Numbers 17 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlikut oᴋarvigikit, tigusivigilugillo ajaupianik, atâtamik kinguvârênginit tamainit atautsemik, angajoᴋânginit tamainit atâtamik kinguvârêngit maliklugit, tagva ajaupianik 12nik; angutillo ilûnatik atingit aglakit atunit ajaupiaᴋotiminut.

³ Aroniblo atinga aglagaksarivat Levib ajaupianganut, atâtangita ᴋitorngarêngningita angajoᴋângit atunit ajaupiaᴋoteᴋartuksaungmatta.

⁴ Torᴋoraksarivatillo ilagêktut tupingane kigligiutjineᴋtaliub sângane, tagvane saᴋᴋijârvigigapse.

⁵ Annerilârtamalo ajaupianga nutaijôlârpoᴋ, Israêlikullo oᴋarnilungningit sâmne sorairtilârpakka, oᴋarniluteᴋarningit iliptingnik.

⁶ Mosesiblo Israêlikut oᴋarvigivait, angajoᴋângitalo ilûnatik tunitjivigivât ajaupianik, angajoᴋât atunit ajaupiamik atautsemik atâtamik kinguvârêngningit maliklugit, tagva ajaupianik 12nik; Aroniblo ajaupianga tâpkoa ajaupiangita akornganêpoᴋ.

⁷ Mosesiblo ajaupiat torᴋorpait Nâlekab sângane kigligiutjineᴋtaliub tupingane.

⁸ ᴋaungmallo Mosese iterpoᴋ kigligiutjineᴋtaliub tupinganut, ahâglo, Aronib ajaupianga Levib kinguvârênginut ilingajoᴋ nutaijôlerpoᴋ, tungujoᴋsilunelo, nuvugulâᴋtârlarmelo, paungatârlarmelo inersimajunik.

⁹ Mosesiblo ajaupiat ilûnaita âpait takamangat Nâlekab sânganit Israêlikunut tamainut; tâpkoalo takonârput, tigusilutiglo atunit ajaupiaᴋotiminik.

¹⁰ Nâlekablo Mosese oᴋautivâ: Aronib ajaupianga utertiuk kigligiutjineᴋtaliub sânganut, piulimajauᴋovlugo nelunaikutaksauvlune pikablâdlartut ᴋitornganginut, sorairtitisiᴋovlugit tâpkoa oᴋarniluteᴋarninginik uvamnik, toᴋoᴋonagit.

¹¹ Moseselo taimailiorpoᴋ, sôrlo Nâlekab perᴋongmago.

¹² Israelikullo oᴋarput Mosesemut, oᴋarlutik: Ahâk, sutairpogut, nungutaksauvogut, nungutaksaumarikpogut.

¹³ Ilûnatik Nâlekab tupingata ᴋanitanganut pijut toᴋolerput; ilûnata toᴋojuksauvitâ?