Nahum 1 - Labrador Inuttitut Heritage Bible

¹ Ninivib nenertauniksanga. Nahumib Elkosimiub takotitjutingata aglangit.

² Nâlegak Gudeovok ilungertortok, akkiniarporlo; Nâlegak akkiniarpok ningarnermiglo ilumikpok; Nâlekab akkerartortine akkiniarpait, ômigijiminullo ningarnek torᴋorpâ.

³ Nâlegak ᴋenuesârpok pitsartuneliksôvlunelo, pidlartailitsingitorle ᴋaᴋialerneᴋangitunik: Nâlegak ineᴋarpok ullajujarme akᴋunaksoarme, itigangitalo nuvujat pujoragivait.

⁴ Imarbik suakpâ panertilugolo, kôllo ilûnaita ipteriliktipait; Basan Karmelelo ᴋunolerpuk, nuvugulâllo Libanoneme ᴋunolerput.

⁵ ᴋaᴋaksuit sajukput sângane, ᴋaᴋallo auksivut; tâpsoma najorningane nuna aulajâdlarpok, ilâ, silaksoak, tamaitalo tagvane ineᴋartut.

⁶ Kina nangerungnarᴋâ tâpsoma ningarningata sânganê? Kina sapilungilâk ᴋaningaumajârninga katsungailerpât? Kaningaumajârninga ikoâlavok ikomatut, ᴋairtullo ᴋoplortauvut tâpsomunga.

⁷ Nâlegak avâgosuktôvok, ungalujijoksoangovok kiksarnartub uvlungane; ilitarivaillo sungertutigijine.

⁸ Asseroinersoarmulle pitsartudlartomut tâpsoma ininga nungulârpâ, ômigijinelo udlalârpait tâᴋtoksoarmut.

⁹ Sumik issumertuivisê Nâlegak pivlugô? Tâmna nungutsimarilârpok; kapianarnek aipanganik makilulângilak.

¹⁰ Kakilauteliktitut ilaᴋemajutitut îgaloarunik, sitsiulâraloaruniglo sorlo imertudlarnermut, nungutaumarilârput ivit kipakungititut.

¹¹ Ilingnit anijoᴋarpok issumertuijomik idluitomik Nâlegak pivlugo, idluitulinermik atanertuijomik.

¹² Imâk oᴋarpok Nâlegak: Pitsartudlaraloarunik unuktoksôvlutiglo, sulle kiblortaulârput ᴋângertuksauvlutiglo. Kapiasuktilauraloarapkit, kingorngane kapiasuktitsomairpagit.

¹³ Mânalo tâpsoma nangmautanga pêjaromavara ilingnit, ᴋelarutingillo kiktoraromavakka.

¹⁴ Pivlutillo Nâlegak perᴋojisimavok, ilingnut ateᴋartunik kingorliksaᴋarungnaiᴋovlugo; gudingoaᴋotivît iglunganit kipijomavakka inungoaliarimajatit saviksimajut inungoallo kovisimajut; iluviksalioromavagit suksaujungnairavit.

¹⁵ Ahâk, ᴋaᴋane unipkautsinik tusarnidlartunik ᴋaitsijûb itigangit, ulapirksaumik oᴋâlajûb! Uvloᴋsiorviksat uvloᴋsiorvigikit, Jûda, angerutigilauktatit nâmaksitikit; idluitûb apᴋosârungnailârmatit kingorngane; kipijaumarikpok.