Numbers 24 - Labrador Inuttitut Heritage Bible

¹ Bâlaamelo takogame Israêlikut saimarsartaugiangat ᴋuvianarmat Nâlekamut, ailungilaᴋ sivornganetut nelautainerlungneᴋsioromavlune, kênanele sâtipâ sunaᴋajuitomut.

² Takosarlunelo, Israêlikut takovait tangmârsimavlutik kinguvârêngit maliklugit, Gûdiblo anerningata tupvigivâ.

³ Imgerutinelo isuᴋsilugo, oᴋarpoᴋ: Bâlaam, Beorib erninga, oᴋarpoᴋ, angutelo, uitajunik ijilik, oᴋarpoᴋ:

⁴ Gûdib oᴋausinginik tusartoᴋ, oᴋarpoᴋ: ajugaᴋangitûb takotitjutinganik tautuktoᴋ, pâmangavlune, ijeᴋarlunele uitajunik:

⁵ ᴋuvianartoᴋsôvut tupitit, Jâko, tupersoatit, Israêle!

⁶ Naᴋsatitut issivitsiarput, perorsêviktitut kôb seniane, napârtutitut tipitsiariksautiksatitut Nâlekab ilijangititut, napârtutitut Sideretut imit seniane.

⁷ Imeᴋ kôlârpoᴋ ᴋatanginit, karngasutingillo imânêlârput unuktune, ataninga ajugaunersaulârpoᴋ Agagemit, ataniovingalo opinadlalârpoᴋ.

⁸ Gûdib aularutivâ Egiptenemit, nukkeᴋarporlo tuktuvaub nujoartûb nukkingatut: inôᴋatigêksuit ômigijine nungulârpait, sauningillo serᴋalilugit, puttôlârpait ᴋargjuminut.

⁹ Aᴋopivoᴋ, palungavoᴋ loevetut, pûsevâluktullo; kia tupaksarniarᴋaûk? Saimarsartaule saimarsaijoᴋ ilingnik, ôminarsijaulelo ôminarsiᴋojijoᴋ ilingnik.

¹⁰ Bâlakiblo Bâlaam ningaumajârvigidlarpâ, agganelo patiktidlarpait: Bâlakiblo Bâlaam oᴋautivâ: ᴋaiᴋolauᴋpagit ôminarsijauᴋojiᴋovlutit ômigijimnik, ahâglo, pingasuertorlutit saimarsarpatit.

¹¹ Taimaimat mâna ᴋemâlerit nunagijarnut; issumaᴋalauᴋpunga angijomik opigijomavlutit; ahâgle, Nâlekab opigijautailitipâtit.

¹² Bâlaamiblo Bâlak oᴋautivâ: Aᴋpârtoᴋotitit tilijatit uvamnut oᴋarvigilaungilakkâ, oᴋarlunga:

¹³ Bâlakib tunitjiviginajarpanga iglominik tatatomik silberemik goldemiglo, Nâlekab oᴋausingata ungatânôrungnangilanga, ajungitomiglônêt ajortomiglônêt issumamnik piniaromavlunga; Nâlekab oᴋauserijanga, tâmna oᴋauserijomavarâ?

¹⁴ Mânalo, ahâk, inôᴋatimnut ailerpunga; ᴋailerit, oᴋautitsomavagit inugiartoᴋsuit pinialârninginik inuᴋotingnut neliutome pijomârtome.

¹⁵ Imgerutinelo isuᴋsivâ, oᴋarlunelo: Bâlaam, Beorib erninga, oᴋarpoᴋ, angutelo, uitajûngnik ijilik, oᴋarpoᴋ:

¹⁶ Gudib oᴋausinginik tusartoᴋ oᴋarpoᴋ, ᴋaujimajorlo ᴋotsingnerpângojûb ilisimaninganik, ajugaᴋangitûb takotitjutinganik tautuktoᴋ, pâmangavlune, ijeᴋarlunelo uitajûngnik;

¹⁷ Takojomârpara, mânaungitorle: ulernaigivara, ᴋanitomiungitorle; uvloriaᴋ nuijomârpoᴋ Jakomit, ajaupiarlo makilârpoᴋ Israêlemit, serᴋalitsilârporlo Moabib terreᴋunginik, asserorsailunelo Setib erninginik tamainik.

¹⁸ Edomelo perᴋutaujomârpoᴋ, ômigijinelo Seir perᴋutigijomârivâ; Israêlelo sâlaᴋadlalârpoᴋ.

¹⁹ Jâkomillo pijoᴋ ajugaulârpoᴋ, nungutsilârporlo amiakôjunik iglugasaksoarne.

²⁰ Amalekullo takonârlugit, imgerutine isuᴋsivâ oᴋarlunelo: Amalek sivorlerpaulauᴋpoᴋ inôᴋatigêksoarnit, kinguvângille nungutaujomârput.

²¹ Kênikullo takonârlugit, imgerutine isuᴋsivâ oᴋarlunelo: Inigijat sôngodlarpoᴋ, auktortallo âᴋiktauvoᴋ ᴋairtune.

²² Sullele Kênikut asserortaulârput, Assuremut aᴋsârnigauvluse aularutijauᴋârtinase.

²³ Imgerutinelo isuᴋsingmilugo oᴋarpoᴋ: Kapianarmêk, kina inôjungnarᴋâ Gûde taimailiorpât?

²⁴ Umiaᴋsuille tikilârput Kittimemit, kapiasuktitsilârpullo Assuremik, kapiasuktitsilutiglo Eberemik, tâmnalotauᴋ asserortaulârpoᴋ.

²⁵ Bâlaamelo makipoᴋ aularlunelo uterpoᴋ nunaminut; Bâlaketauᴋ aularpoᴋ.