Numbers 25 - Labrador Inuttitut Heritage Bible

¹ Israelikulle nunaᴋalerput Sittimeme, inuillo Moabekut paningit assiniaᴋatigilerpait;

² Tâpkoa inuit innamagit tunerguserviksiorvingmingnut gûdingoamingnut; inuillo nerrivut, gudingoangillo tuksiarvigivait.

³ Israêlikullo Bâal-peor ungagivât; Nâlekablo ningaumajârvigilerpait.

⁴ Nâlekablo Mosese oᴋautivâ: Inuit angajoᴋângit ilûnaita tigukit ᴋimiklugillo Nâlegaᴋ pivlugo seᴋinerartaujome, Nâlekab ningaumajâdlarninga sangutitauᴋovlugo Israêlikunit.

⁵ Mosesiblo Israêlikut idluarsaijungit oᴋautivait: Ilûnase atunit toᴋotsileritse inôᴋatipsingnik Bâal-peoremut ungajunik.

⁶ Ahâglo, Israêlikut ilangata tikilune arnaᴋ Midianemioᴋ tikiutivâ ᴋatangutiminut Mosesib takkoane, Israêlikullo ilagêktoᴋsuit ilûnatik takkoane, ᴋeadlartilugit ilagêktut tupingata sângane.

⁷ Finiasiblo, Eliasarib erningata Aronib ajoᴋertuijûb erngutangata, tamanna takungmago, nikovipoᴋ ilagêktut akornganit, tigusivorlo ᴋalugiarmik aggangminut;

⁸ Angullo Israêlimioᴋ malikpâ tupinganut, tamarmiglo kapivak, angut Israêlimioᴋ, arnarlo, nângagut. Taimaglo nusilingnartoᴋ sorairpoᴋ Israêlikune.

⁹ Toᴋojullo nusilingnartomut 24,000ovut.

¹⁰ Nâlekablo Mosese oᴋarvigivâ, oᴋarlune:

¹¹ Finiasib, Eliasarib erningata, Aronib ajoᴋertuijûb erngutangata, ningaumajârnera sangutipâ Israêlikunit, ilungertornimnut ilungertormat tâpkoa akorngane, nungutsiᴋonanga Israêlikunik ilungertornimne.

¹² Taimaimat oᴋarit: Ahâk, tunitjivigivara angernimnik ulapirᴋsautelingmik;

¹³ Tâpsomungalo kinguvânginullo angerniolârpoᴋ ajoᴋertuijônermik soraijuitomik; ilungertudlarlaungmat Gûdine pivlugo, Israêlikullo ulapᴋosilaungmagit.

¹⁴ Angutelo Israêlimioᴋ, toᴋotaujoᴋ arnaᴋ Midianemioᴋ toᴋotautilugo, atteᴋarpoᴋ Simrimik, Salub erninga, angajoᴋaujoᴋ kinguvârêt Sîmeonekut atâtangita ilangata iglungane.

¹⁵ Arnarlo Midianemioᴋ toᴋotaujoᴋ atteᴋarpoᴋ Kosbimik, Zurib paninga; tâmna angajoᴋauvoᴋ atâtaujut ilangata iglungane Midianeme.

¹⁶ Nâlekablo Mosese oᴋarvigivâ, oᴋarlune:

¹⁷ Midianemiut opaktorkit annaudlarlugillo;

¹⁸ Pingitsertornermingnut pagvisarmase, terlialaungmase Peorib pingane, Kosbiblo, angajoᴋaujub Midianeme paningata, tâpkoa najangata, pingane, toᴋotaulauᴋtûb nusilingnartûb uvlungane Peor pitjutigilugo.