Nehemia 6 - Labrador Inuttitut Heritage Bible

Nehemiab unangmijauninga, uniorgariningalo.

¹ Saneballatelo, Tobialo, Gosemelo Arabiamiok, omigijiptalo assingit tussarmatta avaloksuit sanajarêrapkit, kingeᴋarungnaimatta, upkoat illilaungigalloarapkit sulle itterviksoarnut;

² Saneballate Gosemelo tilliklerpûk uvamnut, Oᴋautsauᴋolungalo: ᴋait katimalerlutalo iglugasangne naternamêtune Onomik atelingme. Idluitullivigijomanasugilaukpângale.

³ Uvangale tillijanik tilliklervigilaukpakka, oᴋautsaukolugillo: Sullijaksakarpunga pijariakortôjomik, attersarungnarlungitungalo. Sôg sullijaksak nokᴋartuksauvâ, ᴋemagupko atersarajarlungalo ilipsingnut?

⁴ Sitamairtorlutigle taimaitomik ilûseᴋarlutik tilliklervigivânga, uvangalo kiotsainarpakka taimaitomik ilûseᴋarlunga.

⁵ Tagva Saneballate tallimangane tilliklerpok uvamnut kivgaminik agganginut tigumiartomik aglanik nippitisimangitunik.

⁶ Tapᴋonane aglaksimajoᴋalaukpok: Nallojut akkorngane tussartaumavok, Gosemelo oᴋalaukpok tamattominga, igvit Judillo issumaᴋarapse atannek piᴋablavigijomavlugo, tamânnalo pivlugo avaloksuit sanagangne, igvillo atanniojomagavit tapᴋonunga, pinniarnerit tamakkoa malliklugit.

⁷ Igvillo nellautaijoᴋartitsilauravit ilingnik akpaujijuksanik Jerusaleme, oᴋarlutik: Tamna atanniovok Judame. Mânnalo tamânna tussartautitauniarpok atannermut. Tamânnalo pivlugo ᴋailaurit kachimioᴋattigilaulavut.

⁸ Uvangale tilliklerpunga tapsomunga oᴋautsauᴋolugolo: Taimaitomik pinniartaujoᴋalaungilak, oᴋauserijarnik; ommatingnut issumertorlaukpat.

⁹ Taipkoa ilûnatik sivurasaromalaungmattigut, issumalutiglo: Aggatik ergititaksarivait sullijaksamit, pinniartauᴋonago. Mannâle tamânna pivlugo, Gûdik, aggakka pitsartutilaukit!

¹⁰ Tikkilaukpungalo Semajab, Delajab erningata Meheletabeelib erningata iglunganut; tamnalo pallangairutivok ingminik, oᴋarlunelo: Katimalerta Gûdib iglungane, Tempelib ᴋerᴋane, Tempeliblo upkoangit pallangairlavut; tikkiniarmatta nakteromavlutit, unnuarmelo tikkiniarput nakteriᴋovlugit illingnik.

¹¹ Uvangale oᴋarpunga: Angut uvaptun-îtok ᴋemâjuksauva? Angullo taimaitok uvaptut Tempelemut aijuksaunajarᴋa Inoᴋojomavlune? Kamungaromalungitunga.

¹² Mallugosukama Gûdib tillilaungimago. Nellautailune oᴋautigilauralloarpânga, Tobiable Saneballatiblo kênaujanik tunnitsivigilaukpâk.

¹³ Tamânna pivlugo kênaujanik tigusivok sivurajuksaugama, taimailiortuksaugamalo idluitullijuksaulungalo, oᴋausiksâluᴋaromangmatta pivlunga, mittautigilungalo pijungnaromavlutik.

¹⁴ Gûdîk, Tobiase Saneballatelo issumagikik pinniarningit tapᴋoa malliklugit; taimâglotauk nallautaijok arnak Noadja, nallautaijullo assingit sivurasaromalauktut uvamnik.

¹⁵ Avaloksuillo pijarêrlaukput takᴋib Elulemik atigub uvlungita 25ingane, uvlune 52ine.

¹⁶ Omigijiptalo ilûnatik tamânna tussaramitsuk, nallojut avatiptingnêtut ilûnatik sivuravut, mungolerlutiglo, mallugosukamik pinniarnek tamânna Gûdemit pingmat.

¹⁷ Nalliutome taipsomane angajoᴋaunerôjokalaukpoktauk unnuktunik Judame, aglanik tillikliutjijunik Tobiamut, Tobiamillo taimaitut tikkiput tapᴋonunga.

¹⁸ Unnuktôlaungmatta Judame angermarilauktut tapsomunga; tapsomale Sachanja, Arab erninga ningaugingmago, erningatalo Johananab Mesullamib Berachjab erningata pannia nullianilaukpa.

¹⁹ Ajungitomiglo oᴋarpaktut pivlugo sâmne, oᴋautsikkalo akpautigivait tapsomunga. Tobiablo aglait tillikliutivait sivurasâromavlunga.