Numbers 22 - Labrador Inuttitut Heritage Bible

¹ Israelikullo ingergalerivut tangmârterlutiglo Moabib naternangine Jordanib akkiane Jerikome.

² Balakiblo, Zipporib erningata, Israêlikut piniarnerijangit tamaita Amorikunik ulernaigivait.

³ Moabiblo inugiartoᴋsuit erᴋsigidlarpait unuktoᴋsôngmatta; Moabelo kapiasudlarpoᴋ Israêlikut pivlugit.

⁴ Moabiblo Midianib angajoᴋângit oᴋautivait: Inugiartoᴋsuit makkoa avatiptingnêtut tamaita ipparniarpait, sôrlo tuktuvaub iviksukat perorsêvingmêtut ipparmagit. Bâlakelo, Zipporib erninga, ataniolauᴋpoᴋ Moabeme neliutome taipsomane.

⁵ Tiliklerporlo aᴋpârtuksanik Bâlaamemut, Beorib erninganut, nunamêtomut Pêtoreme, kôb senianêtomut, inôᴋatime ᴋitorngangita nunanganut, ᴋaiᴋojauᴋovlugo, oᴋarlutik: Ahâk, inugiartoᴋsuit tamaungarsimavut Egiptenemit; ahâk, nunab ᴋânga ulikpât, iniᴋarpullo ittivimne;

⁶ Taimaimat ᴋailaurittôᴋ, inugiartoᴋsuillo tâpkoa ôminarsijauᴋokit pivlunga; pitsartuᴋijarigapkit; imaᴋa sâlaᴋarajarpunga annaudlarlugillo ungumalugillo nunamit; ᴋaujimagama saimartitatit saimartitaungmatta, ôminarsijauᴋojatillo ôminarsijaungmatta.

⁷ Moabiblo angajoᴋângit Midianiblo angajoᴋângit aularᴋatigêkput angakonerub akiksarijangit neksarlugit; tikipullo Bâlaamemut oᴋautilugolo Bâlakib oᴋausinginik.

⁸ Tâpsomalo oᴋautivait: Siniktartuinaritse unnuarme tamattomane, oᴋautijartulârpapselo, sôrlo Nâlekab oᴋautingmanga; Moabiblo angajoᴋângit siniktarput Bâlaameme.

⁹ Gûdiblo Bâlaam tikipâ, oᴋautilugolo: Angutît ukkua ilingnêtut kikôrᴋât?

¹⁰ Bâlaamiblo Gûde oᴋautivâ: Bâlakib, Zipporib erningita, Moabib ataningata, tiliklervigivânga, oᴋarlune:

¹¹ Ahâk, inugiartoᴋsuit Egiptenemit tikisimajut nunab ᴋânga ulikpât; ᴋailaurittôk, pivlungalo ôminarsijauᴋokit; imaᴋa sorᴋsugvigijungnarajarpakka ungumalugillo.

¹² Gûdiblo Bâlaam oᴋautivâ: Ilaujuksaungilatit tâpkonunga; inuit tâpkoa ôminarsijauᴋojaksaringilatit; saimartitaungmatta.

¹³ Bâlaamelo makipoᴋ uvlâkut, Bâlakiblo angajoᴋângit oᴋautilugit: Nunapsingnut uteritse: Nâlekab ilauᴋolungimanga ilipsingnut.

¹⁴ Moabiblo angajoᴋângit makiput, Bâlakemullo aivut oᴋarpullo: Bâlaam ilaujomangilaᴋ uvaptingnut.

¹⁵ Bâlakelo angajoᴋânik tâpkoa assinginik, ununersaniglo, erᴋarnarnersaniglo tâpkonangat, tiliklilerivoᴋ.

¹⁶ Tâpkoalo Bâlaamm tikipât; oᴋautilugolo: Imâk oᴋarpoᴋ Bâlak, Zipporib erninga: Sunamullônêt tikitailititauniarnaktôᴋ uvamnut,

¹⁷ Angijomik opigidlaromagapkit, oᴋautigijallo uvamnut piniaromavara; taimaimat ᴋailaurittôᴋ, pivlungalo inuit ukkua ôminarsijauᴋokit.

¹⁸ Kiovlunelo Bâlaamib Bâlakib kivgangit oᴋautivait: Bâlakib tunitjiviginajarpanga iglominik tatatomik silberemik goldemiglo, Nâlekab Gûdima oᴋausingita ungatânôrungnangilanga, mikinersamiglônêt anginersamiglônêt piniaromavlunga.

¹⁹ Taimaimat siniktarmititse unnuarme tamattomane, ᴋaujiᴋovlunga sumik Nâlegaᴋ oᴋarniarmangât suli uvamnut.

²⁰ Gûdiblo unnuarme Bâlaam tikipâ, oᴋautilugolo: Angutit tikisimakpatta ᴋaiᴋolutit, makigit, ilagilugillo; oᴋauserle oᴋauserilârtara ilingnut kissiane, piniaraksarivat.

²¹ Bâlaamelo makipoᴋ uvlâkut, siutiᴋortojonelo iksivaviktârpâ, iluavlunelo Moabib angajoᴋânginut.

²² Gûdelo ningarsartauvoᴋ ilaungmat: Nâlekablo engelinga nangeriartorpoᴋ apᴋosinerme, agviaromavlugo. Siutiᴋortojonelo ikimavigivâ, kivgângnelo maggûk ilagivâk.

²³ Siutiᴋortojûblo Nâlekab engelinga nangertoᴋ apᴋosinerme takovâ, saviksoane amujaᴋ tigumiarlugo; siutiᴋortojorlo senervarpoᴋ apᴋosinermit, perorsêvingmullo aivoᴋ; Bâlaamiblo siutiᴋortojoᴋ annauvâ, apᴋosinermut aititsomavlugo.

²⁴ Tagva Nâlekab engelinga nangeriartorpoᴋ apᴋosinerme itterlerme, perorsêvîk vaineliksatalîk akorngangne, iglotut avalulingme.

²⁵ Siutiᴋortojûblo Nâlekab engelinga takovâ, avalunullo tetjarlune, Bâlaamib itigangit sêmikpait avalunut; tâpsomalo annaulerivâ.

²⁶ Nâlekablo engelinga sivumualerivoᴋ, nangerporlo inime nerrokitome, sanguviksaᴋangitome talerpingmullônêt saumingmullônêt.

²⁷ Siutiᴋortojûblo Nâlekab engelinga takovâ, aᴋᴋopivorlo Bâlaamib atâne; Bâlaamelo ningadlarpoᴋ, siutiᴋortojorlo annaudlarpâ annautaminut.

²⁸ Nâlekablo siutiᴋortojûb ᴋaninga angmarpâ, tâpsomalo Bâlaam oᴋautivâ: Sumik piniarvigivagît pingasuertorlutit annaudlaramgâ?

²⁹ Bâlaamiblo siutiᴋortojoᴋ oᴋautivâ: Mitautigigamga saviksoaᴋatuaruma aggamne toᴋodlarajarpagit.

³⁰ Siutiᴋortojûblo Bâlaam oᴋautivâ: Siutiᴋortojoᴋutigilungilarmâ, inôsit nâvlugo uvlome tikidlugo ikimavigijât? Taimailiorvigivakpagît? Kiovorlo: Aukak.

³¹ Nâlekablo Bâlaamib ijîgik uitatipak, tâpsomalo Nâlekab engelinga nangertoᴋ apᴋosinerme, saviksoarmik tigumiarlune, takovâ; okolunelo pâmakterpoᴋ.

³² Nâlekablo engelingata oᴋautivâ: Sugavît siutiᴋortojoᴋotit pingasuertorlutit annaudlarᴋiûk? Agviariartorpagit, apᴋotit idluidlarmat sâmne;

³³ Siutiᴋortojûblo takovânga, pingasuertorlunelo nigorpânga: nigolaungipanga ingergainaᴋ toᴋonajalauᴋpagit, siutiᴋortojorlo inôtilugo.

³⁴ Bâlaamiblo Nâlekab engelinga oᴋautivâ: Idluitulidlarpunga, ᴋaujilunginama nangeravit apᴋosinerme agviaromavlunga: ᴋuviagilungikungne, angeraromavunga.

³⁵ Nâlekablo engelingata Bâlaam oᴋautivâ: Angutit ilagikit; oᴋauserle oᴋauserilârtara ilingnut kissime oᴋauserilârpat. Taimaimat Bâlaamib Bâlakib angajoᴋângit ilagivait.

³⁶ Bâlakelo tusarame Bâlaamib tikilerninganik, pagreariartorpâ Moabib iglugasaksoangita ilanganut, Arnonib erᴋânêtomut, tamanna kiglingita ungardlerpânganêpoᴋ.

³⁷ Bâlakiblo Bâlaam oᴋautivâ: Katsungaivlunga tiliklervigilaungilagît ᴋaiᴋolutît? Suna pivlugo ᴋailaungilatît uvamnût? Opigidlarlutit saperasugivingâ?

³⁸ Bâlaamiblo Bâlak oᴋautivâ: Ahâk, tikidlarpagit: pitsartuneᴋarᴋêgle sumiglônêt oᴋauseᴋarlungâ? Oᴋauseᴋ Gûdib pititanga ᴋanimnut, tamanna oᴋauserijaksarivara.

³⁹ Bâlaamelo ilauvoᴋ Bâlakemut, tikipullo Kiriat-Huzotemut.

⁴⁰ Bâlakelo tunerguserpoᴋ tuktuvangnik saukaniglo, tiliklerporlo Bâlaamemut angajoᴋaujunullo tâpsoma ilagijanginut.

⁴¹ Uvlângolermallo Bâlakib Bâlaam aiparivâ tikiutilugolo Bâalib poᴋtoninganut, tagvangallo takonârpoᴋ inugiartoᴋsoarnik ungardlerpânik.