Numbers 27 - Labrador Inuttitut Heritage Bible

¹ Josefiblo erningata Manassib kinguvângita ilangata erningata Makirib erningata Gileadib erningata Heferib erningata Zelofehadib paningit tikilerput; paningillo attingit imaiput: Mala, Noa, Hogla, Milka, Tirzalo.

² Nangerpullo Mosesib Eliasariblo ajoᴋertuijûb, angajoᴋâllo, ilagêktoᴋsuillo ilûnatik, sângane, ilagêktut tupingata upkoangane, oᴋarlutik:

³ Atâtavut inôjungnailauᴋpoᴋ sunaᴋajuitome, pikablâᴋatigêktunullo Nâlekamik Koramut ilanginullo, ilaulaungilaᴋ; idluininele pivlugit toᴋolauᴋpoᴋ; erneᴋalaungilarlo.

⁴ Sôᴋ atâtapta attinga pêjartaujuksauvâ kinguvângoᴋatigijanginit, erneᴋalaungininga pitjutigivlugô? Nangminerijaksaptingnik tunitjivigilauᴋtigut atâtapta ᴋatangutingita akorngane.

⁵ Mosesiblo tâpkoa pitjutigijangat âpâ Nâlekab sânganut.

⁶ Nâlekablo Mosese oᴋarvigivâ, oᴋarlune:

⁷ Zelofehadib paningit idluartomik oᴋarput: kingormgutijaksamik nangminerijamingnik tunitjivigijaksarivatit atâtangita ᴋatangutingita akorngane; atâtangita kingormgutijaksanga tunijaksarivat tâpkonunga.

⁸ Israêlikullo oᴋarvigijaksarivatit, oᴋarlutit: Inuk inôjungnaipat erneᴋarane, kingormgutijaksanga tunijaujuksauvoᴋ paninganut.

⁹ Paniᴋangipallo kingormgutijaksanga tunijaksarivase ᴋatangutinginut.

¹⁰ ᴋatanguteᴋangipallo, kingormgutijaksanga tunijaksarivase atâtangata ᴋatangutinginut.

¹¹ Atâtangalo ᴋatanguteᴋangipat, kingormgutijaksanga tunijaksarivase ilagijanganut ᴋaninerpaujomut tâpsomunga kinguvârêngningane; tamadja maligaksauvoᴋ idluarsainerme Israêlikunut, sôrlo Nâlekab Mosese perᴋolaungmago.

¹² Nâlekablo Mosese oᴋautivâ: Majorarit ᴋaᴋᴋamut omunga Abarimut, nunalo tunimajara Israêlikunut ulernairtoruk.

¹³ Ulernairêrungnelo, igvittauᴋ ilaliudjaulârpotit sivorlerijarnut, sôrlo angajuit Aron ilaliudjaulaungmat;

¹⁴ Oᴋausera tapagilauraptiko sunaᴋajuitome Zineme ilagêktoᴋsuit aivadlarningine, ivlernartilaunginaptinga tâpkoa ijingita sângine. (Tamadja immit akkerartorvit Kadeseme sunaᴋajuitome Zineme.)

¹⁵ Mosesiblo Nâlegaᴋ oᴋarvigivâ, oᴋarlune:

¹⁶ Nâlekab uvinilit ilûnatik anerningita Gudingata angut angajoᴋaujuksaᴋ ilagêktoᴋsoarnut anneriliuk,

¹⁷ Anisârtuksaᴋ tâpkoa sivuningine, itersârtuksarlo tâpkoa sivuningine, tesiortuksaᴋ tâpkoninga aulartilugit tikitilugillo; Nâlekab ilagêktoᴋotingit saukatitut mianerijeᴋangitutitut iᴋonagit.

¹⁸ Nâlekablo Mosese oᴋautivâ: Josua, Nunib erninga, ilagiuk, angutaujoᴋ anernermik ilumilik, aggangnullo patingmiuk;

¹⁹ Eliasariblo ajoᴋertuijûb sânganôrtiuk ilagêktullo iluengartut sânginut; perᴋoleruglo tâpkoa takkoane.

²⁰ Opinautigijavillo ilanga iliuk tâpsomunga, ilagêktoᴋsuit Israêlikut iluengartut tusâᴋovlugit.

²¹ Eliasariblo ajoᴋertuijûb sângane nangertuksauvoᴋ, tâpsomalo ᴋaumaᴋutib idluarsaininga atorlugo Nâlekab sângane aperᴋutigijaksarivâ; tâpsoma oᴋausinga maliklugo anijuksauvut, tâpsomalo oᴋausinga maliklugo itertuksauvut, tâmna, Israêlikullo ilûnatik tâmna ilagilugo, tagva ilagêktoᴋsuit iluengartut.

²² Moseselo taimailiorpoᴋ, sôrlo Nâlekab perᴋongmago; Josualo ilagivâ pitilugolo Eliasarib ajoᴋertuijûb sânganut, ilagêktullo iluengartut sânginut;

²³ Patingmivâlo aggangminut perᴋolugolo sôrlo Nâlegaᴋ oᴋalaungmat Mosesemut.