Nehemia 13 - Labrador Inuttitut Heritage Bible

Nehemiab âᴋiksoininga ilinganernik sunatuinarnik.

¹ Nalliutomelo taipsomane Mosesib aglangit attuartaulaukput inugasaksuit siutingita sângine; nachvârtauvorlo tapᴋonane aglaksimangmat, Amoniterit Moabiterillo Gûdib illagêktoᴋotinginut pijuksautsengimatta;

² Tamânna pivlugo Israelib ᴋitorngangit pachrearlaungimagit âtsivigilugit ᴋakᴋojamik immermiglo, pissiarilugolo Bileame tikkerᴋolaungmatsuk akkerartorlugit, ominarsijaukojiᴋovlugo tapᴋoninga; Gûdiptale ominarsinek ablatsângortipa saimartitaunermut.

³ Malligaksallo mânna tussaramigit, takkorngartat ilûnaita avitipait Israelitinit.

⁴ Tamattomalo sivurngane Eliasibe ajoᴋertuijok, angajoᴋaulauktok inninut Gûdipta iglunganêtunut, illijilaukpok tapᴋonunga Tobiab tunnergutinganik.

⁵ Âᴋiksoilaungmat taipsomunga innemik angijomik Takᴋamungalo illijilaukpok sivurngane tunnergutiksanik Nerᴋiksanik, Weihrauchemiglo, ilûlerkutiniglo, ᴋakᴋojaksallo tallimaujoanik, Weineliksallo iptinginik orksumiglo, aitûsiaksanik Levitinut, imgerpaktunullo, upkoaniglo udsertortunut, tunnergutiksallo ajoᴋertuijunut.

⁶ Nalliutomele taipsomane tamât uvanga Jerusalemelaungilanga. Artasastab Babelib atannertangata jâringita 32 ingane tikkinâma atannermut, uvlullo ᴋapsit kingorngane ᴋenuarivara atannermit.

⁷ Taimâglo Jerusalemut tikkipunga, mallugivaralo nâmangitullinek Eliasibib pinniarlauktanga Tobia pivlugo, inniliorlaungmago Gûdib iglungata inningane avaluliorsimajome;

⁸ Ilûlugutigilaukparalo angijomik, egipakkalo iniub ilûanit Tobiab iglungata perᴋutingit tamaita.

⁹ Perᴋojivungalo inne sujungaititauᴋovlugo; Nâlekablo iglungata perᴋutingit ittertinivakka takᴋamunga, tunnergutiksat nerᴋiksat, Weihrauchelo.

¹⁰ Tussarpungalo Levitit aitûsiaksangit tunnijaulaungimatta tapᴋonunga; tamana pivlugo Levitit imgerpaktullo, pinniaraksanik pinniartuksat, ᴋemâlaukput attunît perorsêvingmingnut.

¹¹ Tagva angajoᴋaunerôjut suarpakka, oᴋarlungalo: Sôg Gûdib iglunga ᴋemaktaumavâ? Kattiᴋovakkale pitilugillo innigijaksanginut.

¹² Tagva Judakut ilûnâmasiatik ᴋakᴋojaksat Weineliksallo iptingita orksullo tallimaujoat âpait Perᴋutitalingmut.

¹³ Angajoᴋangortipakkalo perᴋutinut Selemja ajoᴋertuijok, Zadokelo aglanik ilisimajok, Pedajalo Levitinit, Hananlo Sachurib erninga, Mathanjab erningata ikajortingortilugo tapᴋonunga; nertornartonasugijaungmatta, perᴋojauvullo aitortuiᴋovlugit ᴋatangutimingnut.

¹⁴ Erᴋarlaunga tamana pivlugo Gûdîk, puigortautailitikillo pinniarnikka ajungitut, pinniarlauktakka Gûdima iglunga pivlugo, ilûsioᴋojangillo pivlugit!

¹⁵ Nalliutome taipsomane Judame takᴋovunga Weineliksat iptêjaivinganik tullertunik Sabbatib uvlungane ᴋeppitaniglo kakkojaksanik ittertitsingmatta, siutekoktôjuniglo nangmalingnik Weinemik, Weineliksallo paunganginik, Feigeniglo, nangmaniglo pittalingnik sunatuinarnik ittertitsingmatta Jerusalemut Sabbatib uvlungane. Tennersarpakkalo uvlorme taipsomane nerᴋiksanik niorvgusingmatta.

¹⁶ Tiriamioᴋalaurivok nunaᴋartunik tagvane, mingeritjanik âtsijunik, niorvgutiksaniglo sunatuinarnik, niorvgosilutiglo Judab ᴋitornganginut, Jerusalemiunullo Sabbateme.

¹⁷ Tagva Judakut angajoᴋaunerôjungit suarpakka, oᴋautilugillo: Sunauva idluitok pinniartase Sabbatib uvlunga serᴋomigapsiuk?

¹⁸ Atâtagijavut taimailiorlaungilât, Gûdiptalo ᴋanoêtut tapᴋoa tamaita tikkerᴋovait uvaptingnut iglugasaksoarnullo ukkununga? Ilipselo anginersamik sulle ningarnekartitsivose Israelitinut, Sabbate serᴋomigapsiuk?

¹⁹ Pijoᴋalaukporlo Jerusalemib itterviksoangine tâksilermat, Sabbatib uvlungata sivurngane, perᴋojivunga upkoat pallangairtauᴋovlugit, perᴋojivungalo pallangairutjartauᴋonagit, Sabbatib kingorngane kisiane. Kivgaᴋotimalo ilangit tillivakka itterviksoarnut, akjarsijunik ittertoᴋarᴋonago Sabbateme.

²⁰ Tagva niuvertit niorvgosijullo niorvgutiksanik sunatuinarnik najorteᴋarlutik unnuivut attausêarlutik, maggoêrtorlutiglo Jerusalemib silatâne.

²¹ Tagva kigligiutsivigivakka oᴋautilugillo: Sôg unnuivise avaluksuit sillatâne? Taimailiormigupse, tagva aggaka ilinniarpakka ilipsingnut. Nalliutomit taipsomanemit tikkitsungnailaukput Sabbatib uvlungane.

²² Levitillo perᴋovakka sujungaitiᴋovlugit ingmingnik, tikkiᴋovlugillo upkoat udsertorlugit, Sabbatib uvlunga ivlerilugo. Gûdîk, tamânna pivlugotauk erᴋarlaunga, ivlerilungalo napᴋoartoksonît pivlugo!

²³ Nalliutome taipsomane takkolaukpungatauk Judinik, nullianiktunik Asdodemiunit, Amoniterinillo, Moabiterinillo.

²⁴ Tapᴋoalo ᴋitorngangit oᴋauseᴋalaukput akᴋusimajunik, ketterarlutik Asdodemiut oᴋausinginik; oᴋarungnaratiglo Judit oᴋausinginik, inuᴋattigêksuille nallit oᴋausingit malliklugit.

²⁵ Suarpakkalo, oᴋarnerlugvigilugillo, angutillo ilangit annaulerpakka nussuilugillo, angermaringnermiglo Gûdib sângane tigusivunga tapᴋonangat: Panise tunnijaksaringilasse taipkoa erninginut paningillonêt tigunagit ernipsingnut, nangminipsingnullonêt.

²⁶ Salomob Israelitit atanningata tamânna Idluitullijutigilaungiᴋauk? Inuᴋattigêksuillo unnuktut akkorngane, atanneᴋalaungilak tapsotunak, Gûdingatalo nagligilaukpa, Gûdiblo atanningortipa Israelitinut; taimailingagalloarlune arnat takkorngârtat idluitullitipât.

²⁷ Tamânna tussarlaungipissiuk, taimâk idluitoksoarmik pinniarapse, Gûdivut idluitullivigilugo, nullianingnermut takkorngartanik?

²⁸ Jojadablo Eliasibib ajoᴋertuijersub erningata erningita ilangata Saneballate Horonitereojok ilannârilerpa; uvangale ᴋemâtilaukpara uvamnit.

²⁹ Issumagikit Gûdîk ajoᴋertuinerôniub ivsornartitauninga pivlugo, ajoᴋertuijullo Levitillo angerᴋattigêngningata sujuktauninga pivlugo.

³⁰ Taimâglo ilaᴋarungnaitilaukpakka takkorngartanit tamainit; nallonairpakkalo ajoᴋertuijut Levitillo pinniaraksangit, attunît sullijaksanginut,

³¹ Tunnergutillo ᴋejuit nalliutunut nallonairsimajunut, perortullo nergjutillo innerᴋârtungit erniariᴋârtangillo. Gûdîk, erᴋarlaunga idluarᴋutiksamnut!