Numbers 11 - Labrador Inuttitut Heritage Bible

¹ Inugiartoksuillo oᴋaluᴋivut, piungitunik oᴋauseᴋarlutik Nâlekab siutinginut; Nâlekablo tamanna tusarmago ningaumajâdlarpoᴋ; Nâlekablo ikomanga ikoâlavoᴋ tâpkoa akorngane, nungutsilunelo tangmârviub issunginêtunik.

² Inuillo ᴋaigarsudlarput Mosesemut, Moseselo tuksiarpoᴋ Nâlekamut, ikomalo ᴋammipoᴋ.

³ Nunalo tâmna taijauvoᴋ Taberamik, imaipoᴋ, ikinermik; Nâlekab ikomanga ikoâlamat tâpkoa akorngane.

⁴ Takorngartallo sunatuinait tâpkoa akornganêtut ikligudlalerput; Israêlikullo ᴋeasungogivut, oᴋarlutiglo: Kia nerᴋejamik tunitjiviginiarpâtigût, nerriᴋovlutâ?

⁵ Erᴋaumavavut aulasakkat akkeᴋangitomik nerrilauᴋtavut Egipteneme; perutsiat kukumberit, melônillo, lîkillo, ᴋeanartullo, garlikillo;

⁶ Mânale tarnivut ᴋavângovut; sunaᴋalungilaᴋ; mannab oma assianik takonâraksaᴋangilarlônêt.

⁷ Manna korianderib (perutsiat ilangata) karngasutiksangititut iput, kutsuktut tautuᴋarlune.

⁸ Inuit arvertarlutik katersorpait serᴋalilugillo serᴋalitsivingme katjuklugillônêt katjugvingme, igalugillo ukkusingne, ᴋaᴋᴋôjangortilugillo; tippeᴋarpullo ᴋaᴋᴋôjartut orᴋsume igajaujotut.

⁹ Mitsuksoarlo aᴋᴋarmat tangmârvingmut unnuarme, manna ilaliudjaugivoᴋ.

¹⁰ Mosesiblo inuit ᴋitorngarêt ᴋeajut tusarpait, atunit tuperme upkoangane; Nâlekablo ningaumajârninga angijôlerpoᴋ; Moseselo ᴋuviasugungnaipoᴋ.

¹¹ Moseselo oᴋarpoᴋ Nâlekamut: Sôᴋ kivgat sanikteridlartipiûk? Sôglo saimausertaungilangâ ijîkpit sângangne, inuit tamakkoa oᴋumainartoᴋsôningat iligangne uvamnût?

¹² Uvanga inuit tamakkoa tamaita ᴋitorngarivakkâ? Uvanga ernerivakkâ, oᴋautjiᴋovlutit uvamnik, Sarliarkit, sorlo immuᴋartûb amâmaktoᴋ sarliarmago, nunamuat ngerutigilauᴋtarnut atâtanginût?

¹³ Nakit nerᴋesiniarᴋêk tunijaksamik inugiartoᴋsoarnut makkonungâ? Keadlarmatta uvamnut, oᴋarlutik: Nerᴋiksamik tunitjivigitigut nerrijungnarᴋovluta.

¹⁴ Kissima inugiartoᴋsuit tamakkoa tamaita nangmarungnangilakka, oᴋumailuarput uvamnut.

¹⁵ Taimailiorvigigumgalo, tagva toᴋolaungatôᴋ, ila, toᴋunga, saimaneᴋsiguma takkungne; tautugiaᴋarᴋonanga ajulernimnik.

¹⁶ Nâlekablo Mosese oᴋautivâ: Angutinik 70nik katersilerit uvamnut angajoᴋaujunit Israêlikune, ilitarijarnik aulatsisônik atanertuisôniglo inungnik; ᴋaikillo ilagêktut tupinganut, tagvane nangiᴋatigivlutit piᴋovlugit.

¹⁷ Aᴋᴋalârpungalo oᴋaᴋatigilutillo tagvane anernerublo ilingnêtûb ilanga tigulârpara pitilugolo tâpkonunga; ilagilutillo tâpkoa nangmaᴋtaulârput inugiartoᴋsuit oᴋumainarninginik, kissivitôvlutit nangmariaᴋarᴋonak tamattominga.

¹⁸ Inuille oᴋautikit: Ivsornaititse ilipsingnik ᴋaupamut, nerᴋetolârapse; Nâlekab siutîkita sângangne ᴋeadlarapse, oᴋarluse: Kia nerᴋiksamik tunitjiviginiarpâtigût nerriᴋovlutâ? Nâmaktomik pitaᴋalaurapta Egipteneme; tamanna pivlugo Nâlekab tunitjiviginiarpâse nerᴋiksamik, nerrilârposelo.

¹⁹ Uvlorme atausetuinarme nerriniangilase, maggungnelônêt, tellimanelônêt, tellimaujortunelônêt, twentynelônêt;

²⁰ Taᴋᴋerle ilûnât nâvlugo, aniᴋârtinago ᴋingapsigut, arriunarᴋârtinago ilipsingnut; Nâlegaᴋ akunapsingnêtoᴋ naggogigapsiuk, ᴋeadlarapselo tâpsoma sângane, oᴋarluse: Sôᴋ aulalaukitâ Egiptenemît?

²¹ Moseselo oᴋarpoᴋ: Inuit akornganêvigijakka angutauvut pisukpaktut 600,000; oᴋarpotillo: Tunitjivigijomavakka nerᴋemik, taᴋᴋeᴋ nâvlugo nerriᴋovlugit.

²² Saukat tuktuvaillo katimgajut toᴋotaujuksauvât tâpkoa pivlugit, nâmaksititauᴋovlugît? Mingeriallônêt tamaita imarbingmêtut katersortaujuksauvât tâpkoa pivlugit, nâmaksititauᴋovlugît?

²³ Nâlekablo Mosese oᴋautivâ: Nâlekab aggangit nailisimavât? Mâna takolârpotit oᴋausera nelautsimangât ilingnut, nelautsingimangâllônêt.

²⁴ Moseselo anivoᴋ inuillo oᴋautilugit Nâlekab oᴋausinginik; katersivorlo angutinik 70nik angajoᴋaujunik inungne, nangerᴋolugillo tupiub avatâne.

²⁵ Nâlegarlo aᴋᴋarpoᴋ nuvujame, oᴋaᴋatigilugolo, anernerublo tâpsomanetûb ilanga tiguvâ pitilugolo angajoᴋaujunut 70nut; ahâglo, anernerub tupvigingmagit nelautailerput, kingornganele taimailiorungnaiput.

²⁶ Angutîgle maggûk tangmârvingmêtuarpûk, aipâ Eldademik atteᴋarpoᴋ, aipangalo Medadeovoᴋ; anernerublo tupvigivak; aglaksimajunut ilingagaloarpûk, tupiliaᴋataulaungilâgle; nelautailerpûglo tangmârvingme.

²⁷ Tagva inôsuktoᴋ aᴋpasukpoᴋ Moseselo unipkautilugo, oᴋarlune: Eldadelo Medadelo nelautailerpûk tangmârvingme.

²⁸ Josualo, Nunib erninga, Mosesib ikajortinga, annerijangita ilangat, kiovlune oᴋarpoᴋ: Nâlegara Mosese inerterkik.

²⁹ Mosesiblo oᴋautivâ: Pivlunga nâmaksijungnaikêt? Nâlekab inuᴋotingita ilûnatik nelautaijôgiangit tusunadlarpoᴋ, Nâlekab anernine pitinajarmago tâpkonunga.

³⁰ Moseselo tangmârviliarpoᴋ, tâmnalo Israêliblo angajoᴋângit.

³¹ Anorelo anivoᴋ Nâlekamit tikiutjilunelo aᴋigearsungnik imarbingmit, tâpkoalo tangmârviub ᴋanitangane katararput, uvloinartausômik makutsiane, uvloinartausômiglo akkiane, tangmârviub avatâne, talertut igloinartut magguktut poᴋtotigijomik nunab ᴋângane.

³² Inugiartoᴋsuillo nikovilutik uvloᴋ tâmna nâvlugo, unnuarlo nâvlugo, uvlûblo aipanga nâvlugo, katersoivut aᴋigearsungnik; ikinerpânik katersijoᴋ homerenik 10nik katersivoᴋ; iniorᴋalugillo tangmârviub avatâne piksaᴋamârivait.

³³ Nerᴋelo kigutingita akornganêtilugo sulle, tamuajaurêrᴋârtinago, Nâlekab ningarninga tâpkoninga angijôlerpoᴋ, Nâlekablo annauvait nusilingnartomut angijôdlartomut.

³⁴ Nunalo tâmna atserartauvoᴋ ikligudlartut iluvinginik; tagvane inuit ikligudlartut iluverlaungmatigik.

³⁵ Ikligudlartullo iluvinginit inugiartoᴋsuit aularpat Hazarotemut; Hazarotemelo noᴋangavut.