Numbers 20 - Labrador Inuttitut Heritage Bible

¹ Israelikullo ilagêktoᴋsuit iluengartut tikiput sunaᴋajuitomut Zinemut taᴋᴋit sivorlerpângane: inugiartoᴋsuillo tangmârput tagvane; Mirijamelo tagvane toᴋovoᴋ, tagvanelo iluvertauvoᴋ.

² Ilagêktoᴋsuillo imeᴋangilat; katilerpullo Mosesemut Aronemullo.

³ Inugiartoᴋsuillo akkerartorput Mosesemut, oᴋarlutiglo: Sinaungamêk toᴋoᴋataulaunginapta ᴋatangutivut toᴋomatta Nâlekab sângane.

⁴ Sôᴋ Nâlekab ilagêktoᴋotingit âkigît sunaᴋajuitomut omunga, toᴋoᴋovluta tamâne, uvagut nergjutivullô?

⁵ Sôklo aulartilauᴋpitigût Egiptenemit, tikiutilutalo nunâlungmut tamattomungâ? Karngasoiviksaᴋangilaᴋ, paungatannaᴋangilaᴋ, vaineliksataᴋangilaᴋ, paungatsiaᴋangilarlônêt; imeᴋangilarlônêt imiksamik.

⁶ Moseselo Aronelo aivuk katimajut najorninginit ilagêktut tupingata upkoanganut, pâmakterpuglo; Nâlekablo ânanauningata saᴋᴋervigivak.

⁷ Nâlekablo Mosese oᴋarvigivâ, oᴋarlune:

⁸ Ajaupiaᴋ tiguleruk, ilagêktoᴋsuillo katimatikit, igvit angajuillo Aron, oᴋarillo ᴋairtomut tâpkoa takkoane, saᴋᴋijârtitsiᴋovlugo imermik; tâpkonungalo saᴋᴋijârtitsiniarpotit imermik ᴋairtomit; taimaglo ilagêktoᴋsuit nergjuteᴋotingillo tunitjiviginiarpatit imiksamik.

⁹ Mosesiblo ajaupiaᴋ tiguvâ Nâlekab sânganit, sôrlo tâpsoma perᴋolaungmago.

¹⁰ Mosesiblo Aroniblo ilagêt katimatipait ᴋairtûb sângane, oᴋautivaillo; Okoᴋse, tapatojoᴋsôjose, imeᴋ saᴋᴋijârtitaksarivitigô ᴋairtomit omangât?

¹¹ Mosesiblo aggane isakpait, ᴋairtorlo annauvâ maggoertorlune ajaupiaminut, imerlo kâlerpoᴋ amigangitomik, ilagêktoᴋsuillo imerput, nergjuteᴋotingillo.

¹² Nâlekablo Moseselo Aronelo oᴋautivâk: Okpervigilaunginaptinga ivlernartitauᴋovlunga Israêlib ᴋitorngangita ijingita sângine, tamanna pivlugo ilagêktoᴋsuit ukkua tikiutijaksarilungilatik nunamut tunijamnut tâpkonunga.

¹³ Tamadja akkerartornerûb imangit; Israêlikut Nâlegaᴋ akkerartormatsuk, tâmnalo ivlernartitaungmat tâpkonane.

¹⁴ Mosesiblo aᴋpârtuksat tilivait Kadesemit Edomib ataninganut: Imâk oᴋarpoᴋ ᴋatangutît Israêle, ᴋaujimavotit siorniornernik tamainik tikitigijaptingnik;

¹⁵ Atâtagilauᴋtavut atersârmatta Egiptenemut, akunillo nunaᴋalaurapta Egipteneme; Egiptenemiullo pikalugvigilauᴋpâtigut, uvagut atâtavullo;

¹⁶ Nâlegarlo nipliavigilauraptigo, nippivut tusarpait, engelelo tilivâ, tikiutitilutalo Egiptenemit; ahâglo, Kadesemêpogut, iglugasaksoarne nunavit erᴋâta kiglingane;

¹⁷ Nunat apᴋutigilaulavuttôᴋ; perorsêviglônêt vaineliksataliglônêt ingergarvigijomangilavut, imeᴋtoromangilagullônêt imeᴋtarviᴋotivît imanginik; ataniûb apᴋotiksauᴋojangagôromavogut kissiane, saumingmullônêt talerpingmullônêt sangujomangilagut, ᴋângerᴋârtinata nunaᴋotivît kiglinganik.

¹⁸ Ediomble oᴋautivâ: Uvapkôrtuksaungilatit, pagrearᴋonanga ilingnik saviksoalijarlunga.

¹⁹ Israêliblo ᴋitorngangita oᴋautivât: Apᴋosineâlukut kissiane majoraromavogut; imeᴋtarvingmillo imerupta, uvanga nergjuteᴋotikalo, akkigijanganik tunitjijomavogut; assianik sumiglônêt pininiaromangilagut, pisugvigijomatuinarpavut.

²⁰ Oᴋarporle: Tamaunârtuksaungilatit. Edomiblo pagrearpâ inulijarlune unuktunik, aggangnullo pitsartudlartunut.

²¹ Taimâk Edomib Israêle ingergartailitipâ nunamigut; taimaimat Israêle sanguvoᴋ tâpsomangat.

²² Aularpullo Kadesemit; Israêlikullo, ilagêktoᴋsuit iluengartut, tikiput ᴋaᴋᴋamut Horemut.

²³ Nâlekablo Mosese Aronelo oᴋarvigivak Horeme, Edomib nunangata erᴋâne, oᴋarlune:

²⁴ Aron ilaliudjaujuksauvoᴋ inuᴋotiminut, itertuksaungimat nunamut tunijamnut Israêlikunut, oᴋausikka tapagilaurapsigik imine akkerartorvingne.

²⁵ Aron erningalo Eliasare ilagikik majorarᴋatigilugiglo ᴋaᴋᴋamut Horemut;

²⁶ Aroniblo annorângit pêjarkit atijautilugillo erninganut Eliasaremut; Aronelo sivorliminut ilaliudjaulârpoᴋ, tagvane toᴋovlune.

²⁷ Moseselo piniarpoᴋ sôrlo Nâlegaᴋ perᴋojingmat; ᴋaᴋᴋamullo majorarput ilagêktoᴋsuit ilûnatik takkoane.

²⁸ Mosesiblo Aron annorairpâ, atijautilugillo erninganut Eliasaremut; Aronelo inôjungnaipoᴋ tagvane ᴋaᴋᴋab ᴋângane; Moseselo Eliasarelo atersârpak ᴋaᴋᴋamit.

²⁹ Ilagêktoᴋsuillo ilûnatik takomatta Aron toᴋungmat, ᴋeavât uvlunik 30nik, Israêlikut ilûnatik.