Migga 4 - Labrador Inuttitut Heritage Bible

¹ Pijomarporle uvlune kingorliojune Nâlekab iglungata ᴋaᴋanga palangititaujomârmat pijariaᴋortonerpauvlune ᴋaᴋanit, ᴋagvertitauvlunelo ᴋaᴋanit; inôᴋatigêllo tagvunga ᴋerdlerutijomârput.

² Inôᴋatigêksuillo unuktut ingeraromârput, oᴋarlutiglo: Kaileritse, majuarta Nâlekab ᴋaᴋanganut, Jâkoblo Gudingata iglunganut; tâpsomalo ajoᴋertulârpâtigut apᴋutauᴋojaminik, arvertaromavogullo apᴋutingine; perᴋojat anijomârmatta Zionemit, Nâlekablo oᴋausinga Jerusalemit.

³ Erᴋartuijomârporlo inôᴋatigêksuit unuktut akorngane, inôᴋatigêksuillo aᴋtornartut inerterlugit ungasiktomit; saviksoatiglo katjugomârpait ibjomik makperteraijûtingorlugit, ᴋalugiatiglo iviksukatautingorlugit; nunaᴋatigêt nalîllônêt assimingnut saviksoarmik atorungnairomârput, unatadlarnermiglo iliniarungnairomârput.

⁴ Ilûnatigle atunit iksivajomârput vaineᴋautimik atâne, paungatannaᴋautimiglo atâne, sivôrasârijoᴋarniangilarlo tâpkoninga: Nâlekab Zebaotib ᴋaningata oᴋauseringmago.

⁵ Inôᴋatigêt ilûnatik atunit arvertaromârmatta gudimik attingane, uvagullo arvertatsainaromârpogut Nâlekab Gudipta attingane, soraijuidluta.

⁶ Uvlorme tâpsomane, oᴋarpoᴋ Nâlegaᴋ, tusiaktut katersoromârpakka, ajaktortaujullo pikaluktakkalo katititsomârpakka;

⁷ Tusiaktullo amiakotitsomârpakka, ajaktortaujullo inôᴋatigêksoangordlugit; Nâlegarlo ataniojomârpoᴋ tâpkonunga ᴋaᴋame Zioneme mânamit issoᴋangitomut.

⁸ Igvillo, katimgajut nuvugusingat, Zionib paningata ᴋaᴋanga, ilingnut tikilârpoᴋ, ilâ, nâlegauneᴋ sivorleᴋ tikilârpoᴋ, Jerusalemib paningata nâlegauvinga.

⁹ Sôᴋ mâna nippeᴋortovlutit ᴋaigarsuᴋêt? Ataneᴋangilaᴋ ilingnê? Atanertuijêrutivêt, tikitaugavit ânianernut sorlo ernisulertotût?

¹⁰ Anialerit, ilungertorillo saᴋᴋêjomavlutit ernisulertotut, Zionib paninga; mâna anijomâravit iglugasaksoarnit, naternamelo iniksaᴋalârpotit, Babilonemut aglât tikituksauvotit; tagvane ᴋelujaulârpotit; tagvane Nâlekab piulilârpatit ômigijivit agganginit.

¹¹ Mânale inôᴋatigêksuit unuktut katimavut ilingnut, oᴋartut: Sujuktaudlarle, ijivullo takolit katjârijamingnik Zioneme.

¹² Kaujimangilalle Nâlekab issumanginik, tukkisilungilallo pijomajanganik: tâpsoma katersormagit ᴋepitatitut katjugvingmut.

¹³ Nikovigit katijuklutillo, Zionib paninga; nakjut kikiangortitsomârapko, itikatillo ᴋaᴋorlingordlugit; inôᴋatigêksuillo unuktut serᴋalilârpatit, akluiningillo ilingatilârpatit Nâlekamut, perᴋutingillo silaksûb ilûnangata Nâleganganut.