Nehemia 5 - Labrador Inuttitut Heritage Bible

Judit ârusungningit akkiliksatik pivlugit; Nehemiablo suadlarninga tapᴋoninga, pitjutaujunik tamattomunga.

¹ Nipliadlarneksoaᴋalerporlo inugasaksoarnit nulianginillo, ᴋatangutitik Judit akkerartorlugit.

² Ilangillo tagvanêtut oᴋarput: Ernivut panivullo unuktôvut, tamânna pivlugo ᴋakᴋojaksanik pinasuarta, nerrijungnarᴋovluta inôlutalo.

³ Ilangille oᴋarput: Perorsêviᴋotivut, perorsêvivullo Weineliksat, iglovullo sattoraksautiniarlavut, ᴋakᴋojaksarsiᴋovluta ᴋângmut.

⁴ Ilangille oᴋarput: Kênaujanik taukteliksarsilaukpogut akkiliaksanut, atannermut ilingajunik, perorsêviᴋotivut, perorsêviᴋotivullo Weineliksat sattoraksautigivlugit.

⁵ Taimaigalloarmallo ᴋatangutipta timingit timiptitut îput, ᴋitorngangillo ᴋitorngaptitut îput. Ahâglo, uvagut ernivut pannivullo kivgangortitauᴋojariaᴋarpavut; paniptalo ilangit kivgangortitaumajarêrput, uvagullo perᴋuteᴋangilagut aggaptingne, perorsêvivullo, perorsêvivullo Weineliksat assiptingnut ilingavut.

⁶ Tagva ningavaksoadlalerlaukpunga, nipliadlarningit oᴋausingit tapᴋoa tussarapkit.

⁷ Ommatigalo ilûmne isumaksarsiorpok, suarpakkalo erᴋanartut, aulatsijullo, oᴋautilugillo: Ilipse attunît ᴋatangutipsingnit, taukteliksarsijunit ilipsingnit tappiksamik tigusijomavise? Ilagêllo unuktut akkerartortipakka tapᴋonunga,

⁸ Oᴋautivakkalo: Uvagut ᴋatangutivut Judit nellojunut niovgutigijaumalauktut pissiarilugit kippalutjarlaukpavut, ajugaringitaptingnit; ilipselo ᴋatangutisse niorvgotigijomavisigik, uvagut pissiarilauktavut? Tagva nippangerput, kiogutiksarsijungnaratiglo.

⁹ Oᴋalaukpungalo: Nâmalungilak pinniartase. Agvertartuksaungilasê sivuranerme Nâlekamik, nallojut omigijipta mittauteᴋarningit pivlugit?

¹⁰ Uvangalo ᴋatangutimalo kivgaᴋotimalo Taukteliksaᴋartilaukpavuttauk kênaujanik, ᴋakᴋojaksaniglo; ᴋenuvigivapsele tappiksaᴋarᴋojiniarata.

¹¹ Tagva mânna uvlorme tamattomane perorsêvingit, perorsêvingillo Weineliksat, perorsêvingillo orksuggit, iglungillo sattortautisigik tapᴋonunga, kênaujallo ᴋakᴋojaksallo, Weineliksallo iptingit, orksuglo tigulauktapse tapᴋonangat tappiksamut 100 dingat.

¹² Tagva oᴋarput: Sattortautitsomavavut tapᴋonunga, ᴋaitsiᴋojomangilavullo sunamik, pinniaromalutalo, sôrlo igvit oᴋalauravit. Ajoᴋertuijullo ᴋaiᴋovakka, angermariᴋolugillo taimailiortuksaungmatta.

¹³ Ikkiaratauk nâvilugo ipsortorlaukpara, oᴋarlungalo: Taimâk Gûdib nalliat ipsortorlitsuk iglunganit sullijaksanganillo, oᴋautsemik ominga nellautsititsilungitok, ipsortauvlune navisimajotun, ilûlêrtotullo îᴋovlugo. Ilagêllo ilûnâmassiatik oᴋarput: Taimaile, Nâlegarlo nertorpât. Inugasaksuillo taimailiorput, oᴋautsit tapᴋoa malliklugit.

¹⁴ Nelliutomit taipsomangamit perᴋojauvimnit aulatsijuksaugama Judakut nunanganik, tagva atanniub Artasastab jâringita 20inganit 32ingat tikkidlugo, tagva jârit 12it nâlugit, uvanga ᴋatangutimalo, nunab aulatingata nerᴋigivaktangit nerrilaungilavut.

¹⁵ Aulatsijut sivunimnêlauktut inugasaksuit Oᴋumaiksartilaukpait, tigusilauklutiglo tapᴋonangat Niaᴋojamik Weinemiglo, tapᴋoalo tappilugit Sekelinik 40ginik Silberemik. Uvangale taimailiorlaungitunga, suvuranek Gûdemik pivlugo.

¹⁶ Sanalaukpungatauk avaluksoarne, perorsêviksilaungilangalo; kivgakotikkalo ilûnatik kattimalaukput tagvane sullijaksamut.

¹⁷ Judinillo aulatsijunillo 150git uvlut tamaita Nerrimarᴋattauvut nerrimavimne, tikkilauktut uvamnut nellojut avatiptingnêtut akkornganit.

¹⁸ Uvlullo tamaita pivlunga attuinautitauvut, tuktuvak Angusâlluk atausek, saugallo kuinititaumajut pingasojortut, tingmitsello, uvlunelo tallimaujortune atausiardlune Weinit sunatuinait arklingnartut. Taimaigalloarmat nunab aulatingata nerᴋiksangit ᴋaitauᴋolaungilakka, kivgartornek oᴋumaidlalaungmat inugasaksoarnut.

¹⁹ Gûdîk, inugasaksoarnut tapᴋonunga pinniarlauktakka tamaita erᴋarutigikit uvamnik, idluarkutiksamnut!