Nehemia 9 - Labrador Inuttitut Heritage Bible

Inugasaksuit ᴋakᴋialerningat sagvartome.

¹ Takᴋib tapsoma uvlungita 24 ingane Israelib ᴋitorngangit katimalerput, nerritaililutik, pôksaijamiglo (silliktunik illerksalingnik) attisimavlutik, ivjolijarlutiglo niaᴋomik ᴋângine.

² Israeliblo kinguvangit avitipait takkorngartat ᴋitornganginit tamainit, nangeriartorlutiglo ajornitik, atâtagijamiglo idluitulliningit kigligiutigilugit.

³ Nikovipullo innimingne, Nâlekablo Gûdimik aglangit perᴋojaktagit atuartauvut, uvlorlo sitamaulilugo, sitamangat nâlugo attuarsivut, sitamangallo aipangane kigligiutsivut, tuksiarlutiglo Nâlekamut Gûdemingnut.

⁴ Levitillo poktojoᴋotinganut nangeriartorput Jesua, Banillo, Kadmiello, Sebanjalo, Bunilo, Serebjalo, Banilo, Kenanilo, nipliarlutiglo nippeᴋortojomut Nâlekamut Gûdemingnut.

⁵ Levitillo Jesua, Kadmiello, Banilo, Hasabenjalo, Serebjalo, Hodjalo, Sebanjalo, Petatjalo oᴋarput: Nikovititse, Nâlegarlo Gûdise nertorsiuk issoᴋangitomit issoᴋangitomut! Atillo ânanaudlartok, anginersaujok nertordlerutiksanit, nakosarnernillo tamainit, nertortaule!

⁶ Nâlegak igvitôvotit, igvit ᴋilak pingortilaukpat, ᴋilaillo tamaita ᴋilangit, katimgajoksoangit illaliudlugit, nuna tamaitalo tapsomanêtut, immarbiksuit, tamaitalo tapᴋoa ilûanêtut. Igvillo tamaita pairivattit; ᴋilangmiugaseksuillo tuksiarvigivâtit.

⁷ Igvit Nâlegauvotit Gûde, Abrâmik annerosulauktotit, tessiornilauktotillo taipsominga Uremit Kaldaamêtomit, adserarlugolo Abrahâmik.

⁸ Ommatingalo nertornartok nachvârlaukpat sângne, angerᴋattigilaukpello kinguvângit tunnitsivigijomavlugit, Kanaaniterit, Hetiterillo, Amoriterillo, Feresiterillo, Jebusiterillo, Girgositerillo nunangit; oᴋautsitillo nallautsitilaukpattit, idluartogavit!

⁹ Igvillo atâtagijapta ajulerningat Egipteneme takkonârlaukpet nipliarningallo immarbingme iviktalingme suvlulingnik, tussarlaukpet,

¹⁰ Nallonaiᴋuteᴋartitsilaukpotit tattamnartullilutillo Faraome, kivgaᴋotinginelo ilûnaine, nunangatalo inugasaksoangine ilûnaine; igvit illitarksilauravit perajarlugvigingmagit; ateᴋartilaukpotillo sôrlo uvlome îmat.

¹¹ Immarbiglo avilaukpet sivurngane, immarbik ᴋerᴋagôrvigilugo ipteriliktokut piᴋovlugit, unangmijingillo ittijomut egilaukpattit, sôrlo ujarak egitauvangmat immaksoarmut;

¹² Uvloᴋarningane tessiorlaukpattit nappajome nuvujaujome, unnuaᴋarninganelo nappajome ikᴋomaujome, ᴋaumarlugit apᴋome ingerarvigijangane.

¹³ Akᴋarlaukpotillo ᴋakᴋamut, Sinaimik atelingmut, oᴋarvigilaukpattillo ᴋilangmit, tunnitsivigilugillo iduarnermik tammarnangitomik, malligaksaniglo mikselingnik, perᴋojaniglo ilûsiksaniglo ajungitunik;

¹⁴ Sabbateᴋotillo ivsornaitok nallonairlaukpet tapᴋonunga; perᴋojaniglo, ilûsiksaniglo, malligaksaniglo perᴋolaukpattit Mosekut kivgaᴋotikut.

¹⁵ ᴋakᴋojamiglo ᴋilangmit tunnitsivigilaukpattit kâktilûgit, immermiglo anniᴋojilaukpotit tapᴋonunga ᴋairtomit immerulauktilûgit; oᴋarvigivattillo aijuksaungmatta nuna nangmineliutilugo, aggangnik issajutigilauktat kôngmut, tunnijomavlugo tapᴋonunga.

¹⁶ Atâtagijavulle piojorilerlaukput, tappatolerlutiglo, Nâlelugatiglo perᴋojarnik.

¹⁷ ᴋunulaukpullo tussarnermik, tattamnartullinitillo pinniarlauktattit erᴋarlaungilait, tettitosarlaukput angajoᴋâᴋartitsivullo ingmingnut utteromamut kivgaunermingnut keppeserlutik. Igville Gûdiga issumagijungnainilaukpotit, saimarviᴋalaukpotit, napkigosuklutillo, ᴋenuêdlalarpillo, napᴋoartoksôlaukpotit, ᴋemalaungilaillo.

¹⁸ Nochangoarmiglo ᴋovimajomik sanalauralloaramik, oᴋarlutiglo: Tagva (Israele) Gûdit Egiptenemit aulartilauktit! Mittautiksaᴋarlutiglo taimâk angijomik;

¹⁹ Sullele sunakajuitome ᴋemalaungilattit napᴋoatoksônit pitjutigilugo, nappajorlo nuvujaujok nulaungilak taipkonangat uvlotilûgo, tessiorlugit apᴋome, nappajorlonêt ikkomaujok unnuame, ᴋaumarlugit apᴋome ingergavigijangane.

²⁰ Annernerniglo ajunginermik tunnitsivigilaukpattit, ajoᴋertorlugit, Mânnakotitillo sangutilaungilattit ᴋaninginit; immermiglo tunnitsivigilaukpattit immeruktilûgit.

²¹ Jârit 40git nâlugit patangaitilaukpattit Sunaᴋajuitome, ajoksalauᴋonagit sunamiglonêt. Anorângit samgusengorlaungilet, itigangillo puvilerlaungilet;

²² Tunnitsivigilaukpattillo atanniovingnik, inuᴋattigêksoarniglo, avilaukpattillo maunga ikungalo, aksarnigarivâllo Sihonib nunanga, Hesbonib atannertangata, Ogiblo nunanga, Basanib atannertangata;

²³ ᴋitorngangillo unnuksivalliatilaukpattit uvloritsetitut ᴋilangmêtutitut, âlaukpattillo nunamut atâtagijanginut oᴋarutigilauktarnut, ittervigilugo nangmineliutilugolo pijuksaungmatta.

²⁴ ᴋitorngangitalo ittervigivât nangmineliutilâlo; igvillo nunab inungit taipkoa sivurngane mannigotitilaukpâttit, Kanaaniterit, tunnilaukpâttillo agganginut, atanningillo inuᴋattigêksoangillo, pinniarvigilugit pijomajamingnut.

²⁵ Iglugasaksuillo sôngojut aksarnigarivait, nunalo pitsornartok, iglullo perᴋutitaggit sunatuinarnik nangmineliutilerpait, immektarvillo ullimarsimajut, perorsêvillo Weineliksat, perorsêvillo orksugit, nappârtullo nerᴋiksagit unnuktut, nerrilaukpullo aᴋeartorlutiglo, kuinilerlarmiglo, inoseᴋalutiglo allianartomik, pitsiarnersoarnut.

²⁶ Kissianele tappatolerlaukput, akkerartorpâtillo, Malligaksauᴋojattit egipait tunnumingnut, Nallautaijoᴋotitillo nakterpait, kigligiutsijut tapᴋonunga, salertuksaungmatta illingnut, oᴋarnerlutjilutiglo angijomik.

²⁷ Tamânna pivlugo tunnilaukpattit omigijingita agganginut, kappiasuktitsiᴋovlugit tapᴋoninga. Kappiasungnimiglo nalliuningane nipliarlaukput ilingnut; igvillo tussarlaukpattit ᴋilangmit, napᴋoarosuktoksônernullo piuliklertunik tunnitsivigilaukpâttit, piuliklertunik tapᴋoninga omigijingita agganginit.

²⁸ Merngoêrserviksaᴋalauruniglo mumiktilerput idluitullilutik sângne. Tagva ᴋemalaukpâttit omigijingita agganginut, atanniotiᴋovlugit tapᴋonunga. Tagva sâlerput nipliarlutiglo ilingnut; igvillo tussarlaukpâttit ᴋilangmit piuliᴋattarlugillo napᴋoarosuktoksônernut,

²⁹ Kigligiudsivioᴋolaukpattillo sâlertuksaungmatta Malligaksauᴋojarnut. Piojorilerlaukpulle, Nâlelaungilaillo perᴋojattit, idluitullilutiglo idluarijattit akkerartorlugit, (tapᴋoale inuit nalliata pinniarpagit inôgutigivlugit pingmagit) tuitiglo sangutipait, tappatolerlutiglo, Nâlengnatiglo.

³⁰ Igvillo jârit unnuktut nâvlugit ᴋenuêrsârvigilaukpattit, kigligiutsivioᴋolaukpâttillo annernermut, nallautaijoᴋotingnêtomut; ilaliorlaungilâlle siutimingnut. Tamana pivlugo tunnilaukpattit inuᴋattigêksuit nunanetut agganginut.

³¹ Napᴋoarosuktoksônît malliklugo nungumaritaililaukpattit, ᴋemalaungilattillonêt; Gûdeôgavit saimarviᴋarosuktok, napᴋoarosuktorlo.

³² Mânnalo Gûdivut, Gûdeojoksôjotit, sôngojotit kappianadlartotillo, nallautsititsijotit angerᴋattigêngnermik, napkiningnermiglo, siorniornartut tamaita tikkitautigijavut, atannivullo, angajoᴋaunerôjovullo, ajoᴋertortivullo, nallautaijovullo, atâtavullo, inuᴋotitillo tamaita, Assiriamiut atanningita nalliuninginit uvlok tamânna tikkidlugo, mikkijonasugitailikittôk.

³³ Igville idluarpotit, tamaine tikkitauᴋolauktarne uvaptingnut, igvit nâmaktullilauravit, uvagulle nâmangitoâlungmik pinniarlaukpogut.

³⁴ Atanniptalo, angajoᴋaunerôjuptalo ajoᴋertortiptalo, atâtagijaptalo malligaksaukojattit pinniarlaungilait, perᴋojattillo, kigligiutsinitillo kigligiutigijaukolauktattit tapᴋonunga, kamagilaungilait.

³⁵ Kivgartorlaungilâtillo atanniovingmingne, Perᴋutevaksoarnerne, tunnilauktarne tapᴋonunga, nunamelo nerrotôjome, pitsornartomelo unnertutigijarne tapᴋonunga, sâlerlaungilello pinniarnermingnit idluitunit.

³⁶ Ahâk, mânna kivgauvogut; nunamêpogullo atâtagijaptingnut tunnilauktarne, perortungit perkutingillo nerrilugit piᴋovluta; ahâk, tapsomane kivgauvogut;

³⁷ ᴋaitangillo unnuksivalliavut atannernut, illilauktarnut uvaptingnut, ajornivut pivlugit; atanniotivullo timiptingnut, nergjutekotiptingnullo pijomajamingnut, uvagullo siorniornadlartomêpogut.

³⁸ Taimailingagalloarlutalo Angerᴋattigêngneᴋartitsivogut soᴋosijuitomik, aglaklutalo, angajoᴋaunerôjuptingnullo, Levitinullo, ajoᴋertortiptingnullo nakkitertauᴋovavut.