Numbers 26 - Labrador Inuttitut Heritage Bible

¹ Pijokarporlo nusilingnartûb kingorngane, Nâlekab Mosese Eliasarelo, Aronib ajoᴋertuijûb erninga, oᴋarvigingmagik, oᴋarlune:

² Kitisigik Israêlikut ilagêktoᴋsôningit ilûnaita, 20nik ununersaniglo jâreᴋartut, atâtamik kinguvârêngningit maliklugit, ilûnaita Israêleme unatariartorungnartut.

³ Mosesiblo Eliasariblo ajoᴋertuijûb oᴋaᴋatigivait Moabib naternangane Jordanib seniane Jerikome, oᴋarlutik:

⁴ Kitisigik inugiartoᴋsuit, jâreᴋartut 20nik ununersaniglo; sôrlo Nâlekab Mosese Israêlikullo, nunamit Egiptenemit aularutijaulauᴋtut, perᴋongmagit.

⁵ Ruben, Israêlib erneriᴋârtanga; Rubenib erningit; Henok, tâpsomangallo kinguvârêt Henokekut; Pallu, tâpsomangat kinguvârêt Pallukut;

⁶ Hezron, tâpsomangat Hezronekut; Karmi, tâpsomangat Harmikut;

⁷ Tamadja Rubenekut ᴋitorngarêngit; kititaujullo tâpkonangat 43,730ovut.

⁸ Pallublo erninga, Eliabe.

⁹ Eliablo erningit; Nemuele, Dâtanelo, Abiramelo. Dâtan Abiramelo tâpkoangovuk ilagêktoᴋsuit ᴋaiᴋojâgik, akkerartortuk Mosesemik Aronemiglo, Korakut ilagilugit, Nâlegaᴋ pikablâvigingmatsuk;

¹⁰ Nunab ᴋanine aitarmago, êlugillo Kora ilagilugo, iligêt tâpkoa toᴋomatta; neliutome tâpsomane ikomab angutit 250 nungulauᴋpait, nelunaikutangolilauᴋpullo.

¹¹ Korable erningit toᴋolaungilat.

¹² Sîmeonib erningit, kinguvârêngit maliklugit: Nemuelemit, Nemuelekut; Jaminemit, Jaminekut; Jakinemit, Jakinekut;

¹³ Seramit, Serakut; Saulemit, Saulekut.

¹⁴ Tamadja Sîmeonekut ᴋitorngarêngit, 22,200.

¹⁵ Gadib erningit, kinguvârêngit maliklugit: Zifonemit, Zifonekut; Haggimit, Haggikut; Sunimit, Sunikut;

¹⁶ Ornimit, Ornikut; Erimit, Erikut;

¹⁷ Arodemit, Arodekut; Arelimit, Arelikut;

¹⁸ Tamadja Gadekut ᴋitorngarêngit; tâpkonangat kititaujut 40,500.

¹⁹ Judab ernîgik, Erelo Onanelo, Erelo Onanelo toᴋovuk nuname Kanaaneme.

²⁰ Judablo erningit kinguvârêngit maliklugit: Selamit, Selakut; Perezemit, Perezekut; Zeramit, Zerakut.

²¹ Pereziblo erningit imaiput: Hezronemit, Hezronekut; Hamulemillo, Hamulekut.

²² Tamadja Judakut ᴋitorngarêngit kititaujut tâpkonangat maliklugit, 76,500.

²³ Isassarib erningit, kinguvârêngit maliklugit: Tolamit, Tolakut; Puvamit, Puvakut;

²⁴ Jasubemit, Jasubekut; Simronemit, Simronekut;

²⁵ Tamadja Isassarekut ᴋitorngarêngit kititaujut tâpkonangat maliklugit, 64,300.

²⁶ Sebulonib erningit, kinguvârêngit maliklugit: Seredemit, Seredekut; Elonemit, Elonekut; Jaleelemit, Jaleelekut.

²⁷ Tamadja Sebulonikut ᴋitorngarêngit kititaujut tâpkonangat maliklugit, 60,500.

²⁸ Josefib erningit, kinguvârêngit maliklugit: Manasse Efraimelo.

²⁹ Manassiblo erningit: Makiremit, Makirekut; Makirelo ernertârpoᴋ Gileademik: Gileademillo, Gileadekut.

³⁰ Tamadjalo Gileadib erningit: Jezeremit, Jezerekut; Helekemit, Helekekut;

³¹ Asrielemit, Asrielekut; Sekememit, Sekemekut;

³² Semidamit, Semidakut; Heferemit, Heferekut.

³³ Zelofehadelo, Heferib erninga, ernertâlaungilaᴋ panitârporle; Zelofehadiblo paningit atteᴋarput: Malamik, Noamiglo, Hoglamiglo, Milkamiglo, Tirzamiglo.

³⁴ Tamadja Manassib ᴋitorngarêngit, kititaujullo tâpkonangat 52,700ovut.

³⁵ Tamadjalo Efraimib erningit, kinguvârêngit maliklugit: Sutelamit, Sutelakut; Bekeremit, Bekerekut; Tahanemit, Tahanekut.

³⁶ Tamadjalo Sutelab erninga: Eranemit, Eranekut.

³⁷ Tamadja Efraimib erningita ᴋitorngarêngit kititaujut tâpkonangat maliklugit, 32,500. Tamadja Josefib erningit, ᴋitorngarêngit maliklugit.

³⁸ Benjaminib erningit, kinguvârêngit maliklugit: Belamit, Belakut; Asbelemit, Asbelekut; Ahiramit, Ahirakut;

³⁹ Sefufamemit, Sefufamekut; Hufamemit, Hufamekut.

⁴⁰ Belablo ernîgik ukkuangovuk: Ardelo Naamanelo; Ardemillo, Ardikut; Naamanemit, Naamanekut.

⁴¹ Tamadja Benjaminib erningit ᴋitorngarêngit maliklugit; kititaujullo tâpkonangat 45,600ovut.

⁴² Tamadja Danib erningit, kinguvârêngit maliklugit: Suhamemit, Suhamekut. Tamadja Danib ᴋitorngarêngit, ᴋitorngarêngit maliklugit.

⁴³ Suhamekut ᴋitorngarêngit ilûnatik, kititaujut tâpkonangat maliklugit, 64,400ovut.

⁴⁴ Asserib erningit, kinguvârêngit maliklugit: Imnamit, Imnakut; Isvimit, Isvikut; Beriamit, Beriakut.

⁴⁵ Beriab erninginit: Heberemit, Heberekut; Malkielemit, Malkielekut.

⁴⁶ Asseriblo paninga atteᴋarpoᴋ Seramik.

⁴⁷ Tamadja Asserib erningita ᴋitorngarêngit kititaujut tâpkonangat maliklugit, 53,400.

⁴⁸ Naftalib erningit, kinguvârêngit maliklugit: Jazeelemit, Jezeelekut; Gunimit, Gunikut;

⁴⁹ Jezeremit, Jezerekut; Sillememit, Sillemekut.

⁵⁰ Tamadja Naftalib ᴋitorngarêngit, ᴋitorngarêngit maliklugit; kititaujullo tâpkonangat 45,400ovut.

⁵¹ Tamakkoangovut kititaujut Israêlekunit, 601,730.

⁵² Nâlekablo Mosese oᴋarvigivâ, oᴋarlune:

⁵³ Tamakkonunga nuna avitaujuksauvoᴋ kingormgutijaksauvlune attingita unurningit maliklugit.

⁵⁴ Ununersanut tunitjijuksauvotit kingormgutijaksamik anginersamik, ikinersanullo tunitjijuksauvotit kingormgutijaksamik mikinersamik; ilûnainut, kititaujut tâpkonangat maliklugit, kingormgutijaksaᴋ tunijaujuksauvoᴋ.

⁵⁵ Taimaigaloartilugolo nuna avitaujuksauvoᴋ immerautimut; atâtamik kinguvârêngita attingit maliklugit kingormgujijuksauvut.

⁵⁶ Immeraut atorlugo kingormgutijaksangit avitaujuksauvoᴋ ununersanullo ikinersanullo.

⁵⁷ Tamakkoangovullo kititaujut Levikunit, ᴋitorngarêngit maliklugit: Gersonemit, Gersonekut; Kohatemit, Kohatekut; Merarimit, Merarikut.

⁵⁸ Tamadja Levib ᴋitorngarêngit: Libnikut, Hebronikut, Malikut, Musikut, Korakullo. Kohatiblo Amram ernertârivâ.

⁵⁹ Amramiblo nulianga ateᴋarpoᴋ Jokabedemik, Levib paninganik, inûlilauᴋtomik Levimut Egipteneme: tâmnalo Amramemit ernertârpoᴋ Aronemiglo Mosesemiglo, tâpkoalo najangak Mirijamemik.

⁶⁰ Aronelo ernertârpoᴋ Nâdabemik Abihumiglo, Eliasaremik, Itamaremiglo.

⁶¹ Nâdabelo Abihulo toᴋolauᴋpuk tunergusermanik ikomamik takorngartamik Nâlekab sângane.

⁶² Kititaujullo tâpkonangat 23,000ovut, angutit ilûnatik taᴋᴋeᴋartut atautsemik ununersaniglo; kitikasiutjaulaungimatta Israêlikut akorngane.

⁶³ Tamakkoangovut kititaujut Mosesemut Eliasaremullo ajoᴋertuijomut; kititsijûngnut Israêlikunik Moabib naternangane Jordanib seniane Jerikome.

⁶⁴ Tâpkoale akorngane anguteᴋalungilaᴋ kititaulauᴋtomik taipsomane Mosesemut Aronemullo ajoᴋertuijomut kititsilauᴋtûngnut Israêlikunik sunaᴋajuitome Sinaime.

⁶⁵ Tâpkoa pivlugit Nâlegaᴋ oᴋarsimalaungmat: Toᴋojuksauvut sunaᴋajuitome. Tâpkonangallo amiakoᴋangilaᴋ angutimik atautsemiglônêt, kissimik Kâlemik, Jefunib erninganik, Josuamiglo, Nunib erninganik.