Numbers 28 - Labrador Inuttitut Heritage Bible

¹ Nalekablo Mosese oᴋarvigivâ, oᴋarlune:

² Israêlikut perᴋokit oᴋautilugilo: Piliusiaksakka, tunergutiksat ôtaksat ikomakut, tipitsiariksautiksat, tunijaksarivase uvamnut neliutsiarningane.

³ Oᴋautijaksarivatillo: Tamadja tunergutiksat ikomakut tunijaksarijase Nâlekamut: saugârsûk angutîk atautsimik jârelîk, ᴋanoetoᴋangitûk, maggûk ᴋaut tamât, tunergutiksamut ôtaksamut noᴋᴋajuitomut.

⁴ Saugârsuk atauseᴋ tunergutiksarivat uvlâkut, saugârsûblo aipanga tunergutiksarivat unnukut;

⁵ Senaugatsiarmiglo, tunergutiksamik nerᴋiksamik, efab tellimaujoanik, akusimajomik orᴋsumut katjuksimajomut, hinib sitamanganut.

⁶ Tunergutiksauvoᴋ ôtaksamik soraijuitomik, aulataulauᴋtomik ᴋaᴋᴋame Sinaime, tipagiktôvlune naimajominartoᴋ, tunergutiksamik ikomakut Nâlekamut.

⁷ Tunergutiksamiglo imiksamik ilakartuksauvok kinib sitamanganik saugârsungmut atautsemut; ivsornaitovingme kovisijuksauvotit tunergutiksamik imiksamik pitsartujomik Nâlekamut.

⁸ Saugârsûblo aippanga tunergutigijaksarivat unnukut; tunergutiksatut nerᴋiksatut uvlâkut, tunergutiksatullo imiksatut ilingavlune tunergutigijaksarivat, tunergutiksaᴋ ikomakut, tipiksaᴋ naimajominartoᴋ Nâlekamut.

⁹ Uvlormelo sabbateojome saugârsûngnik angutîngnik maggûngnik, atautsemik jârelîngnik, ᴋanoetoᴋangitûngnik, senaugatsiarmiglo efab tellimaujôgingnik maggûngnik, tunergutiksamik nerᴋiksamik, orᴋsumut akusimajôngnik, tunergutiksanganik imiksamik ilaᴋartilugo;

¹⁰ Tamadja tunergutiksauvoᴋ ôtaksamik sabbatine tamaine, tunergutiksaᴋ ôtaksaᴋ soraijuitoᴋ, tunergutiksangalo imiksaᴋ tapilugo.

¹¹ Takkillo pigiarningine tunergusertuksauvose tunergutiksamik ôtaksamik Nâlekamut; tuktuvângnik inôtsûngnik maggûngnik, saugarmiglo angusalormik, saugârsungniglo angutinik sevenenik, atautsemik jârelingnik, ᴋanoetoᴋangitunik;

¹² Senaugatsiarmiglo, tunergutiksamik nerᴋiksamik, efab tellimaujunginik pingasunik, orᴋsumut akusimajunik, tuktuvangmut atautsemut, senaugatsiarmiglo, tunergutiksamik nerᴋiksamik, efab tellimaujôgingnik maggûngnik, orᴋsumut akusimajûngnik, saugarmut atautsemut.

¹³ Senaugatsiarmiglo, tunergutiksamik nerᴋiksamik, efab tellimaujoanik atautsemik, orᴋsumut akusimajomik, saugârsungmut atautsemut; tunergutiksauᴋovlugit ôtaksamik naimajominartomik, tunergutiksamik ikomakut Nâlekamut.

¹⁴ Tunergutiksangillo imiksat imaituksauvut: vainemik hinib abvanganik tuktuvangmut atautsemut, hiniblo pingajuanik saugarmut angusalormut, hiniblo sittamanganik saugârsungmut; tamadja tunergutiksaᴋ ôtaksaᴋ taᴋᴋine tamaine jârib taᴋᴋingit nâvlugit.

¹⁵ Tuktungajorlo angusâloᴋ atauseᴋ tunergutaujuksauvoᴋ ajortoêrutiksamik Nâlekamut; tapiksaujuksauvoᴋ tunergumut ôtaksamut soraijuitomut tunergumullo imiksamut.

¹⁶ Takkillo sivorlerpângata uvlungita 14ingane Nâlekab ᴋângervia neliutivoᴋ.

¹⁷ Taᴋᴋiublo tâpsomatsainaub uvlungita 15inga uvloᴋsiorviovoᴋ; uvlut sevenit nâvlugit ᴋaᴋᴋôjaᴋtortuksauvose pubjusauteᴋangitunik.

¹⁸ Uvlut tâpkoa sivorlerpângane katimaniksaᴋartuksauvose opinartoᴋsoarmik; oᴋumaitomik suliaᴋartailijuksauvose;

¹⁹ Tunergusertuksauvosele tunergutiksamik ikomakut, tunergutiksamik ôtaksamik Nâlekamut; tuktuvângnik inôtsûngnik maggûngnik, saugarmiglo angusâlormik atautsemik, saugârsungniglo angutînik 7nik, atautsemik jârelingnik; ᴋanoetoᴋangitunik annerosuktuksauvose;

²⁰ Tapiksanginiglo tunergutiksamik nerᴋiksamik, senaugatsiarmik orᴋsumut akusimajomik; tellimaujoanik pingasunik tunergusertuksauvose tuktuvangmut atautsemut; tellimaujoângniglo maggûngnik angusâlormut;

²¹ Tellimaujoaniglo atautsemik tunergusertuksauvotit saugârsuit sevenit atunit pivlugit;

²² Tuktungajomiglo angutimik atautsemik tunergutiksamik ajortoêrutiksamik, ulapᴋosertaujutiksapsingnut.

²³ Tamakkoa tunergutigijaksarivase tunergutiksaᴋ ôtaksaᴋ uvlâᴋsiut tapilugo, tâmna tunergutiksaungmat ôtaksamik soraijuitomik.

²⁴ Taimailiorluse uvlut sevenit nâvlugit tunitjijuksauvose tunergutiksanik nerᴋiksanik tunergutaujunik ikomakut tipitsiariksautiksamik Nâlekamut; tunergutiksaᴋ ôtaksaᴋ soraijuitoᴋ, tunergutiksarlo imiksaᴋ tâpsoma ilanga, tapigilugo.

²⁵ Uvlullo seveningane katimaniksaᴋartuksauvose opinadlartomik; oᴋumaitomik suliaᴋartailijuksauvose.

²⁶ Taimaktauk uvlorme pijariorutit uvloᴋsiorutauvingane, tunitjitiluse tunergutiksamik senaukamik nutâmik Nâlekamut vôgesiorvipsingne, katimaniksaᴋartuksauvose opinadlartomik; oᴋumaitomik suliaᴋartuksaungilase;

²⁷ Tunergutiksamigle ôtaksamik tunergusertuksauvose tipitsiariksautiksamik Nâlekamut; tuktuvângnik inôtsûngnik maggûngnik, saukamik angusâlormik atautsemik, saugârsungniglo angutinik sevenenik, atautsemik jârelingnik;

²⁸ Tâpkoalo tapiksanginik, tunergutiksamik nerᴋiksamik, senaugatsiarmik orᴋsumut akusimajomik, tellimaujoanik pingasunik tuktuvangmut atautsemut, tellimaujoângnik maggûngnik angusalormut atautsemut,

²⁹ Tellimaujoaniglo atautsemik saugârsuit sevenit atunit pivlugit;

³⁰ Tuktungajomiglo angutimik atautsemik ulapirᴋsartauniksapsingnut.

³¹ Tunergutiksaᴋ ôtaksaᴋ soraijuitoᴋ tunergutiksarlo nerᴋiksaᴋ tâpsoma ilaksanga tapilugo, tunergutigijaksarivase (ᴋanoetoᴋangitunik annerosuktuksauvose), tâpkoalo ilaksanginik tunergutiksanik imiksanik.