Migga 3 - Labrador Inuttitut Heritage Bible

¹ Oᴋarpungalo, Nâlalauritsetôᴋ, angajoᴋaujose Jâkokune, ilipselo Israêlib ᴋitorngangita aulatsijingit; idluarsainermik ᴋaujimajuksaungilasê?

² Ajungitoᴋ ômigivase, idluitorlo ungagilugo; tâpkoa amêjarpase, sauningillo nerᴋêjarpase;

³ Inuᴋotimalo uviningat nerrivase; amêjarpaillo, sauningillo naploarlugit; ilâ, serᴋalivait, sorlo ukusingmut ilingatilugit, sorlolo nerᴋe ukusingmêtoᴋ.

⁴ Nâlegaᴋ ᴋaigarsugvigilârpât tagva, tâpsomale akkiniangilait; ilâ, kênane ijeromârpâ tâpkonangat taipsomane, idluitomik piniarnerijangit maliklugit.

⁵ Imâᴋ oᴋarpoᴋ Nâlegaᴋ nalautaijut inuᴋotimnik tamartitsijut pivlugit; kigutimingnut kêsijut, ᴋaigarsuklutiglo: Ulapirᴋsaumik; oᴋomeraksamigle ilijijoᴋangipat ᴋaninginut, tagva unatariartoromavât:

⁶ Tamanna pivlugo unnuangolârpoᴋ ilipsingnut, takotitjuteᴋarungnaiᴋovluse; tâᴋtoᴋsôlârpoᴋ ilipsingnut, nalautaijungnarᴋonase; seᴋinerlo nipilârpoᴋ nalautaijunut, uvlorlo ᴋernersilârpoᴋ tâpkonunga.

⁷ Takotitjutiniglo takojut, kangusudlalârput, nalautaijullo ᴋevilârput ilâ, ilûnatik ᴋangasinângmingnik mattujilârput; Gudemit kiguseᴋarnialungimat.

⁸ Uvangale ilumertaudlarpunga pitsartunermik Nâlekab anerninganut, idluarsainermiglo, sôngonermiglo, Jâkomut nalonaijaiᴋovlunga tapaninganik, Israêlemullo idluitulininganik.

⁹ Tamanna tusarsiuktôᴋ, angajoᴋaujose Jâkokune, aulatsijoselo Israêlekune, ômisuktose idluarsainermik, mumiktitsijoselo nalâgôrnermik ilûnânik.

¹⁰ Zion igloliorpase aungmut, Jerusalemelo idluitulinermut.

¹¹ Angajoᴋângit idluarsaivut pilitaujomavlutik, ajoᴋertuijungillo akkilertaujomavlutik, nalautaijungillo nalautaivut kênaujanut; sullele Nâlegaᴋ egangavigijomavât, oᴋarlutiglo: Nâlegaᴋ akunaptingnêlungilâᴋ? Idluitûb tikiniangilâtigut.

¹² Taimaimat ilipse pitjutigiluse Zion perorsêviktut makperterartaujomârpoᴋ, Jerusalemelo aᴋtornerlukungoromârpoᴋ, iglûblo ᴋaᴋanga napârtoliub poᴋtoningatut itsomârpoᴋ.