Nehemia 1 - Labrador Inuttitut Heritage Bible

Nehemiab tusarninga Jerusalemik, tuksiarningalo tapᴋoa pivlugit.

¹ Tamadsa Nehemiab, Hachaljab erningata pijokalaungningit. Pijokalaukpok takᴋerme Kisleuemik atelingme, jârit 20gingane, igloksoarmêtilûnga Susanemêtome.

² Hanani ᴋatangutima ilangat, angutit ilangit ilagilugit tikkipok Judamit. Appertsorpakkalo Judit ᴋemâmajut, amiakojullo parngnanairsortaunermit, Jerusalemelo pitjutigivlugit.

³ Tapᴋoalo oᴋautivânga: Amiakut parngnanairsortaunermit tagvane nuname ᴋanoêtomêput angijome mittautigijaunermêlutiglo; Jerusalemib avaloksoangit serᴋomisimavut, upkoaksoangillo ikkisimavut.

⁴ Oᴋautsille taimaitut tussarapkit, iksivalerpunga ᴋêalungalo, ogguarlarmalo uvlut ᴋapsit nâvlugit, nerritaililungalo tuksiarlungalo ᴋilaub Gûdingata sângane,

⁵ Oᴋarlungalo: Nâlegak ᴋilaub Gûdinga, Gûdeôjoksôjotit, sivuranartoksôlutillo, angersimanermik, napkiningnermiglo torᴋorsijok tapᴋonunga naglingniktunut tapsominga, perᴋojanginiglo Nâlektunut;

⁶ Siutikik kamatsiarliktôk, ijikiglo uitalerlîk, Tussarᴋovlutit kivgaᴋotivit tuksiarninganik, tuksiarutigijamnik mânna sângne uvlotilûgo unnuamelo, Israelitit kivgaᴋotitit pivlugit; ᴋanorlo Israelib ᴋitorngangita idluitulliningit, pinniarlauktavut ilingnut, kigligiutigigapkit; uvangalo atâtamalo iglomioᴋatangit idluitullilaurivogut.

⁷ Idluitullivigilaukpaptigit, perᴋojallo, innatsinerillo, idluarnerillo, perᴋolauktatit kivgaᴋotingnut Mosemut, malilaungilavut.

⁸ Erᴋarugletôk oᴋausek imna, perᴋolauktat kivgarnut Mosemut, oᴋalauklutillo: Nâmangitulliniarupse, tagva siamartitsomavapse inûᴋattigêksuit akkornganut.

⁹ Sâniarupsele uvamnut perᴋojakkala kamagigupsigik, pinniarutigigupsigiglo, ajaktortaumagalloarupselo ᴋilaub issua tikkidlugo; sulle tagvangat kattersoromavapse, atsomaluselo innemut annerijamnut, atera tagvaneᴋovlugo.

¹⁰ Ilâle kivgarivattit inuᴋotigilugillo, piulilauktattit pitsartunersoarnut, aggangnullo sôngojunut.

¹¹ ᴋanoktôk Nâlegak siutikik kamatsiarlik, kivgaᴋotivit tuksiarninganik, kivgaᴋotivillo assima tuksiarninganik, tussudlartut atit sivuragijomavlugo; kivgaᴋotillo uvlome sullitilauruk, napkiningneksiᴋolugolo angutib ipsoma kênangata sângane. Imiksaliorteôlaurama atannermut.