Numbers 16 - Labrador Inuttitut Heritage Bible

¹ Koralo Itzarib erninga, Kohatib erngutanga, Levib erngutapsânga, Dâtanelo, Abiramelo, Eliab ernîgik, Onelo, Peletib erninga, Rubenib erngutangit, angutinik ilaksarsivut,

² Makitavullo Mosesib sângane, Israêlikut ilangit ilagilugit, tagva angajoᴋât ilagêktoᴋsoarne 250, aulatsiᴋataujuksat, angutit erᴋanartut;

³ Katimavullo Mosesemut Aronemullo oᴋautilugiglo: Piojoriluarpotik, ilagêktoᴋsuit ilûnatik ivsornaimatta, Ilâ, ilûnamaritik, Nâlegarlo tâpkoa akornganêpoᴋ; suna pivlugo tagva angijorortikitîk iliptingnik Nâlekab ilagêktitanginît?

⁴ Mosesiblo tamanna tusaramiuk pâmakterpoᴋ;

⁵ Koralo ilangillo ilûnaita oᴋarvigilugit oᴋautivait: ᴋauppat uvlâkut Nâlegaᴋ nelonaijailârpoᴋ kikut perᴋutigimangâgit, kinalo ivsornaimangât, kikullo najorniᴋojaungmangâta tâpsominga; annerijane, ilâ, najorniᴋolârpâ tâpsominga.

⁶ Imailioritse: Tigusileritse pujôrtitsivipsingnik, Kora ilangillo ilûnatik;

⁷ Ikomatatserlugillo ilijivigilugillo isserluanerutiksamik Nâlekab sângane ᴋauppat; Nâlekablo annerijanga tâmna ivsornainiarpoᴋ; ilipse, Levib erningit, piojoriluarpose.

⁸ Mosesiblo Kora oᴋautivâ: Okoᴋse, ilipse Levib erningit;

⁹ Sunaungitoripisiûk, Israêlib Gûdingata annerilaungmase Israêlikut ilagêktoᴋsôninginit, najorniᴋovluse tâpsominga, kivgartorᴋovluse Nâlekab ivsornaitoviᴋotingane, nangerᴋovluselo ilagêktoᴋsuit sângine kivgartorniarluse tâpkoninga,

¹⁰ ᴋanilertilaungmatillo, igvit ᴋatangutitillo ilûnaita Levib erningit ilagilugît? Ajoᴋertuineroneᴋ pinasuarᴋisiûktauᴋ?

¹¹ Tamanna pivlugo igvit ilagijatillo ilûnatik kativose Nâlegaᴋ akkerartoromavlugo; Aronelo kinauvâ oᴋarnilutigigapsiûk?

¹² Moseselo tiliklerpoᴋ Dâtanelo Abiramelo Eliab ernîgik, ᴋaiᴋojauᴋovlugik, tâpkoale oᴋarpuk: Tagvungaromangilaguk;

¹³ Sunaulungilâᴋ tamaungautigaptigut nunamit imungmik igupsaujârtullo orᴋsuanik kôlingmit toᴋotsomavluta sunaᴋajuitome, mânalo angajoᴋâᴋsoangortitsomavlutit uvaptingnût?

¹⁴ Tikiutilungilaptigullo nunamut imungmik igupsaujârtullo orᴋsuanik kôlingmut, tunitjivigilungilaptigullônêt perorsêvingnik vaineliksatalingniglo kingormgutijaksaptingnik; inuit makkoa ijingit pêjaromavisigîk? ᴋaijomalungilaguk!

¹⁵ Moseselo ningadlalerpoᴋ, Nâlegarlo oᴋautilât: Tâpkoa tunergutingit ilaliorniarnagittôᴋ; siutiᴋortojomik atautsemiglônêt aᴋsârnilauᴋsimangilanga tâpkonangat, neliallônêt idluitomik piniarvigingilara.

¹⁶ Mosesiblo Kora oᴋautivâ: Igvit ilagijatillo ilûnaita Nâlekab sânganôritse ᴋauppat, igvit tâpkoalo Aronelo;

¹⁷ Angutillo ilûnatik atunit tigusilit pujôrtitsivingmingnik, ilijivigilugillo isserluanerutiksamik, atunillo âtsileritse pujôrtitsivipsingnik Nâlekab sânganut, pujôrtitsivingnik 250nik; igvittauᴋ Aronelo atunit pujôrtitsiviptingnik.

¹⁸ Angutillo ilûnatik atunit tigusivut pujôrtitsivingmingnik, ikomatatserlugillo isserluanerutiksarservigilugillo, nangerlutiglo ilagêktut tupingata upkoangane Mosese Aronelo ilagilugik.

¹⁹ Korablo ilagêktut ilagijane katimatipait ilagêktut tupingata upkoangane; Nâlekablo ânanauninga saᴋᴋerpoᴋ ilagêktoᴋsoarnut ilûnainut.

²⁰ Nâlekablo Mosese Aronelo oᴋarvigivak, oᴋarlune:

²¹ Avisâritik ilagêktoᴋsoarnit makkonangat, tagvainârtomik nungutsiᴋovlunga tâpkoninga.

²² Pâmakterpuglo, oᴋarlutiglo: Gûdik, uvinilit ilûnatik anerningita Gûdingat, angut atauseᴋ idluitulingmat, ilagêktoᴋsuit ilûnaita ningaumajârvigijomavigît?

²³ Nâlekablo Mosese oᴋarvigivâ, oᴋarlune:

²⁴ Ilagêktut oᴋarvigikit, oᴋarlutit: Aularitse Korab, Dâtaniblo, Abiramiblo tupersoangata avatânit.

²⁵ Moseselo makipoᴋ Dâtanelo Abiramelo aivigilugik; Israêlikullo angajoᴋângita malikpât.

²⁶ Ilagêktoᴋsuillo oᴋarvigivait, oᴋarlune: Aularitsetoᴋ idluitut makkoa tupinginit, perᴋutingitalo neliallônêt aktorniarasigik, nungutauᴋatauᴋonase tâpkoa idluiningine tamaine.

²⁷ Taimaimat aularput Korab Dâtaniblo Abiramiblo tupersoangata avatânit; Dâtanelo Abiramelo anivuk nangerlutiglo tupîngmik upkoâgingne, nuliatik ernitiglo ᴋitorngatiglo ilagilugit.

²⁸ Moseselo oᴋarpoᴋ: Tamattomûna tukisilârpose Nâlekab tilingmanga piniarᴋovlunga tamakkoninga tamainik; issumamnik pinialunginapkit.

²⁹ Inuit makkoa toᴋolerpatta sôrlo inuit ilûnatik toᴋovangmatta, tikitaukpattalônêt sôrlo inuit ilûnatik tikitauvangmatta; tagva Nâlekab tililungilânga.

³⁰ Nâlegarle pingortitsigune nutâmik, nunablo ᴋanine aitarpago, tâpkoalo, tâpkonungalo ilingajut tamaita, êlugit, ômavlutik kiviᴋovlugit itersâlungmut; tagva tukisilârpose inuit tâpkoa Nâlegaᴋ naggogingmatsuk.

³¹ Sunaubvalo oᴋautsit makkoa tamaita oᴋauserijarêrtuaramigit nuna ᴋoppivoᴋ tâpkoa atâne;

³² Nunablo ᴋanine aitarpâ êlugillo, iglomioᴋatingit inuillo ilûnaita Korab ilagijangit, perᴋutingillo tamaita.

³³ Taimaimat tâpkoa, tâpkonungalo ilingajut tamaita, ômavlutik kivivut itersâlungmut; nunablo sauvait, nipaᴋpullo ilagêktoᴋsuit akornganit.

³⁴ Israêlikullo ilûnatik avatânêtut ᴋemâdlarput tâpkoa nipliadlarninginit; oᴋaramik: Nunab êdlarniarpâtigut.

³⁵ Ikomalo anivoᴋ Nâlekamit, nungutsilunelo angutinik ipkoninga 250nik tunergusertunik isserluanerutiksanik.

³⁶ Nâlekablo Mosese oᴋarvigivâ, oᴋarlune:

³⁷ Eleasar, Aronib ajoᴋertuijûb erninga, katersoiᴋoleruk pujôrtitsivingnik ikitaumajunit, ikomalo siamartiuk ikane, ivsornaingmatta;

³⁸ Idluitulijut ipkoa, inôsermingnik akkilêgiaᴋalauᴋtut idluitulinitik pivlugit, pujôrtitsivingit, katjuktaulillo matuksauᴋovlugit tunerguservingmut; tunergutigilaungmagit Nâlekab sângane, taimaimallo ivsornaiput; kigligiutjutiksaulârpullo Israêlikunut.

³⁹ Eleasariblo ajoᴋertuijûb pujôrtitsivit ᴋaᴋorliojut, ôtaumajut tunergutigijaviningit, tiguvait, katjuklugillo matuksangortipait tunerguservingmut;

⁴⁰ Erᴋaumajutiksauᴋovlugo Israêlikunut, takorngartaᴋ, Aronib kinguvânginit pingitoᴋ, najorniᴋonago isserluanerutitsijomavlune Nâlekab sângane; ilingaᴋonago Koratut ilagijangititullo; sôrlo Nâlekab oᴋautilaungmago Mosesekut.

⁴¹ ᴋaungmalle Israêlikut ilagêktoᴋsôningita ilûnatik Moseselo Aronelo oᴋarnilutivakit, oᴋarlutik: Toᴋoᴋauvase Nâlekab inuᴋotingit.

⁴² Sunaubvalo ilagêktoᴋsuit katimangmatta Mosese Aronelo pikablâvigilugik, takosarput ilagêktut tupinganik, ahâglo, nuvujab ulikpâ, Nâlekablo ânanauninga saᴋᴋerpoᴋ.

⁴³ Moseselo Aronelo aivuk ilagêktut tupingata sânganut.

⁴⁴ Nâlekablo Mosese oᴋarvigivâ, oᴋarlune:

⁴⁵ Nûsâritik ilagêktoᴋsuit akornganit, nungutsiᴋovlunga tâpkoninga tagvainaᴋ. Pâmakterpuglo.

⁴⁶ Mosesiblo Arone oᴋautivâ: Pujôrtitsivit tiguleruk pititsivigilugolo ikomamik tunerguservingmit, ilijivigilugolo isserluanerutiksamik, tuavilutillo ilagêktoᴋsuit aivigikit ulapᴋoserlugillo; ningaumajârneᴋ aningmat Nâlekamit; nusilingnartoᴋ pigiarêrpoᴋ.

⁴⁷ Aronelo tigusivoᴋ sôrlo Mosese oᴋarmat, aᴋpasuklunelo katimajut akornganut, ahâglo, nusilingnartoᴋ pigiarêrpoᴋ inuit akorngane; isserluanerutiksarlo ilivâ, inuillo ulapirᴋsarpait.

⁴⁸ Nangerporlo toᴋungajut inôjullo akorngane, nusilingnartorlo sorairpoᴋ.

⁴⁹ Nusilingnartomullo toᴋojut 14,700ovut, ipkoa toᴋolauᴋtut Korab pijanginut kitinagit.

⁵⁰ Aronelo uterpoᴋ Mosesemut ilagêktut tupingata upkoanganut, nusilingnartorlo sorairpoᴋ.