Migga 2 - Labrador Inuttitut Heritage Bible

¹ Kapianarmeᴋ idluituliniksamik issumaksarsiortut idluitomiglo kajusijut inangavingmingne: Uvlâkut ᴋaulerpat piniaromavât, sapilunginamik.

² Perorsêvingnik uningârput, arᴋtautigilugillo; igluniglo, aᴋsârnigarilugillo; oᴋumaiksartitsivullo inungmik iglungalo tigulugo, kinatuinaᴋ taimailivât kingormgutijangalo.

³ Tamanna pivlugo imâk Nâlegaᴋ oᴋarpoᴋ: Ahâk, ᴋitorngarêngnut ukkununga idluitomik issumaksarsiorpunga, mattomangallo ᴋongesise nûgungnarniangilase, piojoriluselo arvertarniangilase; naliuneᴋ tamanna ajormat.

⁴ Uvlorme tâpsomane adsiujomik atulârput pivluse, oggualârpullo ogguarutimut kiksarnelingmut, oᴋarlutik: Asserortaumarikpogut; inuᴋotima pigijaksangat ablatsangortipâ; pêjaivigivânga; perorsêvivullo tâpsoma avgorpait pikablâjunut.

⁵ Tamanna pivlugo siaᴋititsijoᴋartuksaungilatit noᴋaᴋservalaumik ôktûtemik imeraut atorlugo Nâlekab ilagêktoᴋotingane.

⁶ Nalautaidlarase (oᴋarput): nalautaitsainarput. Nelautaijuksaungilat tâpkonunga; pasiklernerit sorairnialungilat.

⁷ Oᴋartoᴋarniarᴋâ, Jâkob ᴋitorngangit: Nâlekab anerninga ᴋenuesârneᴋarungnairmât? Tamakkoa piniarnerivagît? Oᴋausikka idluarᴋutaulungilât idluartomik arvertartomût?

⁸ Inuᴋotikkale akkerartortutitut pikablâᴋamerput; ilimasugatik ᴋângertut sorᴋsungnermik issumaᴋangitut uliksoangit pêjarpase annorânginit.

⁹ Inuᴋotima arnangit pingujarpase iglumingnit ungagijamingnit; ᴋitorngârsunginillo pinnarnautigijara pêjarpase soraijuitomik.

¹⁰ Nikovigitse aularluselo; tamanna merngoêrserviksaulungimat, ivsornarneᴋ asserorsaijoᴋ pitjutigilugo, ilâ, asserorsainermut sugaluluartomut.

¹¹ Inuk saglojomik anernelik saglovlune oᴋarpat: Nalautaivigijomavagit vainemik imiksamiglo pitsartujomik; tâmna ilâ nalautaijôlârpoᴋ inungnut ukkununga.

¹² Katersoromarpapse ilûnase, Jâko; katersoromârpakka Israêlib amiakungit; katersoromârpakka saukatitut Bosrame; katimgajutitut nerrinasugvingmingnêtutitut pervaludlaromârput inuit unuktovaksôningit maliklugit.

¹³ Serᴋomitsijoᴋ takpaungarpoᴋ sivuningine; serᴋomitsilauᴋput sivumuarlutiglo itertarvingmut, aningmilutiglo tagvûna; ataningat ingerarpoᴋ sivurngane, Nâlegarlo sivorlerpârivât.