Migga 5 - Labrador Inuttitut Heritage Bible

¹ Mana katititaksatit katitikit, katititaksat paningat; tâpsoma ilumavâtigut; Israêlib idluarsaijunga issaᴋajomârpât ulloangagut issaᴋautemut.

² Igville, Betlehem Efrata, mikijôgaloartotit Jûdab tausendeoningita akorngane, ilingnit pijomârpoᴋ uvamnut nâlegaujuksaᴋ Israêleme; tâpsoma aniningit itsarsoarnit pivut, issoᴋangitoᴋsoarmit.

³ Taimaimat tâpsoma tunijomârpait ernisuktoᴋ erniᴋârtinago; taipsomane ᴋatangutime amiakungit utilârput Israêlib ᴋitornganginut.

⁴ Tâmnalo nangeromârpoᴋ nerripkailunelo saugaᴋotiminik Nâlekab pitsartuningane, Nâlekab Gudime attingata inornarningane; tâpkoalo iniksarsijomârput; mâna tâmna angijôdlaromârpoᴋ nunaᴋsûb issungit tikidlugit.

⁵ Tâmnalo ulapirᴋsautigilârpavut; Assiriamioᴋ tikipat nunaptingnut, iglutsiavullo tullerarpagit, makitilârpavut mianersijut 7it angutillo erᴋanartut 8it tâpsomunga.

⁶ Tâpkoa Assurib nunanga asseroromârpât saviksoarmut, Nimrodiblo nunangata itertarvingit; piulijomârpâtigulle Assiriamiunit, nunaptingnut tikipatta, ᴋanitavullo tullerarpagit.

⁷ Jâkoblo amiakungit mitsuksoatut Nâlekamit pijotut ilingalârput inôᴋatigêksuit unuktut akorngane, suarutaᴋtut iviksukane; tâpkoa kinamik utaᴋilungilat, nerriulungilallo inûb ᴋitornganginik.

⁸ Jâkoblo amiakungit ilingalârput nunaᴋatigêksuit akorngane inôᴋatigêksuillo unuktut akorngane loevetut nergjutit napârtolingmêtut akorngane, loevearaᴋtullo saukat katimgajut akorngane; apᴋutigijarangamigit tullerajârivoᴋ aliktuilunelo, saputsijuksaᴋangilarlo.

⁹ Aggaktit ᴋolangiarlit akkerartortingnik, ômigijitillo tamaita kipijaulit.

¹⁰ Pijomarporlo uvlorme tâpsomane, oᴋarpoᴋ Nâlegaᴋ, horsit pêjaromârapkit akunapsingnit, ᴋamutillo unatautit aksaloalit asseroromârapkit;

¹¹ Nunavîllo iglugasaksoangit kipijomavakka, taluksoatillo ilûnaita oggotitsomârpakka.

¹² Angakonerillo tamaita kipijomârpakka aggangnit; torngijoᴋarungnaituksauvorlo ilingne.

¹³ Inungoaliarimajatillo napajullo kipijomârpakka akunapsingnit; aggakpîllo sanajangit tuksiarvigijungnairaksarivatit.

¹⁴ Napârtunelo sanamajatit pêjaromârpakka akunapsingnit, iglugasaksoatillo asseroromârpakka.

¹⁵ Ningarnermelo ᴋaningaumajârnermelo inôᴋatigêksuit tusaromalaungitut akkiniaromârpakka.