Nehemia 8 - Labrador Inuttitut Heritage Bible

Perᴋojat attuartauningat. Uvloksiorviublo igloᴋarnermik akkerkunik milûᴋattalingnik attortauninga.

¹ Takᴋillo 7ingat mânna tikkilermat, Israeliblo ᴋitorngangit iglugasaksoaᴋotimingnêmatta, inugasaksuit ilûêngarlutik katimalerput angutetut attautsetut sôrlo, apᴋosinerme silliktome immiub itterviksoangata sângane, oᴋarlutiglo Esramut, aglanik ilisimajomut, aiklerᴋovlugo Mosesib aglanginik perᴋojaktalingnik, Nâlekab Perᴋolauktanginik Israelitinut.

² Esrablo ajoᴋertuijub perᴋojat âpait ilagêt, angutit arnallo ilûnatiglo tussarungnartut tapᴋoninga sânginut, takkit 7 ingata uvlungita sivurlingane,

³ Attuarpaillo apᴋosinerme silliktome immiub itterviksoangata sânganêtome, uvlarârsungmit uvlub ᴋetterarninga tikkidlugo. Inugasaksuillo siutingit ilûnatik torarput aglanut perᴋojaktalingnut.

⁴ Esralo aglanik ilisimajok nangerpok iᴋovrangme ᴋejungôjome, sanalauktangane tamânna pivlugo. Sanianelo nangerput: Matitja, Semalo, Anajalo, Urialo, Hilkialo, Maesealo, tallerpiane; saumianelo, Pedaja, Misaelo, Malchjalo, Hasumelo, Hasbadanalo, Sacharjalo, Mesullamelo.

⁵ Esrablo aglait kopperpait inugasaksuit ilûnâmasiatik takkoane, nuitangmat inugasaksoarnit tamainit; koppermagillo inugasaksuit ilûnâmasiatik nikᴋovilerput.

⁶ Esrablo Nâlegak Gûdejoksoak nertorpa. Inugasaksuillo ilûnâmasiatik kiovut Taimaile! Taimaile! Aggatik ᴋongmuartilugit pivlutik; okᴋolutiglo, opigosuglarmiglo Nâlekamik kênatik pûvlugit nunamut.

⁷ Jesuablo, Baniblo, Serebjablo, Jaminiblo, Akubiblo, Sabtaiblo, Hodajablo, Maesejablo, Klitablo, Assarjablo, Josabadiblo, Hananablo, Plajablo, Levitillo perᴋojat tukkisinartipait inugasaksoarnut; inugasaksuillo nangerput innimingne.

⁸ Attuarpaillo Gûdib aglangit perᴋojaktagit tukkisinartomik, tukkingillo nallonairpait, tukkisinartilugillo attuartautilugit.

⁹ Nehemiablo Hatirsastaôjub (nunab aulatingata) Esrablo ajoᴋertuijub, aglanik ilisimajub, Levitillo, inugasaksoarnik ajoᴋertuijut, inugasaksuit ilûnâmasiatik oᴋautivait: Uvlok tamânna ivsornaitôvok Nâlekamut Gûdipsingnut; kiksarniarase ᴋêaniaraselo. Inugasaksuit ilûnâmasiatik ᴋêagamik perᴋojat oᴋausertangit tussaramigit.

¹⁰ Tamânna pivlugo oᴋautivait: Aileritse nerriluselo orksulingmik, immerluselo mamaktomik; pajungniluselo aitusiamik âᴋiksoilaungitunut ingmingnut; uvlok tamânna ivsornaitôngmat Nâlegaptingnut; tamânna pivlugo issumajarniarase, ᴋuviasungnek Nâlekamik pitsartutigigapsiuk.

¹¹ Levitillo inugasaksuit saimarsarpait, oᴋarlutiglo: Imangeritse, uvlok tamânna ivsornaitongmat, issumajarniarase.

¹² Inugasaksuillo ilûnatik aivut nerrijomavlutik, immeromavlutiglo, pajungnigomavlutiglo aitusianik, ᴋuviasungneᴋartitsilarmiglo angijomik; oᴋautsit tukkisilauramigit, oᴋautigijaulauktut tapᴋonunga.

¹³ Uvlublo aipangane atâtat inugasaksuit ilûnâmassiatik angajoᴋaunerôjungit, ajoᴋertuijullo, Levitillo katimalerput Esramut, aglanik ilisimajomut, ajoᴋertortaujomavlutik tapsomunga perᴋojat oᴋausertanginik.

¹⁴ Nachvarpullo perᴋojane, Nâlekab Mosesekut tunnilauktangine, aglaksimangmat, Israelib ᴋitorngangit uvloksiorvingme takᴋit 7ingane, iglunêtuksaungmatta akkerkunit milûᴋatalingnit sennâmajune.

¹⁵ Tamânnalo tussartauᴋovât, akpautigijauᴋolugolo iglugasaksoamingne ilûnaine Jerusalemelo, oᴋarᴋojilutiglo: Aileritse ᴋakᴋanut, aiklerluselo nappârtut, orksuliub, Balsamiblo, Mirteniblo, Palmillo akkerunginik, nappârtullo asingita akkulaitunik akkeroggit, iglunik akkerolingnik sanajoᴋarᴋovlugo, sôrlo aglaksimangmat.

¹⁶ Inugasaksuillo aivut aiklerlutiglo, igloᴋartitsivullo ingmingnut akkerkunik, attunît iglomik ᴋângine, innemingnelo avaluliorsimajune, Gûdiblo iglungata inningine avaluliorsimajune, apᴋosinermelo silliktome immiub itterviksoangata sângane, apᴋosinermelo silliktome Efraimib itterviksoangata ᴋanitangane.

¹⁷ Ilagêllo ilûnâmasiatik uttersimajut parngnanairsimavingmit, sanavut iglunik akkerolingnik, innigivaillo. Israelib ᴋitorngangit Josuab Nunib erningata nalliuninganit uvlok tamânna tikkidlugo taimailiorlaungimatta; ᴋuviasungnevaksoaᴋalaukporlo.

¹⁸ Gûdiblo aglangit perᴋojaktaggit attuartauvut uvlut tamaita, uvlut sivurlerpânganit kingorlerpâk tikkilugo; uvloksiorviglo attorpât uvlut 7 it nâlugit; uvlullo 8 ingane uvloksiorviub katimaniksanga, sôrlo pijuksaungmat.