Nehemia 2 - Labrador Inuttitut Heritage Bible

Nehemiab perᴋojauninga atannermut, Jerusalem iglugasaliorungnarlugit.

¹ Pijoᴋalaukporlo atanniub Artasastab atanniotiningata jâringita 20ingane, takᴋerme Nisanemik atelingme, sâmiktilûgo Weinemik, Weine kivikpara, tunnilâlo atannermut; tautuᴋarpungalo kiksartomik.

² Tagva atanniub oᴋautivânga: Sôg kênait tautorluᴋâ? ᴋanimalungigalloartotit? Tamânnaungilak, ommatille oᴋumaipok. Uvangale sivuravaksoadlalaukpunga,

³ Oᴋarlungalo atannermut: Atannek innôle issoᴋangitomut, uvanga tautorluktuksaungilanga? Iglugasaksuit atâtagijama illijartortaumaningita najugangat asserorsimavut, upkoaksoangit ikkomamut nerrijaumavut.

⁴ Tagva atanniub oᴋautivânga: Sunamigle tuksiarᴋit? Tagva ᴋilaub Gûdinganut tuksiarpunga,

⁵ Oᴋarlungalo atannermut: Nâmagijaukpat atannermut, Kivgaᴋotingnullo sângnêtunut, tillilunga piᴋovlutit Judamut, atâtagijama ilijartortaumaningita iglugasaksoanginut, iglugasaliorlugit piᴋovlunga.

⁶ Atanniublo oᴋautivânga, aipangatalo saniane Iksivajûb: Ingerganît ᴋanok akkunêrtigijoniarᴋa? Kakkugolo utteromârᴋit? Atanniublo nâmagivâ tillilunga. Nalliunerlo nallonairpara tapsomunga,

⁷ Oᴋarlungalo atannermut: Atanniub nâmagiguniuk, tagva aglanik tunnitsivigilinga aijuksanik, nunat kôb ungatanêtut aulatinginut, ᴋanilarᴋovlugit uvamnik, tikkiᴋârtinanga Judamut.

⁸ Aglaniglo Assafemut atanniub pimaklertoᴋotinganut Kêjuᴋotinginik, tunnijiᴋovlugo uvamnut kêjungnik ikâksanut ilingajunik, igloksub Tempelib ᴋanitanganêtûb itterviksoanginut, iglugasaksuillo avaluksoanginut, iglomullo uvanga iglogijomajamnut. Atanniublo tunnitsivigivânga Gûdima aggangit ajungitut kollimnêtut malliklugit.

⁹ Tikkinâmalo nunat aulatinginut kôb akkianut tunnitsivigilaukpakka atanniub aglanginik. Atanniublo sorsuktuksat angajoᴋângit, ablangajullo horsit ᴋângine tillivait ilauᴋovlugit uvamnut.

¹⁰ Saneballatible Horonitereôjub, Tobiablo kivgab Amonitereôjub, tamânna tussaramikko, sinnaungadlalaukpok tapkungnunga, tikkitoᴋarmat inungmik, Israelib ᴋitorngangita idluarᴋutiksanginik ᴋenertomik.

¹¹ Jerusalemullo tikkinâma, uvlilauᴋârdlunga pingasunik tagvane,

¹² Unnuarme parngnailerpunga, angutillo ikkitut ilagivânga; inuille nalliallonêt oᴋautilaungilara sunamik Gûdib ilûmertilaungmanga Jerusaleme pinniarvigilugit; najorteᴋalaungilanga nergjumik ablangavigijama assianik.

¹³ Unnuarmelo horsekut annilerpunga nâksab itterviksoangagut, puailavingmut Drachemik atelingmut, itterviksoarmullo perorsaijomik atelingmut tikkidlunga; ᴋemergovakkalo Jerusalemib avaluksoangita ᴋarmangit serᴋomisimajut, upkoaksoangillo ikkomamut nerrijaumalauktut.

¹⁴ Sivumuarpungalo itterviksoarmut, puailavingmik atelingmut, atanniublo tessinganut; inniksakalaungilarlo tagvane nergjuteᴋotimnut tagvûnârungnarlune atimne.

¹⁵ Kôngmelo majorarpunga unnuarme, avaluksuillo ᴋemergovakka, ingergamilungalo nâksab itterviksoangagut, utterlungalo.

¹⁶ Angajoᴋâjallo ᴋaujimalaungilet nâmut ailaungmangarma, sunaliormangarmalo; taipsomane tikkidlugo, Judit ajuᴋertuijullo atannertuijullo, angajoᴋâjallo, assingillo pinniaraksame tapsomane sanalauktut oᴋautilaungimarikapkit sunamik.

¹⁷ Tagva oᴋautivakka: Takᴋovasse ᴋanoêtok attortavut, Jerusaleme asserorsimangmat, upkoaksoangillo ikkisimangmatta. ᴋaititse Jerusalemiblo avaluksoangita ᴋarmangit senâlerlavut, mittautiksaujungnailerᴋovluta.

¹⁸ Unipkautivakkalo ᴋanok Gûdima aggangita pitsiartut kollangiarlaungmanga, taimâglotauk atanniub oᴋausinginik oᴋauserilauktanginik uvamnut. Tapᴋoalo oᴋarput: Atê parngnailerta avaluliorlutalo! Taimâglo aggatik pitsartutipait sullijaksak ajungitok tamna pinniaromavlugo.

¹⁹ Saneballatible Horitereôjub, Tobiablo kivgab Amonitereôjub, Gosemiblo Arabiamiub, tamânna tussaramitsuk, mittautigivâtigut, nachogilutalo, oᴋarlutiglo: Sunauva pinniartasse? Atannek Nâlegungnairomavissiuk?

²⁰ Tagva uvanga kiovakka, oᴋarlungalo: ᴋilaub Gûdingata sullitiniarpâtigut tamattominga; uvagullo kivgaujogut tapsomunga, parngnaileromavogut, sanajomalutalo, ilipsele ilangiutiviᴋangilase, idluarneᴋaraselonêt, erᴋaumajaksaᴋaraselonêt Jerusaleme.