Numbers 13 - Labrador Inuttitut Heritage Bible

¹ Nalekablo Mosese oᴋarvigivâ, oᴋarlune:

² Tiliklerit angutinik nautsertoriartortuksanik nunamik Kanaanemik, tunijomajamnik Israêlikunut; atâtangita kinguvârênginit tamainit atunit angutimik erᴋanartomik atautsemik tiliklertuksauvotit.

³ Mosesiblo tilivait sunaᴋajuitomit Pâranemit Nâlekab perᴋojanga maliklugo; ilûnatik angajoᴋauvut Israêlikune.

⁴ Attingillo tamadja: Kinguvârênit Rubenekunit, Sammua, Zakurib erninga.

⁵ Kinguvârênit Simeonekunit, Safat, Horib erninga.

⁶ Kinguvârênit Judakunit, Kâle, Jefunib erninga.

⁷ Kinguvârênit Isassarekunit, Igal, Josefib erninga.

⁸ Kinguvârênit Efraimekunit, Hosea, Nunib erninga.

⁹ Kinguvârênit Benjamikunit, Palti, Rafub erninga.

¹⁰ Kinguvârênit Sebulonekunit, Gadiel, Sodib erninga.

¹¹ Kinguvârênit Josefekunit, tagva kinguvârênit Manassekunit, Gaddi, Susib erninga.

¹² Kinguvârênit Danekunit, Ammiel, Gemallib erninga.

¹³ Kinguvârênit Asserekunit, Setur, Miggailib erninga.

¹⁴ Kinguvârênit Naftalikunit, Nabi, Vosfib erninga.

¹⁵ Kinguvârênit Gadekunit, Geuel, Makib erninga.

¹⁶ Tâpkoangovut angutit nautsertoriartortuksat nunamik, Mosesib tilijangita attingit. Mosesiblo Hosea, Nunib erninga, atserarpâ Josuamik.

¹⁷ Mosesiblo tilivait nautsertoriartorᴋovlugit nunamik Kanaanemik, oᴋautivaillo: Tâvungaritse seᴋernganit, majoraritselo ᴋaᴋᴋaᴋsoarnut:

¹⁸ Nunalo ᴋemergotsiarsiuk ᴋanoelingamangât; inuillo tagvane nunaulit sôngomangâta sangêmangâtalônêt, unuktômangâta ikitômangâtalônêt;

¹⁹ Nunalo inigijangat, piojômangât piungitômangâllônêt; iglugasaksuillo inigijangit, tupersoanêmangâta avalulingnêmangâtalônêt;

²⁰ Nunalo ᴋanoelingamangât, ivjoriktômangât ivjoluktômangâllônêt, napârtoᴋarmangât napârtokangimangâllônêt. Maksuadlaritselo, nunablo paungangita ilanginik maungautjileritse. Taipsomane vaineliksab paungangita pijariorutit innerviat neliutivoᴋ.

²¹ Taimaimat tâvungarput, nunalo ᴋemergovât sunaᴋajuitomit Zinemit Rehobemut, Hamatib erᴋânut.

²² Tâvungarput seᴋernganit tikilutiglo Hebronemut; Ahimanelo, Sesailo, Talmailo Enakib erningit tagvanêput. (Hebronelo igloliortaulauᴋpoᴋ jârit sevenit Zoanib Egiptenemêtûb sivorngane.)

²³ Tikipullo Eskolib naᴋsanganut, tagvanelo vaineliksab akkerungita paungaliksuit ilangat nakkappât, magguglo akkigarpâk akkigautikut; neksarputtauᴋ paungâlungnik pomegranatenik taijanik paungatannaniglo figenik taijanik.

²⁴ Nuna tâmna taijauvoᴋ Eskolib naᴋsanganik, vaineliksab paungangit pivlugit, Israêlikut nakkatangit tagvane.

²⁵ Uterpullo nunab nautsertortaugianganit uvlut 40 nângmatta.

²⁶ Ingergalutiglo tikiput Mosesemut Aronemullo Israêlikullo ilagêktoᴋsoanginut, sunaᴋajuitomut Pâranemut, Kadesemut; unipkarvigivaillo tâpkoalo ilagêktoᴋsoangillo, takotilugillo nunab paunganginik.

²⁷ Unipkautivaillo oᴋarlutik: Tikilauᴋpogut nunamut tiliklervigilauᴋtarnut uvaptingnik, naumânelo kôviovoᴋ imungmik igupsaujârtullo orᴋsuanik, tamadjalo tâpsoma paungangit.

²⁸ Kissiane inuit tagvane nunalit sângovut, iglugasaksoangillo avaluliorsimavut angijoᴋsôdlarlutiglo; tagvanelo takolauᴋpogut Enakib ᴋitornganginik.

²⁹ Amalekut nunaᴋarput nuname seᴋinerdlerme, Hittikullo, Jebusekullo, Amorekullo nunaᴋarput ᴋaᴋᴋane; Kanaanekullo nunaᴋarput imarbiub sidjangane kôblo Jordanib seniane.

³⁰ Kâleble inuit nipoᴋsarpait Mosesib sângane, oᴋarlune: Takpaungalerta ingergainaᴋ nunalo perᴋutigilugo; sapilungimarigapta sâlagilugo.

³¹ Takpaungarᴋatigijangille oᴋarput: Inuit tâpkoa sâlagijungnangilavut sôngonersaungmatta uvaptingnit.

³² Nunalo nautsertoriartorvigijangat oᴋautigiludlarpât Israêlikunut, oᴋarlutik: Nuna ingergarvigilauᴋtavut nautsertoromavlugo, nunauvoᴋ apᴋalajoᴋ inungminik, inuillo takojavut tagvane ilûnatik inôvat angijut.

³³ Tagvanelo inukpait, Enakib erningit, inukpait kinguvângit, takovavut; ijiptalo sângine piglertaujartutitut ipogut, taimaipogullo tâpkoa ijingita sângine.