Numbers 2 - Labrador Inuttitut Heritage Bible

¹ Nâlekablo Mosese Aronelo oᴋarvigivak, oᴋarlune:

² Israêlib ᴋitorngangit tangmârtertuksauvut atunit saimateᴋotimingne, atâtamik ingmikôrtartungita saimateᴋotingane; tupiub kigligiutjineᴋtaliub akiane avatâne tangmârtertuksauvut.

³ Tangmârtertullo unane, seᴋiniub nuivinga sângalugo, Judakut tangmârvingata saimatinganut ilingajuksauvut, katimgajoᴋotitik maliklugit; Nahsonelo, Amminadab erninga, angajoᴋaujuksauvoᴋ Judakune.

⁴ Tâpsomalo katimgajoᴋotingit kititaumajut 74,600ovut.

⁵ Tâpkoalo sillaleᴋartuksauvut Isassarekunik, Netanelelo, Zuarib erninga, angajoᴋaujuksauvoᴋ Isassarekune;

⁶ Tâpsomalo katimgajoᴋotingit kititaumajut 54,400ovut.

⁷ Tâpkoalo avatâne Sebulonekut; Elialo, Helonib erninga, angajoᴋaujuksauvoᴋ Sebulonekune;

⁸ Tâpsomalo katimgajoᴋotingit kititaumajut 57,400ovut.

⁹ Tagva ilûnatik kititaumajut Judakut tangmârviksaᴋotinganut ilingajut 186,400ovut, katimgajoᴋotingit maliklugit; tâpkoa sivorliovlutik ingergartuksauvut.

¹⁰ Rubenekut tangmârvingata saimatingat âne seᴋernganêtuksauvoᴋ, katimgajoᴋotingit maliklugit, Eliserelo, Sedeurib erninga, angajoᴋaujuksauvoᴋ Rubenekune;

¹¹ Tâpsomalo katimgajoᴋotingit kititaumajut 46,500ovut.

¹² Sîmeonekullo tangmârtertuksauvut tâpkoa tungâne, Selumielelo, Surisadaib erninga, angajoᴋaujuksauvoᴋ Simeonekune;

¹³ Tâpsomalo katimgajoᴋotingit kititaumajut 59,300ovut.

¹⁴ Gadekullo; Eliasafelo, Deuelib erninga, angajoᴋaujuksauvoᴋ Gadekune;

¹⁵ Tâpsomalo katimgajoᴋotingit kititaumajut 45,650ovut.

¹⁶ Tagva ilûnatik kititaumajut Rubenekut tangmârviksaᴋotinganut ilingajut 151,450ovut; katimgajoᴋotingit maliklugit. Tâpkoa kingorliovlutik ingergartuksauvut.

¹⁷ Tapkoalo maliklugit Levikut tangmârvinganut ilingajut, tupegilutik kigligiutjineᴋtalingmik, ingergartuksauvut, akkuliovlutik katimgajoᴋsoane; sôrlo tangmârteramik taimâk ingergartuksauvut, atunit inigijaksamingne, saimateᴋotimik nelâne.

¹⁸ Kangianetuksauvok Efraimekut tangmârvingata saimatingat, katimgajoᴋotingit maliklugit, Elisamalo, Ammihudib erninga, angajoᴋaujuksauvoᴋ Efraimekune.

¹⁹ Tâpsomalo katimgajoᴋotingit kititaumajut 40,500ovut.

²⁰ Manassekullo tâpkoa tungânêtuksauvut, Gamalielelo, Pedasurib erninga, angajoᴋaujuksauvoᴋ Manassekune;

²¹ Tâpsomalo katingajoᴋotingit kititaumajut 32,200ovut.

²² Benjaminekullo; Abidanelo, Gideonib erninga, angajoᴋaujuksauvoᴋ Benjaminekune;

²³ Tâpsomalo katingajoᴋotingit kititaumajut 35,400ovut.

²⁴ Tagva ilûnatik kititaumajut Efraimekut tangmârviksaᴋotinganut ilingajut 108,100ovut, katingajoᴋotingit maliklugit. Tâpkoa kingorlerêklutik ingergartuksauvut.

²⁵ Tagganetuksauvok Danekut tangmârvingata saimatingat, katingajoᴋotingit maliklugit, Ahieserelo, Ammisadaib erninga, angajoᴋaujuksauvoᴋ Danekune.

²⁶ Tâpsomalo katingajoᴋotingit kititaumajut 62,700ovut.

²⁷ Asserekullo tangmârtuksauvut tâpkoa tungâne; Pagielelo, Okranib erninga, angajoᴋaujuksauvoᴋ Asserekune;

²⁸ Tâpsomalo katingajoᴋotingit kititaumajut 41,500ovut.

²⁹ Naftalikullo; Ahiralo, Enanib erninga, angajoᴋaujuksauvoᴋ Naftalikune;

³⁰ Tâpsomalo katingajoᴋotingit kititaumajut 53,400ovut.

³¹ Tagva ilûnatik kititaumajut Danekut tangmârviksaᴋotinganut ilingajut 157,600ovut. Tâpkoa kingorlerpauvlutik ingergartuksauvut, saimateᴋotimik nelâne.

³² Tapkoangovut Israêlib ᴋitorngangit kititaumajut atâtagijamik ᴋitorngarêngningit maliklugit; tangmârvingnut ilingajut katingajoᴋotingit maliklugit kititaumajut 603,550ovut.

³³ Levikulle kititaulungilat Israêlib ᴋitorngangit akorngane; sôrlo Nâlekab Mosese perᴋolaungmago.

³⁴ Taimailiorput Israêlib ᴋitorngangit; Nâlekab perᴋojangit tamaita Mosesemut maliklugit, taimâk tangmârterput saimateᴋotimingne, taimaglo ingergarput, atunit kinguvârêngnermingne, atâtamik ᴋitorngarêᴋotingit maliklugit.