautsemik jârelingnik ᴋanoetoᴋangitunik annerosuktuksauvose;

⁹ Tâpkoalo ilaksanginik tunergutiksamik nerᴋiksamik, senaugatsiamik orᴋsumut akᴋusimajomik, tellimaujoanik pingasunik tuktuvangmut, tellimaujoangnik maggûngnik saukamut angusâlomut,

¹⁰ Tellimaujoaniglo atautsemik saugârsungnut 7nut atunit;

¹¹ Tuktungajomiglo angutimik atautsemik tunergutiksamik ajortoêrutiksamik; tunergutiksaᴋ ajortoêrutiksaᴋ ulapirᴋsartaujutiksaᴋ tunergutiksarlo ôtaksaᴋ soraijuitoᴋ, tunergutiksallo nerᴋiksat tunergutiksallo imiksat tâpsomunga ilingajut, tapilugit.

¹² Takkillo 7ingita uvlungita 15ingane katimaniksaᴋartuksauvose opinadlartomik; oᴋumaitomik suliaᴋartailijuksauvose, uvloᴋsiortuksauvoselo Nâlekamut uvlut 7 nâvlugit;

¹³ Tunergusertuksauvoselo tunergutiksamik ôtaksamik, tunergutiksamik ikomakut, tipitsiariksautiksamik Nâlekamut; tuktuvangnik inôtsunik 13nik, saukângniglo angusâlûngnik maggûngnik, saugârsungniglo angutînik 14nik, atautsemik jârelingnik; ᴋanoetoᴋartuksaungilallo;

¹⁴ Tunergutiksamiglo nerᴋiksamik tâpkoa ilaksanginik, senaugatsiarmik orᴋsumut akᴋusimajomik, tellimaujoanik pingasunik tuktuvangmut atautsemut tuktuvait 13 ilûnatik nâvlugit, tellimaujoângnik maggûngnik saukângnut tamangnut atunit.

¹⁵ Tellimaujoaniglo atautsemik atunit saugârsungnut 14nut;

¹⁶ Tuktungajomiglo angutimik atautsemik ajortoêrutiksamik; tunergutiksaᴋ ôtaksaᴋ soraijuitoᴋ, tunergutiksarlo nerᴋiksaᴋ, tunergutiksarlo imiksaᴋ tâpsomunga ilingajoᴋ, tapilugit.

¹⁷ Uvlublo aipangane, tuktuvangnik inôtsunik 12nik, saukângniglo angusâlûngnik maggûngnik, saugârsungniglo angutinik 14nik, atautsemik jârelingnik, ᴋanoetoᴋangitunik;

¹⁸ Tunergutiksamiglo nerᴋiksamik tunergutiksaniglo imiksanik tâpkoa ilaksanginik, tuktuvangnut, angusâlungnullo, saugârsungnullo, unurningit maliklugit, ilusioᴋojaᴋ maliklugo;

¹⁹ Tuktungajomiglo angutimik atautsemik tunergutiksamik ajortoêrutiksamik; tunergutiksaᴋ ôtaksaᴋ soᴋosijuitoᴋ, tunergutiksarlo nerᴋiksaᴋ, tunergutiksallo imiksat tâpsomunga ilingajut, tapilugit.

²⁰ Uvlullo pingajuane tuktuvangnik 11nik, saukângniglo angusâlûngnik maggûngnik, saugârsungniglo angutinik 14nik, atautsemik jârelingnik, ᴋanoetoᴋangitunik;

²¹ Tunergutiksamiglo nerᴋiksamik, tunergutiksaniglo imiksanik tâpkoa ilaksanginik, tuktuvangnut, angusalungnullo, saugârsungnullo, unurningit maliklugit, ilusioᴋojaᴋ maliklugo;

²² Tuktungajomiglo angutimik atautsemik tunergutiksamik ajortoêrutiksamik, tunergutiksaᴋ ôtaksaᴋ soᴋosijuitoᴋ, tunergutiksarlo nerᴋiksaᴋ, tunergutiksallo imiksat tâpsomunga ilingajut, tapilugit.

²³ Uvlullo sittamangane tuktuvangnik tenenik, saukângniglo angusâlûngnik maggûngnik, saugârsungniglo angutinik 14nik, atautsemik jârelingnik, ᴋanoetoᴋangitunik;

²⁴ Tunergutiksamiglo nerᴋiksamik tunergutiksaniglo imiksanik tâpkoa ilaksanginik, tuktuvangnut, angusalungnullo, saugârsungnullo, unurningit maliklugit, ilusioᴋojaᴋ maliklugo;

²⁵ Tuktungajomiglo angutimik atautsemik tunergutiksamik ajortoêrutiksamik; tunergutiksaᴋ ôtaksaᴋ soᴋosijuitoᴋ, tunergutiksarlo nerᴋiksaᴋ, tunergutiksallo imiksat tâpsomunga ilingajut, tapilugit.

²⁶ Uvlullo tellimangane tuktuvangnik 9nik, saukângniglo angusâlûngnik maggûngnik, saugârsungniglo angutinik 14nik, atautsemik jârelingnik ᴋanoetoᴋangitunik;

²⁷ Tunergutiksamiglo nerᴋiksamik tunergutiksaniglo imiksanik tâpkoa ilaksanginik, tuktuvangnut, angusâlungnullo, saugârsungnullo, unurningit maliklugit, ilusioᴋojaᴋ maliklugo;

²⁸ Tuktungajomiglo angutimik atautsemik tunergutiksamik ajortoêrutiksamik; tunergutiksaᴋ ôtaksaᴋ soᴋosijuitoᴋ, tunergutiksarlo nerᴋiksaᴋ, tunergutiksallo imiksat tâpsomunga ilingajut, tapilugit.

²⁹ Uvlullo sixingane tuktuvangnik 8nik, saukângniglo angusâlûngnik maggûngnik, saugârsungniglo angutinik 14nik, atautsemik jârelingnik, ᴋanoetoᴋangitunik;

³⁰ Tunergutiksamiglo nerᴋiksamik, tunergutiksaniglo imiksanik tâpkoa ilaksanginik, tuktuvangnut, angusalungnullo, saugârsungnullo, unurningit maliklugit, ilusioᴋojaᴋ maliklugo;

³¹ Tuktungajomiglo angutimik atautsemik tunergutiksamik ajortoêrutiksamik; tunergutiksaᴋ ôtaksaᴋ soᴋosijuitoᴋ, tunergutiksarlo nerᴋiksaᴋ, tunergutiksallo imiksat tâpsomunga ilingajut, tapilugit.

³² Uvlullo seveningane tuktuvangnik sevenenik, saukângniglo angusâlûngnik maggûngnik, saugârsungniglo angutinik 14nik, atautsemik jârelingnik, ᴋanoetoᴋangitunik;

³³ Tunergutiksamiglo nerᴋiksamik, tunergutiksaniglo imiksanik tâpkoa ilaksanginik, tuktuvangnut, angusâlungnullo, saugârsungnullo, unurningit maliklugit, ilusioᴋojaᴋ maliklugo;

³⁴ Tuktungajomiglo angutimik atautsemik tunergutiksamik ajortoêrutiksamik; tunergutiksaᴋ ôtaksaᴋ soraijuitoᴋ, tunergutiksarlo nerᴋiksaᴋ, tunergutiksallo imiksat tâpsomunga ilingajut, tapilugit.

³⁵ Uvlullo 8ingane katimaniksaᴋartuksauvose opinadlartomik; oᴋumaitomik suliaᴋartuksaungilase;

³⁶ Tunergusertuksauvosele tunergutiksamik ôtaksamik, tunergutiksamik ikomakut, tipitsiariksautiksamik Nâlekamut; tuktuvangmik atautsemik, saukamik angusâlormik atautsemik, saugârsungniglo angutinik sevenenik, atautsemik jârelingnik, ᴋanoetoᴋangitunik;

³⁷ Tunergutiksamik nerᴋiksamik, tunergutiksaniglo imiksanik tâpkoa ilaksanginik, tuktuvangmut, angusâlormut, saugârsungnullo, unurningit maliklugit, ilusioᴋojoᴋ maliklugo;

³⁸ Tuktungajomiglo angutimik atautsemik tunergutiksamik ajortoêrutiksamik; tunergutiksaᴋ ôtaksaᴋ soraijuitoᴋ, tunergutiksarlo nerᴋiksaᴋ, tunergutiksallo imiksat tâpsomunga ilingajut, tapilugit.

³⁹ Tamakkoa tunijaksarivase Nâlekamut uvloᴋsiorvipsingne, angerutigijase, pijârijomiglo tunergutigijase erᴋaginagit, tunergutigisigik ôtaksanik, tunergutigisigiglo nerᴋiksanik, tunergutigisigiglo imiksanik, tunergutigisigiglo ᴋujaliutiksanik.

⁴⁰ Mosesiblo Israêlikut oᴋautivait tamainik Nâlekab unertutigijanginik Mosesemut.