Numbers 12 - Labrador Inuttitut Heritage Bible

¹ Mirijamiblo Aroniblo Mosese oᴋarnilugvigivâk arnaᴋ Kusemioᴋ nuliarilauᴋtanga pivlugo; nulianilaungmat arnamik Kusemiomik.

² Oᴋarpûglo: Nâlegaᴋ Mosesemut kissianut oᴋarsimavâ? Uvaptingnuttauᴋ oᴋangilâk? Nâlegarlo tusâvoᴋ tamattominga.

³ Angulle Mosese sinaungaitôvoᴋ, piluarlune angutinit tamainit nunab ᴋânganêtunit.

⁴ Nâlegarlo tagvainârtomik oᴋarpoᴋ Mosesemut, Aronemullo, Mirijamemullo: Anileritse ilipse pingasôjose ilagêktut tupinganut. Tâpkoalo pingasut aivut.

⁵ Nâlegarlo aᴋᴋarpoᴋ nuvujame nappajome, nangerlunelo tupiub upkoangane, Aronelo Mirijamelo ᴋaiᴋovâk; tâpkoalo tamarmik sivupiarpuk.

⁶ Tâmnalo oᴋarpoᴋ: Oᴋausikka tusarsigik; nelautaijoᴋarpat akunapsingne, uvanga Nâlegaujunga nelonaijaromavunga uvamnik tâpsomunga takotitjutikut, oᴋarvigijomavara sinnartomanekut.

⁷ Kivgarale Mosese taimailingalungilaᴋ; tâmna nelâgôrpoᴋ iglumne ilûnâne;

⁸ Tâmna oᴋaᴋatigijomavara ᴋanermit ᴋanermut, tukisinartomik, adsiujoku-ungitorlo; sôᴋ tagva ilerasulaungilatîk kivgara Mosese oᴋarnilugvigilugô?

⁹ Nâlekablo ningarninga tâpkungninga angijôvoᴋ; aularporlo.

¹⁰ Nuvujarlo nûpoᴋ tupermit; ahâglo, Mirijame kalaᴋadlarpoᴋ, aputitut ᴋaᴋortigijomik; Aroniblo Mirijame takonârpâ, ahâglo, kalaᴋadlartotoᴋ.

¹¹ Aroniblo Mosese oᴋautivâ: Kanoᴋtôᴋ, Nâlegara, ilijiviginiaratiguk ajornermik, silainartomik piniaramnuk idluituligamnuglo.

¹² Ilinganiaranetôᴋ toᴋungajotut, nungutaumajarêrmat uviningata ᴋopanga, anilertilugo anâname iglianganit.

¹³ Moseselo nipliadlarpoᴋ Nâlekamut, oᴋarlune: Inûlilauruktôᴋ, Nâlegaᴋ.

¹⁴ Nâlekablo Mosese oᴋautivâ: Atâtangata ketserartuinalauᴋpago ᴋênangagut, kangunartitaunajangilâᴋ uvlut sevenit nâvlugît? Parngnanairsortaule tangmârviub avatâne uvlut sevenit nâvlugit, kingornganelo tamaungautijaulârivoᴋ.

¹⁵ Mirijamelo parngnanairsortauvoᴋ tangmârviub avatâne uvlut sevenit nâvlugit; inugiartoᴋsuillo ingergalungilat Mirijame utertitauᴋârtinago.

¹⁶ Kingornganelo inugiartoᴋsuit nûput Hazarotemit, tangmârterpullo sunaᴋajuitome Pâraneme.