Numbers 23 - Labrador Inuttitut Heritage Bible

¹ Bâlaamiblo Bâlak oᴋautivâ: Tunerguserviliorit sevenenik tamâne, tuktuvangniglo sevenenik angusalungniglo sevenenik atuinaruterigit uvamnut.

² Bâlakelo piniarpoᴋ sôrlo Bâlaamib oᴋautingmago; Bâlakelo Bâlaamelo tunerguserpuk tuktuvangmik Angusâlormiglo tunerguservingne tamaine.

³ Bâlaamiblo Bâlak oᴋautivâ: Nangilerit tunergutivît ôtâb seniane, aularniarpungalo; imaᴋa Nâlekab pagrearniarpânga; unertutijangalo uvamnut, oᴋautiginiarpara ilingnut. Imnaublo ᴋânganôrpoᴋ.

⁴ Gûdiblo Bâlaam pârpâ, tâpsomalo (Bâlaamib) oᴋautivâ: Tunerguservit sevenit âᴋikauvakka, tunerguserlungalo tuktuvangmik angusalormiglo tamaine.

⁵ Nâlekablo Bâlaamib ᴋaninga pitatserpâ oᴋautsimik, oᴋautilugolo: Uterit Bâlakemut, imâglo oᴋauseᴋarit.

⁶ Uterporlo tâpsomunga, ahâglo, tâmna nangerpoᴋ tunergutime ôtâb seniane, tâmnalo Moabiblo angajoᴋângit.

⁷ Imgerutinelo issuᴋsivâ, oᴋarlunelo: Aramemit tikiutitipânga Bâlakib, Moabib ataningata, ᴋaᴋᴋanit unanêtunit; ᴋaigit, pivlunga Jakokut ôminarsijauᴋokit, ᴋaigit, Israêlikut oᴋarnilutigikit.

⁸ ᴋanoᴋ ôminarsijauᴋojijungnarᴋêk Gûdib ôminarsijauᴋolungitanganîk? ᴋanoᴋ oᴋarnilutigijungnarpakkâ Nâlekab oᴋarnilutigilungitangît?

⁹ ᴋairtut ᴋânganit takogapkit, ᴋaᴋᴋanillo ulernairtorpakka; ahâk, inugiartoᴋsôvut aptersimajut, inôᴋatigêksoarnullo kitiᴋatauniangilat.

¹⁰ Kina kititsijungnarᴋâ Jakokut saninginik, oᴋautigilugillônêt Israêlikut sitamangît? Tarniga toᴋolerle idluartut toᴋoninginik, sorairviksaralo pile tâpsoma sorairviksangatut.

¹¹ Bâlakiblo Bâlaam oᴋautivâ: Sumik piniarvigivingâ? Tigulauᴋpagit ôminarsijauᴋojiᴋovlutit ômigijimnik, sunaubvalo saimarsarpatit.

¹² Tâmnalo kiovoᴋ, oᴋarlunelo: Kamatsiartuksaungilangâ oᴋarᴋovlunga Nâlekab ᴋanimnut pititanganîk?

¹³ Bâlakiblo oᴋautivâ: Ilagilaungatôᴋ tamattoma assianut, tautugviginiartarnut tâpkoninga; ungardlinginik kissênik tautuᴋovlutit, iluengarningillo takonagit; tagvangallo pivlunga ôminarsijauᴋokit.

¹⁴ Apâlo annelingmut Zofime, ᴋaᴋᴋab Pisgab ᴋângane, tunerguserviliorlunelo sevenenik, tunerguserpoᴋ tuktuvangmik angusâlormiglo tamaine.

¹⁵ Bâlakemullo oᴋarpoᴋ: Nangilerit tunergutivît ôtâb seniane, ikungarniartilunga Nâlegaᴋ pâgomavlugo.

¹⁶ Nâlekablo Bâlaam pârpâ, pititsivorlo oᴋausermik ᴋaninganut, oᴋarlunelo: Uterit Bâlakemut, imâglo oᴋauseᴋarit.

¹⁷ Tikipâlo, ahâglo, tâmna nangerpoᴋ tunergutime ôtâb seniane, Moabiblo angajoᴋângit ilagilugit. Bâlakiblo oᴋautivâ: Sumik Nâlegaᴋ oᴋarᴋâ?

¹⁸ Imgerutinelo isuᴋsivâ, oᴋarlunelo: Makitit, Bâlak, tusarlutillo: nâlalaunga, Zipporib erninga;

¹⁹ Gûde inôlungilaᴋ saglosômik, erniolungilarlo inungmut ᴋaᴋialersômik: oᴋarsimangilâᴋ, piniarnialungilaûglô? Oᴋauseᴋalauᴋâlônêt nelautsitinialungitaminîk?

²⁰ Ahâk, saimartitsiᴋojauvunga: tâmnalo saimartitsisimavoᴋ, uvangalo oggotitsungnangilara.

²¹ Idluitomik takolungilaᴋ Jakokune, tatitosarnermiglônêt Israêlikune: Nâlegaᴋ Gûdinga tâpsomanêpoᴋ, ataniublo ᴋaggudlarutauninga tâpkoa akornganêpoᴋ.

²² Gûdib aularutivait Egiptenemit, nukkeᴋarpoᴋ tuktuvaub nujoartûb nukkingatut.

²³ Jakokut angakoᴋtortaujungnangilat, Israêlikullo nelautainerluktaujungnangilat: Neliuningane oᴋartoᴋalârpoᴋ Jakokut Israêlikullo pivlugit: Tagga Gûdib tatamnartuliningit!

²⁴ Ahâk, inugiartoᴋsuit nikoptiput loevetut arnatut, loevetullo makitatsiarput; aᴋopiniangilat nerriᴋârtinagit aᴋsârnigamingnik, imerᴋârtinagillo toᴋotab aunganik.

²⁵ Bâlakiblo Bâlaam oᴋautivâ: Ahâk, ôminarsijauᴋoniarnagit, saimausertauᴋoniarnagillônêt.

²⁶ Kiovlunelo Bâlaamib Bâlak oᴋautivâ: Oᴋautilaungilagît, oᴋarlunga: Nâlekab oᴋautigijangit tamaita piniaraksarivakkâ?

²⁷ Bâlakiblo Bâlaam oᴋautivâ: ᴋailaurit, tamattoma assianut âniarpagit; imaᴋa Gûdib idluariniarpâ ôminarsijauᴋoniarangne pivlunga tagvangat.

²⁸ Bâlakiblo Bâlaam âpâ Peorib ᴋânganut, takonârviksaujomut sunaᴋajuitomik.

²⁹ Bâlaamiblo Bâlak oᴋautivâ: Pivlunga tunerguserviliorlaurit sevenenik tamâne, tuktuvangniglo sevenenik angusâlungniglo sevenenik âᴋiksoilaurit.

³⁰ Bâlakelo piniarpoᴋ sôrlo Bâlaamib oᴋautingmago, tunerguservingnelo tamaine atunit tunerguserpoᴋ tuktuvangmik atautsemik angusâlormiglo atautsemik.