Nahum 3 - Labrador Inuttitut Heritage Bible

¹ Kapianarmek iglugasaksuit aungînait! Tatadlarput saglonermiglo aᴋsârningnermiglo; aliktuinermiglo iperaijomangilat.

² Iperautab serᴋortarninga, aksaloallo nipjârningit; horsit tukᴋartoksuit, ᴋamutillo unatautit pikkijut nippingit;

³ Horsilijartut kajusidlartut, saviksoak ᴋeblertok, ᴋalugiarlo ᴋaumalâjok; toᴋotallo unuktoᴋsuit, toᴋungajut timingit ᴋalerêt; toᴋungajut timingit kigleᴋangilat; toᴋungajut timingit aporvigivait;

⁴ Anguniarpaktûb takoranidlartûb ajortuliningita unuktoksôningit pivlugit, angakoktonermik ilisimadlartûb, inôᴋatigêksoarnik ajortulinerminut aulaijûb, ᴋitorngarêniglo angakonerminut.

⁵ Ahâk, sâvigijomârpagit, oᴋarpok Nâlegak Zebaot, annorâtit ᴋongmuartitsomârpakka, kênarnut pitilugit; ussinganîllo takojautitsomârpara inôᴋatigêksoarnut, kangunarnîllo atanioviᴋatigêngnut.

⁶ Egitsivigijomârpagillo maᴋojungnartomik, naggonartitsomârlutillo, annusingorsautiksangortilutillo.

⁷ Ilûnatiglo takonârtut ilingnik ᴋemâlârpâtit, oᴋarlutik: Ninive asserortauvok, kia oggoriniarᴋaûk? Nakillo manigoijuksanik tâpsominga ᴋenerniarᴋêk?

⁸ Ananauluarᴋêt No-amonemit, kôt akorngane ineᴋalauktomit, imarnut ilumajaulauktomit, taluᴋalauktomit kôksoarmik, avaluᴋalauktomillo imaksoarnîk?

⁹ Etiopia Egiptenelo kigleᴋangitomik pitsartutigilaukpâk; Putelo Lubimelo ikajortigilaukpâk.

¹⁰ Taimaigaloartilugole tigujauvlune aularutijauvok; sorusearsungit egitauvlutik serᴋalitaulauᴋput apᴋosineâlungita ilûnatik issungine; erᴋanartungit imerautigijauvut, angutingitalo piluartungit ilûnaita ᴋelaumgujanut ᴋelaksortaulauᴋput.

¹¹ Igvittauk talalârpotit, ijertaulârpotit; igvittauk uneᴋsiorviksarsiolârpotit ômigijingnit.

¹² Ungalujijoksoatit ilûnatik napârtutitut paungatannaktaliktutitut pijariorutinik ilingavut, aulajârtitaugunik katakput kâdlartûb ᴋaninganut.

¹³ Ahâk, inuᴋotitit ilingne arnauvut; itertarvit nunangnut angmarput ômigijingnut; ikâtit nungutauvut ikomamut.

¹⁴ Imeᴋtarit ilumajaunernut, ungalujijoksoatit sôngositikit; maggaksiorit, maggarlo tullerajâruk, ivitaliorvik idluarsâruk.

¹⁵ Tagvane ikomab nungulârpâtit; saviksûb kipilârpâtit piglertaujatitut sorlo; unuksitilerit piglertaujatitut, unuksitilerit piglertatitut.

¹⁶ Niuverniartitit ununersautipatit ᴋilaub uvlorianginit; piglertaujat asseroivut, tingisilutiglo tagvangat.

¹⁷ Niaᴋôsertaumajut piglertatitut iput, angajoᴋâksoatillo piglertatitut katimgajutitut, avalut okᴋoaliningine tangmârtertutitut uvlorme niglatâdlartome, seᴋinerle nuisimalerpat tingilutik ᴋemâvut, noᴋarvingillo ᴋaujimajaulungilat.

¹⁸ Mianersijitit sinidlarput, ataniojotit Assiriame; erᴋanartatit merngoêrserput; inuᴋotitit ᴋaᴋaksoarne siamangavut, katersoijuksaᴋangilarlo tâpkoninga.

¹⁹ ᴋanoetoᴋarnît oᴋitlititaujungnangilak; ikkitit piungitovaksôvut; tusartut ilûnatik unipkautaunernik aggatik pattaktorpait pivlutit; kikunut ajornitit soraingitomik tôlungilât?