Numbers 10 - Labrador Inuttitut Heritage Bible

¹ Nalekablo Mosese oᴋarvigivâ, oᴋarlune:

² Tiptulauteliorit maggûngnik silberemit; katjuksimajomit senajaksarivâkik; atoraksarivâkiglo ilagêt katimaᴋojaugianginut, tangmârsimajullo ingergarᴋojaugianginut.

³ Tamangnut tiptulausijartoᴋarpat, ilagêktut ilûnatik katimajuksauvut ilingne ilagêktut tupingata upkoangane.

⁴ Aipainanganulle tiptulausijartoᴋarpat, angajoᴋât, Israêlikut tausendeoᴋattarninginik aulatsijut, katimajuksauvut ilingne.

⁵ Tiptulausijarupselo kamasârinermik, tangmârsimajut unane aulartuksauvut.

⁶ Aipanganiglo kamasârinermik tiptulausijarupse, tangmârsimajut âne seᴋerngane aulartuksauvut; aularninginut kamasârinermik tiptulausijartoᴋartuksauvoᴋ.

⁷ Ilagêktulle katimajuksaulerpatta tiptulausijartuksauvose, kamasârinermigle pinase.

⁸ Aroniblo erningit, ajoᴋertuijut, tiptulausijartuksauvut; tamannalo maligaksaujuksauvoᴋ ilipsingnut soraijuitomik kinguvârêngnipsingne.

⁹ Akkeraselo, oᴋumaiksartitise, unatariartorupsigik nunapsingne, kamasârinermik tusartautitsijuksauvose tiptulautinut; erᴋaumajaulârpose tagva Nâlekab Gûdipse sângane, piulijaulârposelo ômigijipsingnit.

¹⁰ Taimaktauᴋ uvlorme ᴋuviasugvigijapsingne, uvloᴋsiorvipsingnelo, taᴋᴋipselo pigiarningine, tiptulausijartuksauvose tunergutiksase pivlugit, tunergutiksaselo ᴋujaliutiksat tunergusertaujut pivlugit; erᴋaititsijutigijaksarivaselo Gûdipse sângane; Uvangauvunga Gûdise.

¹¹ Pijokarporlo jârib aipangata taᴋᴋingita aipangata uvlungita 20ingane, nuvujaᴋ ᴋongmuartitaungmat tupermit kigligiutsineᴋtalingmit.

¹² Israêlikullo aularput ingergartuksaunitik maliklugit sunaᴋajuitomit Sinaimit; nuvujarlo aᴋᴋarpoᴋ sunaᴋajuitome Pâraneme.

¹³ Nelleᴋârlutiglo aularput Nâlekab perᴋojanga Mosesekut maliklugo.

¹⁴ Sivorliovlunelo Judakut tangmârvingata saimatinga aularpoᴋ katimgajoᴋotingit ilagilugit; Nâsonelo, Amminadab erninga, angajoᴋauvoᴋ katimgajoᴋotimine.

¹⁵ Isassarekullo kinguvârêngita katimgajoᴋotingine Netanel, Zuarib erninga, angajoᴋauvoᴋ.

¹⁶ Kinguvârêt Sebulonikut katimgajoᴋotingine Elia, Helonib erninga, angajoᴋauvoᴋ.

¹⁷ Tuperlo pêjartauvoᴋ; Gersonib erningit, Merariblo erningit tupermik akkigartut, aularput.

¹⁸ Rubenekullo tangmârvingata saimatinga aularpoᴋ katimgajoᴋotingit ilagilugit; Elisurelo, Sedeurib erninga, angajoᴋauvoᴋ katimgajoᴋotimine.

¹⁹ Simeonekullo kinguvârêngita katimgajoᴋotingine Selumiele, Surisadaib erninga, angajoᴋauvoᴋ.

²⁰ Gadekullo kinguvârêngita katimgajoᴋotingine Eliasafe, Deuelib erninga, angajoᴋauvoᴋ.

²¹ Kohatekullo aularput, ivsornaitovik akkigarlugo; ipkoalo (Gersonib Merariblo erningita) tupeᴋ napartipât tikiᴋârtinagit.

²² Efraimekullo tangmârvingata saimatinga aularpoᴋ katimgajoᴋotingit ilagilugit; Elisamalo, Ammihudib erninga, angajoᴋauvoᴋ katimgajoᴋotimine.

²³ Manassekullo kinguvârêngita katimgajoᴋotingine Gamaliele, Pedasurib erninga, angajoᴋauvoᴋ.

²⁴ Benjamikullo kinguvârêngita katimgajoᴋotingine Abidane, Gideonib erninga, angajoᴋauvoᴋ.

²⁵ Danekullo tangmârvingata saimatinga, kingorlerpângojoᴋ tangmârvingnit tamainit, aularpoᴋ katimgajoᴋotingit ilagilugit; Ahieserelo, Ammisadaib erninga, angajoᴋauvoᴋ katimgajoᴋotimine.

²⁶ Asserekullo kinguvârêngita katimgajoᴋotingine Pagiele, Okranib erninga, angajoᴋauvoᴋ.

²⁷ Naftalikullo kinguvârêngita katimgajoᴋotingine Ahira, Enanib erninga, angajoᴋauvoᴋ.

²⁸ Taimailingavut Israêlikut ingergarningit, katimgajoᴋotingit maliklugit, aularpullo.

²⁹ Mosesiblo Hobabe, Reguelib Midiamiub, Mosesib sakkiata, erninga oᴋautivâ: Ingergavogut nunamut Nâlekab oᴋautigijanganut: tunijomajara ilipsingnut; ilagilauᴋtigutidluarᴋutiksarsijomavaptigit; Nâlekab Israêlikut ajungitomik angervigingmagit.

³⁰ Tâpsomale kiovâ: Ilaujomangilanga; uteromavungale nunaᴋotimnut ilamnullo.

³¹ Oᴋarporlo: Kemangniaratiguttôᴋ; ᴋaujimagavit nane tangmârviksaᴋartuksaumangâpta sunaᴋajuitome, ijitullo ilingalârpotit uvaptingnut.

³² Imaitsomârporlo ilagiguptigut, ila, imaitsomârpoᴋ, Nâlekab ajungituliviᴋarninga uvaptingnik maliklugo, taimailiorvigijomârivaptigit.

³³ Aularpullo Nâlekab ᴋaᴋᴋanganit uvlunik pingasunik ingergavlutik; Nâlekablo iklervingata kigligiutjineᴋtalik sivorlerivât uvlunik pingasunik ingergavlutik, merngoerserviksarsiorlugit.

³⁴ Nâlekablo nuvujangata ᴋolangiarpait uvlôtilugo, sivupiartormatta tangmârvingmit.

³⁵ Imailingavorlo, iklervik sivupiartormat, Mosese oᴋarpoᴋ: Makilaurit, Nâlegaᴋ, ômigijitillo siamangatitaulit: ômisuktut ilingnik ᴋemâlit sângnit.

³⁶ Noᴋarmallo oᴋarpoᴋ: Utilaurit, Nâlegaᴋ, Israêlikut tausendoᴋattarningita ten tausendeoᴋattarninginut.