Numbers 14 - Labrador Inuttitut Heritage Bible

¹ Ilagektoksuillo ilûnatik nipliadlarput ᴋaggudlarlutiglo; unnuarmelo tâpsomane inuit ᴋeadlarput.

² Israêlikullo ilûnatik oᴋaluᴋivut Mosesemut Aronemullo; ilagêktoᴋsuillo ilûnatik oᴋautivakit: Sinaungamêk toᴋolaunginapta Egipteneme! Sinaungamêglônêt toᴋolaunginapta sunaᴋajuitome tamattomane!

³ Imaglo: Suna pivlugo Nâlekab tikiutitipâtigût nunamut tamattomunga, saviksoarmut oggotitauᴋovlutâ? Arnavut ᴋitorngavullo aᴋsârnigaulârput; nakornersaulungilâᴋ uterupta Egiptenemût?

⁴ Oᴋaᴋatigêkpullo: Aulatsijuksamik annerosulerta uterlutalo Egiptenemut.

⁵ Moseselo Aronelo kênatik pûlugik pâmangavuk Israêlikut ilagêktoᴋsuit katimajut ilûnatik sângine,

⁶ Josualo, Nunib erninga, Kâlelo, Jefunib erninga, nunamik nautsertoriartulauᴋtut ilâgik, aliktuivuk annorângmingnik;

⁷ Israêlikullo ilagêktoᴋsôningit oᴋarvigilugit aᴋautivait: Nuna ingergarvigilauᴋtavut nautsertoromavlugo nunatsiangodlarpoᴋ.

⁸ Nâlekab ᴋuviagikpatigut tikiutitiniarpâtigût nunamut tâpsomunga, tunilugolo uvaptingnut, nuna kôlik imungmik igupsaujârtullo orᴋsuanik.

⁹ Kissiane Nâlegaᴋ pikablâviginiarasiuk, nunablo inungit erᴋsiginiarasigik; nerᴋiksatôjârmatta uvaptingnut; saputjauviksaᴋarungnaiput, Nâlekable ilagivâtigut; erᴋsiginiarasigik.

¹⁰ Ilagêktoᴋsuille ilûnatik millortauᴋovakit ujarᴋanut. Nâlekablo ânanauninga saᴋᴋijarpoᴋ Israêlikunut tamainut ilagêktut tupingane.

¹¹ Nâlekablo Mosese oᴋautivâ: Kanoᴋ akunertigijomik inuit tamakkoa naggoginiarpângâ? Kanorlo akunertigijomik okperomangilât uvamnût, tatamnartut piniarnerijakka tâpkoa akorngane pigaloartilugît?

¹² Nusilingnartomut annaudlaromavakka kingormgujijuksaujungnaitilugillo, inôᴋatigêksoangortitsijomavungalo ilingnit anginersaujunik sôngonersaujuniglo tâpkonangat.

¹³ Mosesiblo Nâlegaᴋ oᴋautivâ: Egiptenemiut tagva tusalârput tamattominga; tâpkoa akornganit inuit tamakkoa tamaungautilaurangne pitsartunernut;

¹⁴ Tâpkoalo unipkautigilârpât nunab tamattoma inunginut, tusaumajunut igvit Nâlegaᴋ inuit ukkoa akornganêgavit; igvit Nâlegaᴋ takojaugavit kênarmit kênarmut, nuvujaᴋotivillo ᴋolangiarpait, igvit sivorlerpatit nuvujakut napajokut uvlôtilugo, ikomakullo napajokut unnuarme.

¹⁵ Mânalo inugiartoᴋsuit makkoa toᴋonajarungne angutitut atausertut, inôᴋatigêksuit tusaumajut nertornautingnik oᴋaromârput, oᴋarlutik:

¹⁶ Nâlegaᴋ sapilaungmat inugiartoᴋsuit tâpkoa tikiutitilugit nunamut angerutigilauᴋtaminut tâpkonunga, toᴋorarpait sunaᴋajuitome.

¹⁷ Mânalo Nâlekab pitsartuninga angijororletôᴋ, oᴋauserilauᴋtat maliklugo, oᴋaravit:

¹⁸ Nâlegaᴋ ᴋenuêdlarpoᴋ nâpkiniktoᴋsôvlunelo, issumagijungnainikpoᴋ ajornernik tapatonerniglo, pidlartailitsingitorle ᴋaᴋialerneᴋangitunik; atâtat idluitulininginik pidlarnikpoᴋ ᴋitorngane, ernerêt kingorlerêt pingajungit sitamangillo tikidlugit.

¹⁹ Inugiartoᴋsuit ukkoa idluituliningit issumagijungnailaukittôᴋ nâpkiningnivît angijoᴋsôninga maliklugo, issumagijungnainingnîllo inungnik makkoninga Egiptenemit mânamut maliklugo.

²⁰ Nâlegarlo oᴋarpoᴋ: Issumagijungnainikpunga ᴋenunît maliklugo.

²¹ Kissianele sorlo mikseᴋârtomik inôgama, sorlolo nuna ilûnât ilumertaulârmat Nâlekab ânanauninganut,

²² Inuit makkoa ilûnatik tautulauᴋtut ânanaunimnik nelunaikutamniglo piniartamnik Egipteneme sunaᴋajuitomelo, 10ertorlutigle pikablâviᴋartut uvamnik, nipigalo nâlengnago;

²³ Tâpkoa ila tautuktuksaungilat nunamik angerutigilauᴋtamnik atâtanginut, naggojullônêt uvamnik neliata takoniangilâ;

²⁴ Kivgarale Kâle, assianik anernelik, nâletsiartorlo uvamnik, tâmna tikiutijomavara nunamut aivigilauᴋtaminut; tâpsomalo kinguvângita kingormgutilârpât.

²⁵ Takuit, Amalekut Kanaanekullo nunaᴋarput naᴋsarme; ᴋaupat sanguleritse, ailuselo sunaᴋajuitomut apkotikut imarbingmut suvlolingmut sangmijokut.

²⁶ Nâlekablo Mosese Aronelo oᴋarvigivak, oᴋarlune:

²⁷ Kanoᴋ akunertigijomik ilagêktoᴋsuit makkoa idluitut oᴋarnilutjijut uvamnik ᴋenuêsarvigijaksarivakkâ? Israêlikut oᴋarnilungningit, oᴋarniluserijangit uvamnik, tusâvakka.

²⁸ Oᴋautisigik: Sorlo mikseᴋârtomik inôgama, oᴋarpoᴋ Nâlegaᴋ, sorlo oᴋauseᴋarapse siutimnut, taimak piniarvigijomavapse;

²⁹ Timise oggojomârput (toᴋungajomârput) sunaᴋajuitome tamattomane, ilûnase kititaulauᴋtose, iluengarluse kititaulaurapse, jâreᴋartose 20nik ununersaniglo, oᴋarnilutjijose uvamnik,

³⁰ Tikituksaungilase nunamut angerutigilauᴋtamnut, aggakka issângatilugit, nunaᴋutautitsomavlugo ilipsingnut, Kâle, Jefunib erninga, Josualo, Nunib erninga, kissimik.

³¹ Kitorngasele, aᴋsârnigaksauneralauᴋtase, tâpkoa tikiutijomavakka tagvunga, ilitarᴋsilârpullo nunamik naggogijapsingnik.

³² Ilipsele timise toᴋungalârput sunaᴋajuitome tamattomane.

³³ Kitorngaselo saksâlârput sunaᴋajuitome jârit 40 nâvlugit, nangmalârposelo assiniarnipsingnik timise nungutauᴋârtinagit sunaᴋajuitome.

³⁴ Uvlut nunamik nautsertorvigilauᴋtapse unurningit, tagva uvlut 40, maliklugit, tagva jâre atauseᴋ uvlormut atautsemut, idluitulinise nangmalârpase, tagva jârinik 40nik, taimaglo missigilârpose tununganimnik.

³⁵ Uvanga Nâlegaᴋ oᴋarpunga, taimaitomiglo nelâgut ilagêktoᴋsuit tamakkoa idluitut, uvamnik pikablâviᴋartut, piniarvigijomavakka; sunaᴋajuitome ômane nungutaujuksauvut, tamâne toᴋojuksauvut.

³⁶ Angutillo, Mosesib tilijangit nautsertoriartorᴋovlugit nunamik, utertullo, unipkâlungnermingnullo nuna pivlugo pikablâtitsijut ilagêktoᴋsoarnik oᴋarnilutjitilugit Mosesemik,

³⁷ Angutit tâpkoa unipkauteᴋaluktut nunamik, toᴋovut, nusilingnartomut pijauvlutik, Nâlekab sângane.

³⁸ Josuale, Nunib erninga, Kâlelo, Jefunib erninga, inôgannertotôvuk angutinit ipkonangat nautsertoriartulauᴋtunit nunamik.

³⁹ Mosesiblo oᴋautsit tamakkoa oᴋautigivait Israêlikunut ilûnainut; inuillo angijomik ᴋaᴋialidlarput.

⁴⁰ Uvlârorlutiglo majorarput ᴋaᴋᴋab ᴋânganut, oᴋarlutik: Mânêpogut, tâvungarta nunamut Nâlekab angerutigijanganut; idluituligapta.

⁴¹ Moseselo oᴋarpoᴋ: Suna pivlugo Nâlekab perᴋojanga tapagijomavisiûk, suliniatsanginapsê?

⁴² Tâvungarniarase, Nâlegaᴋ akunapsingnêngimat; sâlagijaudlarᴋonase ômigijipsingnut.

⁴³ Amalekut Kanaanekullo sivunapsingnêngmatta, tâpkoalo saviksoanginut oggotitaulârpose; tunnulaurapse Nâlegaᴋ maligomanago, Nâlekab ilagijomangilâse.

⁴⁴ Tatitosârlutigle majorarput ᴋaᴋᴋab ᴋânganut; Nâlekable iklervinga angersimaneᴋtalik Moseselo nûlungilâk tangmârvingmit.

⁴⁵ Amalekullo Kanaanekullo nunalit ᴋaᴋᴋame tâpsomane atersârput annaulugillo unangmilugillo Horma tikidlugo.