Migga 7 - Labrador Inuttitut Heritage Bible

¹ Kapianarmek uvanga! Ilingavunga sorlo kinguraijoᴋ katersorêrpatta paunganik aujaᴋsiutinik, sorlo vainiksat amiakunginik ᴋenertoᴋ katersoiviub kingorngane; nerrijaksaᴋangilaᴋ; aungatannaᴋarungnaiporlo tarnima ikligijanganik.

² Idluartoᴋarungnaipoᴋ nuname, nalâgôrtoᴋarungnaiporlo inuit akorngane; ilûnatik terliarsilutik pinasuarput aungmik, nulluanut pinasuarᴋatautivut.

³ Aggangit iglotut issamivut katsungaitomik idluitulijomavlutik; angajoᴋâᴋsoaᴋ ᴋenuvoᴋ, idluarsaijorlo akkilertausunguvoᴋ; inûblo erᴋanartûb tarningata katjârtanga oᴋautigivâ; taimaglo pergaiᴋatigêkput.

⁴ Idluarnerpângat kapianartotut ipoᴋ; nalâgôrnerpâk piungiluarpoᴋ avalunit kakilautelingnit; pigârtivît uvlungat, tamadja nalipsartauvît, tikisimavoᴋ; mâna uimâladlalârput.

⁵ Ilanâᴋ sungertûtiginiarasiuk, tatiginiarasiuk ilanârinerpârijase; ᴋanivît upkoanga upkoaruk inangaᴋatigijarnit.

⁶ Ernerub atâtane naggogingmago, paniub anânane akkerartormago, ukkoablo sakkine; inûblo iglomioᴋatine ômigijigivait.

⁷ Uvangale Nâlegaᴋ arlorvigijomavara; Gude piulijigijara nerriugijomavara; Gudima tusaromavânga.

⁸ Kuviasûtiginiarnanga, ômigijiga; pâlaguma, makilârivunga; tâᴋtome iksivaguma, Nâlekab ᴋaumalârpânga.

⁹ Nâlekab ningarninga nangmaromavara, idluitulivigilaurapko, nautsertorᴋârtinago ilinganimnik idluarsiᴋârtinangalo uvamnik; tâpsoma ᴋaumajomut anitilârpânga, uvangalo takolârpunga idluartoᴋsôninganik.

¹⁰ Tamannalo ômigijima takolârpâ, uliktaulârporlo kangusungnermut, uvamnut oᴋalauᴋtoᴋ: Nâlegaᴋ Gudît naûk? Ijingma takolârpâ, mânalo tullerajârtaulârpoᴋ sorlo aᴋilupik apᴋosinerme.

¹¹ Uvlorme tâpsomane ᴋarmatit sanajaulârput, uvlorme tâpsomane perᴋojaᴋ ungasiktomut nûtaulârpoᴋ.

¹² Uvlorme tâpsomane ilingnut tikilârput Assiriamit Egipteniblo iglugasaksoanginit, Egiptenemillo kôksoaᴋ tikidlugo, imarbingmillo imarbingmut, ᴋaᴋaᴋsoarmillo ᴋaᴋaᴋsoarmut.

¹³ Sullele nuna sunataᴋangitôjomârpoᴋ inungit pivlugit, piniarningitalo kinguningit pitjutigilugit.

¹⁴ Inukotitit pairikit ajaupiarnut, kingormgutijavît katimgajoᴋsôningit, apsimautilutik inôjut napârtolingme Karmelib ᴋerᴋane; Basaneme Gileademelo nerrilit, sorlo itsarsoarme.

¹⁵ Tatamnadlartunik takotitsomârpakka, sorlo taipsomane nunamit Egiptenemit anilaurapse.

¹⁶ Inôᴋatigêksuit takolârput, pitsartunitiglo tamât kangusûtigilugit; ᴋanitik matulârpait aggangmingnut, siutingillo tusângitôjomârput.

¹⁷ Kuglugiaᴋsoatut ivjomik aluktoromârput; pâmgortutitut nuname sajuklutik anijomârput pulavingmingnit; sivôravlutik tikilârput Nâlekamut Gudiptingnut, erᴋsilutiglo igvit pivlutit.

¹⁸ Kina iliktut Gudeovâ, issumagijungnainiktoᴋ idluitunik, kingormgutijamelo amiakungita idluitulininginik anigoijôᴋ? Soraijuitomik ningarnine tigumianginalungilâ, nâpkiningneᴋ ᴋuviagigamiuk.

¹⁹ Sanguniarivoᴋ ama ilapjugilutalo; idluinivut tukkalârpait; ajornivullo ilûnaita egilârpatit imarbiub itininganut.

²⁰ Nertornarnît unertutigilârpat Jakomut, nâpkiningnîllo Abrahamut, angerutigilauᴋtatit atâtagijaptingnut itsarsoarme.