Nehemia 4 - Labrador Inuttitut Heritage Bible

Avalut pivallianingit, Nehemia tuksiarmat, omigijinginut agviartaugalloarmatta.

¹ Sanneballatele tussarame, uvagut avaloksuit sanagaptigik, ningalerpok, ᴋaningaumajarlunelo, mittautigivaillo Judit,

² Oᴋarlunelo ᴋatangutiminut, pitsartunelingnullo Samariamêtunut: Judit nukkeᴋangitut sunaliorᴋat? Taimailingaᴋojautsainarniarᴋat? Tunnergutinik Tunnijiniarᴋat? Uvlut ilangane innerniaralloarᴋatsuk? Ujargat omartiniarpattigik patsalungavlutik ᴋallerêktisimajut ikkitaumajullo?

³ Tobiale Amonitereôjok saniane nangerpok oᴋarlunelo: Sanatuinarlit; terrianiat taikungarajarunik ᴋarmangit ujaraggit serᴋominiarpallukpait.

⁴ Gûdivut tussarit, ᴋanok nachogijaugapta! Mittauteᴋarningit uttertikit niaᴋunginut nangminerijanginut, tunniugit piᴋovlutit nachogijaunermut parngnanairsortaumaningata nunangane!

⁵ Idluitulliningit ulliktaililugit pît, ajorningillo pêjarniarnagit sângne; sanajut ningaksarlaungmattigik.

⁶ Uvagulle avaluksuit sanavavut, tokkitilugillo pôktojuksauningata koppanga tikkidlugo. Inugasaksuillo omatteᴋalerlaukput maksoajunik sananermut.

⁷ Saneballatele Tobialo, Arabiamullo, Moabiterillo, Asdodemiullo tussaramik, Jerusalemib avaluksoangita ᴋarmangit âᴋiktaujarêrmatta kingingillo tokkititaulermatta, ningavaksoadlalerput,

⁸ Angerᴋattigêklutiglo tikkitsomavlutik, Jerusalemelo sorsuklugit agviaromavlugillo.

⁹ Uvagulle tagva tuksiarpogut Gûdiptingnut, udsertortoᴋartitsivogullo uvlotilûgo unnuarmelo taipkoa pivlugit.

¹⁰ Judakullo oᴋarput: Akjarsijut pitsartuningit amigarput, sannillo unnuluadlarput; avalune sanajungnangilagut.

¹¹ Akkerartortivullo oᴋarput: ᴋaujijuksaungilet, takkojuksaunatiglonêt, akkornganêmariᴋârtinata, nakteriᴋârtinatalo taipkoninga, pinniarnerlo sorairtilugo.

¹² Judille taipkoa saniane nunaᴋalauktut, tikkimatta oᴋautilutalo tamattominga, tallimaujortoêrtorlutik aglât, inninit nunagijamingnit tamainit avatiptingne;

¹³ Tagva pititsivunga inugasaksoarnik ᴋitorngarêt malliklugit avlaloksuit ungatânut ittersanut, saviksoaᴋotitik, ᴋallugiarᴋotitiglo, pittikseᴋotitiglo najortigilugit.

¹⁴ Allakausijarpungalo parngnailerlungalo, oᴋarlungalo Erᴋanartunut angajoᴋaunerôjunullo, inugasaksoarnullo assinginut: Sivuraginiarassigik, Nâlegaksoarle erᴋsinartoksoak erᴋarsiuk, ᴋatangutiselo erniselo, paniselo, nuliaselo, igloᴋotiselo sorsugutigisigik.

¹⁵ Omigijivulle tussarmatta, uvagut nallojungnaititaumagapta tamattominga, tagva Gûdib kajusimaningat asserorpa. Uvagullo ilûnata utterpogut avaluksoarnut, atunît sullijaksaptingnut.

¹⁶ Pijoᴋalaukporlo nalliutomit taipsomangamit, inosuktut ketterᴋangit sanangmatta, ketterᴋangitalo aipangita tigumiarpait ᴋallugitsat sappulutallo, pittiksallo, sagvingmiutallo; angajoᴋaunerôjullo Judakut ilûnâmasiatik tunnuane nangerput,

¹⁷ Sanajut avaluksoarne, akjarsijullo akjaraksanik tapᴋonangat illijilauktunit tapᴋonunga, agganut igluînarnut sanavut sullijaksanik, igluanullo sakkut tigumiarpait.

¹⁸ Sanajullo ilûnatik tapserusersimalaukput saviksoarmingnik makkitimikut, sanalutiglo taimailingavlutik; tiptulausijartorlo sanimnelaukpok.

¹⁹ Oᴋarpungalo erᴋanartunut, angajoᴋajanullo: Sullijaksak angijôvok, ᴋaningitomullo ilingavok, uvagullo siamarsimavogut avaloksuit ᴋângane ᴋaningitigêklutalo.

²⁰ Nanelo mânna tiptulaut tiptulausijautigijauninga tussarniarangapsiuk, tagvunga katimaleritse uvaptingnut, Gûdipta sorsugutiginiarpâtigut.

²¹ Taimaglo sanalaukpogut sullijaksame; inugasaksuillo ᴋeterᴋangita aipangita ᴋallugitsat tigumiarpait ᴋaub aupalungningata nuilerninganit uvloritset nuilerningat tikkidlugo.

²² Taipsomane inugasaksoarnut oᴋalaukpungatauk: Ilûnatik kivgatik illagilûgit unnuakut siniktarlit Jerusaleme, unnuane udsertorteôᴋovlugit uvaptingnut, uvlotilûgolo sanaᴋovlugit.

²³ Uvangale ᴋatangutikkalonêt, kivgaᴋotikkalonêt, angutillonêt udsertorteôjut, malliktut uvamnik, annorairlungimarikpogut, ilûnatiglo timitik ubvartailivait.