Migga 1 - Labrador Inuttitut Heritage Bible

¹ Nâlekab oᴋausinga Miggamut Morasemiomut tikitoᴋ, Jôtamib Ahasiblo Hesikiablo, ataniojut Jûdame, uvlungine, takojanga Samaria Jerusalemelo pivlugik.

² Tusaritse inôᴋatigêksoangojose ilûnase; nâlagit, nuna, tagvanêtullo ilûnatik; Nâlegarlo Nâlegaujoᴋ kigligiutsile akunapsingne, Nâlegaᴋ iniminit ivsornaitomit.

³ Tagva, ahâk, Nâlegaᴋ anijomârmat iniminit, aᴋᴋaromârporlo, nunablo poᴋtoningit tungmerarilugit.

⁴ Kaᴋᴋârsuillo augomârput tâpsoma atâne, naᴋsallo ᴋoplugomârput, sorlo kutsuᴋ aungmat ikomame, sorlo imeᴋ ᴋorlormat aksangajokut.

⁵ Jâkob tapatoninga, Israêliblo ᴋitorngangita idluituliningit, pitjutauvut tamattomunga tamânut. Jâkob tapaninga sunauvâ? Samaria-ungilâᴋ? Jûdablo poᴋtoningit sunauvât? Jerusaleme-ungilât?

⁶ Taimaimat Samaria aᴋtarlukungortitsomarpara perorsêvingme, perornerluktutitullo vaineliksatalingme; ujaraᴋtangillo korungmut sitortitsomârpakka, tungavingillo saᴋᴋijârtilugit.

⁷ Inungoaliarimajangillo ilûnatik serᴋalitaujomârput, attautingillo ilûnatik ikomamut nungutaujomârput, gudingoangillo ilûnatik nungunerlukungortitsomârpakka; anguniarpaktûb akkiliusiarijanganut katersolaungmagit, anguniarpaktublo akkilertauninganut utertuksauvut.

⁸ Tamanna pivlugo ogguaromârpunga erinaluaᴋilungalo, annorairlunga usingavlungalo arvertaromârpunga; ᴋingmeujârtotut nujoartotut miagôromârpunga, tingmiaᴋsoatullo ᴋatigarᴋortojotut âlajomârlunga.

⁹ Ikingit inûlijaujungnangimatta; Jûda aglât aitortauvoᴋ; inuᴋotima itertarvinganut tikiutivoᴋ, aglât Jerusalemut.

¹⁰ Gateme unipkautiginiarasiuk, ᴋeadlarniarase; Bet-le-aframe aksapaloarit sanningne.

¹¹ Kângerit, Safireme igloᴋartotit, usingavlutit kangunadlarlutillo; Saname igloᴋartoᴋ anilungilaᴋ; ogguarnerub Bet-eseleme aᴋsârpâse ikajorninganik.

¹² Maroteme igloᴋartûb pingigarlune ajungitoᴋ utaᴋivâ, ajortoᴋ aᴋᴋarsimangmat Nâlekamit Jerusalemib itertarvinganut.

¹³ Lakiseme igloᴋartotit, pangaliktut sukalidlartut pitusârkit ᴋamutînut aksaloalingnut; tâmna sivorliovlune Zionib paninga idluitulitilauᴋpâ; Israêlib tapaningit nagvârtaulaungmatta ilingne.

¹⁴ Tamanna pivlugo tunitjijuksauvotit piliutinik avitaujutiksanik Moreset-gatimut; Aᴋsibib iglungit uivêrijaujutaulârput Israêlib ataninginut.

¹⁵ Marisame igloᴋartotit, tikiutjijomavunga sulle ilingnut kingormgujijuksamik ilingnik; Israêlib ânanauninga tôᴋtuksauvoᴋ Adullamut.

¹⁶ Nujairlutit salligit ᴋitorngatit ᴋuviagijatit pivlugit; merᴋoêrnît angijororuk nektoraliktut; tigujauvlutik ilingnit aularutijaungmatta.