Nahum 2 - Labrador Inuttitut Heritage Bible

¹ Serᴋalitsijok majorarpok nalângnut; sakkut kamagitsiarkit, apᴋosinek udjertoruk, ᴋettît nukkiksaruk, nukkitillo angijomik pitsartutikit.

² Nâlekab Jâkob inornarninga utertitsomârmago, Israêlib inornarningatut îtilugo; sunairutjijut sunairutivait, vaineliksallo akkerungit sujuklugit.

³ Pitsartujungita sapûlutangit aupalukput, sôngojungit nukkelit attisivut aupaloriktomik; ᴋamutit unatautit neneroangojârput ikomatut uvlorme tâpsoma ᴋemergovingane, ᴋalugiangillo aulajâdlarput.

⁴ ᴋamutit unatautit sukalidlarput apᴋosineâlungne, aktuajutivut apᴋosinerne nerrotojune; neneroatitut tautuᴋarput, ᴋaumalaᴋtut ingerarput.

⁵ Nakorijane erᴋaumavait; ingerarlutik naukiutivut; ᴋarmaksoarmut aisaraidlarput, pinnailutallo âᴋiksortauvut.

⁶ Kôb kipputingit angmartauvut, iglutsiarlo suppujauvok.

⁷ Huzzalo matuêrtauvok, aularutijauvok, kivgangillo arnat anersaumivut tingmiatitut nippeᴋarlutik, sagvitik tigluklugit.

⁸ Itsarsoarnille Ninive tesseᴋtut ulipkitartotut îpok; sullele ᴋemâvut: Noᴋangagitse, noᴋangagitse! ᴋaigarsukput; ᴋeviartoᴋangimarikporle.

⁹ Silberemik aᴋsârnialeritse, goldemik aᴋsârnialeritse; ᴋomergutaujut kigleᴋangimatta, perᴋutit pivianartut unuktovaksôngmatta.

¹⁰ Sunairutivok, pitaᴋarungnaipok, asserortauvok; ômatelo auksivok, serᴋut kasukatautivut, ilûnatik ᴋetlilerivut, ilûnatiglo kênangit ᴋataktângavut.

¹¹ Loevit sittingit naûk? Loeviaraillo nerripkaivingât? Loevib angutiub loeviblo arnab loeviaraillo arvertarvingat ilimanartoᴋartinagô?

¹² Loeve aliktuilaukpok piarᴋame nâmaginiartanginik, toᴋotsilunelo arname piksanginik, sittinelo tatapait aᴋsârnigarminut, inigijanelo aliktortaminut.

¹³ Ahâk, sâvigijomârpagit, oᴋarpok Nâlegak Zebaot, ᴋamutingillo unatautit ikitsomârpakka isserlungme, saviksûblo nungulârpait loevearatit; aᴋsârnigarijatillo kipijomârpakka nunamit, aᴋpârtitavîllo nippingit tusaksaujungnairomârput.