Numbers 15 - Labrador Inuttitut Heritage Bible

¹ Nalekablo Mosese oᴋarvigivâ, oᴋarlune:

² Israêlikut oᴋarvigikit, oᴋautilugillo: Tikisimagupse nunaᴋutigijomârtapsingnut tunijamnut ilipsingnut,

³ Tunerguseromavluselo ikomakut Nâlekamut, tunergutiksamik ôtaksamik, toᴋotaksamiglônêt angerviviksiorutiksamik, tujutiksamiglônêt, uvloᴋsiorutiksamiglônêt, tipigiksaijomavluse Nâlekamut tuktuvangnillônêt saukanillônêt;

⁴ Tunitjijomajoᴋ tunergutimik, tunitjijuksauvoᴋ Nâlekamut senaugatsiarmik efab tellimaujoanik akusimajomik orᴋsumut hinib sitamaulimajûb sitamanganik;

⁵ Vainemiglo tunergutiksamik imiksamik hinib sitamaulimajûb sitamanganik atuinaruterijuksauvoᴋ, tunergutiksaᴋ ôtaksaᴋ toᴋotaksarlônêt ilagilugo aipiujaksamik saugârsungmut atautsemut.

⁶ Saugarmullo parngnermut aipiujaksamik atuinaruterijuksauvoᴋ tunergutiksamik nerᴋiksamik senaugatsiarmik efab tellimaujôgingnik maggûngnik akusimajomik orᴋsumut hinib pingasôlimajûb pingajuanik;

⁷ Tunergutiksamiglo imiksamik tunitjijuksauvoᴋ vainemik hinib pingasôlimajûb pingajuanik, tipitsiariksautiksamik Nâlekamut.

⁸ Tuktuvangmiglo tunergutiksamik ôtaksamik, toᴋotaksamiglônêt angerviviksiorutiksamik, ᴋujaliutiksamiglônêt atuinaruteriguvit;

⁹ Tuktuvak ilagilugo, tunitjijuksaugivoᴋ tunergutiksamik nerᴋiksamik senaugatsiarmik efab tellimaujunginik pingasunik orᴋsumut hinib abvanganut akusimajomik.

¹⁰ Tunergutiksamiglo imiksamik tunitjijuksauvoᴋ vainemik hinib abvanganik, tunergutiksauᴋovlugo ikomakut, tipitsiariksautiksamik Nâlekamut.

¹¹ Tuktuvait atunit, saukallo parngnit atunit, saugârsuillo angutit atunit, tuktungajullo atunit, taimailiortitaujuksauvut.

¹² Atuinarutaujut unurningit maliklugit, taimailiortuksauvose ilûnatik atunit pivlugit.

¹³ Ilûnatik nuname tamattomane inûlertut taimailiortuksauvut tunerguserunik tunergutiksamik ikomakut, tipitsiariksautiksamik Nâlekamut.

¹⁴ Tujormijarlo nunaᴋalertoᴋ ilipsingne, kinaugaloarmangâllônêt kinguvângoᴋatigêngnipsingne, tunerguseromalerpat tunergutiksamik ikomakut, tipitsiariksautiksamik Nâlekamut; sôrlo ilipse piniarapse, taimailiortuksaugivoᴋ.

¹⁵ Ilusiksaᴋ pitjutigivlugo, tâpsominagatsainaᴋ perᴋojaᴋartuksauvoᴋ ilipsingnullo tujormijanullo ilingajomik, perᴋojaᴋ soraijuitoᴋ kinguvângoᴋatigêngnipsingne; sôrlo ilipse pigapse, taimailingajuksaugivoᴋ tujormijaᴋ Nâlekab sângane.

¹⁶ Perkojaᴋ atauseᴋ ilusioᴋojarlo atauseᴋ ilingajuksauvoᴋ ilipsingnut tujormijanullo ilipsingne nunaᴋartunut.

¹⁷ Nâlekablo Mosese oᴋarvigivâ, oᴋarlune:

¹⁸ Israêlikut oᴋarvigikit, oᴋautilugillo: Tikikupse nunamut tikiutjivigijamnut ilipsingnik,

¹⁹ Nerrigupse niaᴋôjarmik nunab saᴋᴋertanganik, tunergusertuksauvose tunergutiksamik issautijaksamik Nâlekamut.

²⁰ Pubjusiapsingnit sivorlerpâmit tunergusertuksauvose ᴋaᴋᴋôjarmik atautsemik tunergutiksamik issautijaksamik: sôrlo tunergutiksaᴋ issautijaksaᴋ katjugvingmit pijoᴋ issautigapsiuk, taimâk pubjusiaᴋ issautijaksarivase.

²¹ Pubjusiapsingnit sivorlerpâmit tunitjijuksauvose issautijaksamik Nâlekamut kinguvângoᴋatigêngnipsingne.

²² Tammarupselo piniarlugaselo perᴋojanik makkoninga tamainik Nâlekab oᴋautigijanginik Mosesemut,

²³ Tamainik Nâlekab perᴋojanginik Mosesekut, uvlormit Nâlekab perᴋojivigitainartanganit ᴋaijomârtomelo kinguvângoᴋatigêngnipsingne;

²⁴ Piniarutaukpat pijâringitomik ilagêktoᴋsuillo ᴋaujitinagit, ilagêktoᴋsuit tunergusertuksauvut tuktuvârangmik atautsemik tunergutiksamik ôtaksamik, tipitsiariksautiksamik Nâlekamut, tunergutiksaᴋ nerᴋiksaᴋ ilaksanga ilagilugo, tunergutiksangalo imiksaᴋ, perᴋojaᴋ maliklugo, tuktungajomiglo angutimik tunergutiksamik ajortoêrutiksamik.

²⁵ Ajoᴋertuijûblo Israêlikut ilagêktoᴋsôningit ilûnaita ulapᴋoseraksarivait, issumagijungnaiviolârpullo; tammatoviniolaungmat, âtsimattalo tunergutiksamingnik, tunergutiksamik ikomakut Nâlekamut, tunergutiksamingniglo ajortoêrutiksamik Nâlekab sânganut, tammarnitik pivlugo.

²⁶ Israêlikullo ilagêktoᴋsôningit ilûnaita issumagijungnaiviolârput, tujormijarlo tâpkonane nunaᴋartoᴋ, inugiartoᴋsuit pitjutigivlugit piniarutaulaungmat pijâringitomik.

²⁷ Inuglo atauseᴋ idluitulikpat pijâringitomik, tunergusertuksauvoᴋ tuktungajomik arnarmik, atautsemik jârelingmik tunergutiksamik ajortoêrutiksamik.

²⁸ Ajoᴋertuijûblo idluitulijoᴋ ulapᴋoseraksarivâ, pijâringitomik idluitulilerpat Nâlekab sângane, ulapirᴋsartauᴋovlugo; issumagijungnaiviolârporlo.

²⁹ Perᴋojaᴋartuksauvose atausênarmik idluitulijoᴋ pijâringitomik pivlugo, nuname inûlertoᴋ Israêlikut akorngane pivlugo, tujormijarlo akunapsingne nunaᴋartoᴋ pivlugo.

³⁰ Inugle pijârilune tapajoᴋ, nuname inûlertômangât tujormijangongmangâllônêt, tâpsoma Nâlegaᴋ naggogivâ; inuglo tâmna pêjartaujuksauvoᴋ inôᴋatime akornganit.

³¹ Nâlekab oᴋausinga naggogimaringmago, perᴋojangalo tapagilugo, inuk tâmna pêjartaujuksauvoᴋ, idluinine nangmaraksarivâ.

³² Israelikullo sunaᴋajuitomêtilugit naipitsivut angutimik ᴋejungnik kateroijomik Sabbateme.

³³ ᴋejungniglo katersijoᴋ naipitingita âpât Mosesemut Aronemullo ilagêktoᴋsoarnullo tamainut.

³⁴ Parngnanairsimavingmullo pitipât, oᴋautigijaulungimat ᴋanoᴋ piniarviolârmangât.

³⁵ Nâlekablo Mosese oᴋautivâ: Inuk tâmna toᴋotaujuksauvoᴋ; ilagêktoᴋsuit ilûnatik ujarᴋanut miloraksarivât tupersuit avatâne.

³⁶ Ilagêktoᴋsuillo ilûnatik âpât tupersuit avatânut milorlugolo ujarᴋanut, toᴋovorlo; sôrlo Nâlekab Mosese perᴋolaungmago.

³⁷ Nâlekablo Mosese oᴋarvigivâ, oᴋarlune:

³⁸ Israêlikut oᴋarvigikit, nivingasulâliorᴋolugillo annorâmik siningine kinguvângoᴋatigêngnermingne tamaine, nivingasulâllo ᴋolâne siniksaᴋartuksauvut tungujortamik;

³⁹ Nivingasulâᴋutigijaksarivaselo, takonârᴋovluse tâpkoninga erᴋailuselo Nâlekab perᴋojanginik tamainik, piniarlugillo; arvertarᴋonaselo ômatise ijiselo maliklugit, tâpkoa atorapsigik assiniaromavluse;

⁴⁰ Erᴋaiᴋovlusele piniarᴋovluselo perᴋojamnik tamainik, ivsornaiᴋovluselo Gûdipsingnut.

⁴¹ Uvangaugama Nâlegaᴋ Gûdise, tikiutitise nunamit Egiptenemit, Gûdeojomavlunga ilipsingnut; Uvangauvunga Nâlegaᴋ Gûdise.