Numbers 19 - Labrador Inuttitut Heritage Bible

¹ Nâlekablo Mosese Aronelo oᴋarvigivak, oᴋarlune:

² Tamadja maligaksat ilutsingat, Nâlekab perᴋojanga, oᴋarlune: Israêlikut oᴋautikit âtsiᴋovlugit ilingnut tuktuvangmik aupaluktomik piodlarmariktomik ᴋanoetoᴋangimariktomik nangmautemiglo atulaungitomik suli;

³ Tunijaksarivaselo Eleasaremut ajoᴋertuijomut, tâpsomalo âtaksarivâ tangmârviub avatânut, toᴋotsijoᴋartuksauvorlo tâpsominga tâpsoma takkoane;

⁴ Eleasariblo ajoᴋertuijûb tâpsoma aungata ilanga tigujaksarivâ tikkerminut serparsautigilugolo sevenertorlune ilagêktut tupingata sânganut;

⁵ Tuktuvaglo ôtitaujuksauvoᴋ tâpsoma takkoane, aminga, nerᴋingalo, aungalo, anangalo ôtitaksarivait;

⁶ Ajoᴋertuijorlo tigusijuksauvoᴋ ᴋejungmik Sideremik, isupiniglo (ᴋesertutinik), aupaluktamiglo (merᴋolingmik), egilugillo tuktuvangmut ôtitaulertomut.

⁷ Tungânelo ajoᴋertuijûb annorâne ergortoraksarivait, timinelo ubvarlugo imermut, ivsornarniarlunelo unnuk tikidlugo.

⁸ Otitsijûblo tâpsominga annorâne ergortoraksarivait imermut, timinelo ubvarlugo imermut, ivsornarniarlunelo unnuk tikidlugo.

⁹ Angutiblo ivsornaitûb argjat tuktuvangmit katitaksarivait ililugillo salumaitoᴋangitomut tangmârviub avatâne, ᴋomergutauniarpullo kigligiutsiᴋovlugit Israêlikut ilagêktoᴋsôningit pivlugit, atoraksauᴋovlugit sujungailisautiksamut; tunergutiksauvoᴋ ajortoêrutiksaᴋ.

¹⁰ Katersijûblo tuktuvaub argjanginik annorâne ergortoraksarivait, ivsornarniarlunelo unnuk tikidlugo. Tamannalo maligaksaujuksauvoᴋ soᴋosijuitoᴋ Israêlikunut takorngartanullo tâpkoa akorngane nunaᴋaturnut.

¹¹ Inuk toᴋungajûb timinganik aktoajoᴋ ivsornarniarpoᴋ uvlunik sevenenik;

¹² Tâmna sujungaitituksauvoᴋ nangminerminik tamattomunga uvlut pingajuane, uvlullo seveningane, tagva ivsornainiarpoᴋ; sujungaitilungikunele nangminerminik uvlut pingajuane uvlullo seveningane ivsornainiangilaᴋ.

¹³ Aktoajoᴋ inûb toᴋungajûb timinganik sujungaitiluganelo nangminerminik, sujuivoᴋ Nâlekab tupinganik; taimaitorlo avitaujuksauvoᴋ Israêlikunit; imeᴋ sujungailisautiksaᴋ serparsautaulaungimat tâpsomunga, ivsornarniarpoᴋ; ivsornarninga tâpsomanêpoᴋ suli.

¹⁴ Tamadja maligaksaᴋ inuk inojungnaipat tuperme; ilûnatik itertut tupermut, tupermêtullo ilûnatik ivsornarniarput uvlunik sevenenik.

¹⁵ Pôllo ilûnatik angmajut ᴋelaksimajunik mattoᴋangitut, ivsornarniarivut.

¹⁶ Silamelo aktoajoᴋ toᴋotaumajomik saviksoarmut, ingminiglônêt toᴋolauᴋtomik, inûblônêt sauninganik, iluvermiglônêt, ivsornarniarpoᴋ uvlunik sevenenik.

¹⁷ Ivsornartorlo pivlugo tigusijuksauvut argjat tunergutaumajûb ajortoêrutiksab ôtitauninganit pijut ilanginik, koverilugillo imermik ômanartomik ᴋajûtarme;

¹⁸ Inuglo ivsornaitoᴋ tigusiniarpoᴋ isupinik (ᴋesertutinik) missuklugillo imermut, serparsautigilugolo tupermut perᴋutinginullo, inungnullo tagvanêlauᴋtunut, tâpsomungalo aktoalauᴋtomut saunermik, toᴋotaujomiglônêt, ingminiglônêt toᴋolauᴋtomik, iluvermiglônêt;

¹⁹ Ivsornaitûblo ivsornartoᴋ serparsaraksarivâ uvlut pingajuane seveninganelo; uvlullo seveningane sujungaitiniarpâ; annorânelo ergortoraksarivait, ubvarlunelo nangminerminik imermut, unnukpallo ivsornailârpoᴋ.

²⁰ Inugle ivsornartitaujoᴋ sujungailungitorlo nangminerminik, tâmna avitaujuksauvoᴋ ilagêktunit, Nâlekab ivsornaitoviᴋotinga sujungmago; imeᴋ sujungailisautiksaᴋ serparsautaulaungilaᴋ tâpsomunga; ivsornarpoᴋ.

²¹ Tamanna maligaksauvoᴋ soᴋosijuitoᴋ tâpkonunga; serparsaijûblo imermut sujungailisautiksamut annorâne ergortoraksarivait; aktoajorlo imermik sujungailisautiksamik ivsornarniarpoᴋ unnuk tikidlugo.

²² Ivsornartûblo aktortangit ilûnatik ivsornarniarput; aktoajorlo tâpkoninga ivsornarniarpoᴋ unnuk tikidlugo.