Mattêuse 9 - Labrador Inuttitut Heritage Bible

Assinginik Kristûsib tatamnartitanginik. Apostelib Mattêusib anerijaulerninganik.

¹ Tagva umiarmut ikivok, ama utimut ikârdlune, iglogasaksoarminullo pivlune.

² Ahâglo, tâpsomunga âtsivut tumângajomik, aumitine nelajomik. Jêsusib oᴋperningit takogamigit, tumângajok oᴋautivâ: Ernera, ᴋuviasugit, ajornitit issumagijaujungnairput.

³ Ahâglo, aglangnik ilisimajut ilangit ilumikut oᴋarput: Una mitauteᴋarpok Gûdemik.

⁴ Jêsusible issumangit ᴋaujimagamigit, oᴋarpok: Sôᴋle ômatipsingne issumaluᴋisê?

⁵ Naliak ajornanginersauvâ, oᴋarlune: Ajornitit issumagijaujungnairput; imâglônêt: Makitit arvertarlutillô?

⁶ Nalojungnairᴋovlusele, Inûb Erninga pitsartuneᴋarmat nuname ajortoerutjinermik, tumângajomut oᴋarpok: Makitit, aumititit pikit, angerarlutillo.

⁷ Makidlunalo tagva iglominut angerarpok.

⁸ Inuit tamanna takogamitsuk, tataminiarput, Gûdelo nakoridlarpât, inuit taimaitunik pitsartunernik tunitjivigilaungmagit.

⁹ Jêsuselo tagvangat aularame, inungmik takovok, tuniorᴋaivingme iksivajomik, Mattêusemik atelingmik oᴋautivâlo: Malinga! Nikoviporlo maliklugo.

¹⁰ Iglomelo nerrimârvingme iksivatilugo, ahâk, pimaklertit idluitulijullo unuktut tikiput, Jêsuselo ilinniartingillo ikterᴋatigivlugit nerrimârvingmut.

¹¹ Farisêerit tamanna takogamitsuk, ilinniartingit oᴋautivait: Sôᴋ ajoᴋertortipse pimaklertit idluitulijullo nerreᴋatigivagît?

¹² Jêsusib tamanna tussaramiuk oᴋautivait: Atsuilît inûlijeᴋariaᴋangilat, ᴋanimajut kissimik.

¹³ Tamattomale tukkinga ilinniariartorsiuk: Nâpkiningneᴋ ᴋuviagivara, tunergutille pinagit. Ajortulit ᴋaiᴋojartorpakka, ablatsâmik issumaᴋarᴋovlugit, idluartut pinagit.

¹⁴ Taimâk oᴋartilugo, Johannesib ilinniartingita tikipât oᴋarlutiglo: Sôk uvagut Farisêerillo nerritailivakitâ akulaitomik, ilinniartitille nerritailivangilât?

¹⁵ Jêsusib oᴋautivait: Nulianiktomut tikitut ᴋanok kiksartuksauvât, uiksak illagigamitsûk? Naliutsomârporle uiksamik aᴋsârtauvingat; tagva nerritailivangniarput.

¹⁶ Annorâtoᴋak illâᴋpangilât nutâmik illâksamik; nutâb aliktorniarmago nutaungitok, aliktornerlo pivallianiarpok.

¹⁷ Vainalo nutâk imerᴋautinut nutaungitunut imertûtinginivât; vainib nutâb aliktorniarmagit imerᴋautit, vainalo kovituinarniarpok, imerᴋautillo asserorlugit. Vainele nutâk imerᴋautinut nutânut imertûtijaksauvok tamarmik tâva asserojuiᴋatigêkpuk.

¹⁸ Taimâk oᴋautingmagit, ahâk, angajoᴋât ilangat tikipok, pâmakterlunalo sânganut oᴋarpok: Nâlegak, paniga mâna toᴋovok; aggangnulle aktoriartoruk, unûniarpok tagva.

¹⁹ Jêsuselo nikovipok, maliklugolo, ilinniartine illagivlugit.

²⁰ Ahâglo, arnat ilangata jârinik 12 nik auᴋatsainartub, annorângata sinâgut aktoriartorpâ tunuanit.

²¹ Ilumigut oᴋarame; Annorângalônêt aktorupko, pijungnainiarpunga.

²² Jêsusib ᴋeviarame, takovâ, oᴋarlunalo: Paniga, ᴋuviasugit, okpernivît pijungnaitipâtit. Arnarle stundeme tâpsomane pijungnaipok.

²³ Jêsuselo angajoᴋâb iglunganut iterame, nipjausijartullo inuillo aulajâdlartut takogamigit,

²⁴ Oᴋautivait: Aularitse, niviarsiak una toᴋungimat, sinikporle. Ijoridlarpâllo.

²⁵ Inuille anititaungmatta, iterpok, aggangitigullo tiguvâ; niviarsiak tâva makipok.

²⁶ Tamannalo tussaumajaulerpok nuname tâpsomane ilûnâne.

²⁷ Jêsuselo tagvangat aularmat, tautungituk malikpuk tâpsominga, nipperᴋortovlutik oᴋartuk: Igvit, Davidib Erninga nâpkigitiguk!

²⁸ Iglomullo itermat, tautungituk tikipâk. Jêsusiblo oᴋautivak: Okperpitîk, taimaitomik piniarvigijungnaraptîk? Tagva oᴋautivât: Âhailâ Nâlegak.

²⁹ Ijikikullo aktorpak, oᴋautivlugiglo: Okperaptik taimaileritik!

³⁰ Tautulerpuglo. Jêsusiblo unipkârᴋongilak tamattominga, Oᴋarlunalo: Udsertuleritik, tamanna inungnut ᴋaujijauᴋonago.

³¹ Tâpkuale unipkâriartorpuk nunamut tâpsomunga ilûnânut.

³² Tâpkua aningmanik, ahâk inungmik Sâtanaselingmik oᴋarungnangitomik tâpsomunga âtsivut.

³³ Sâtanaselo anititaungmat, oᴋarungnangitok oᴋalerpok. Inuillo tataminialerput oᴋarlutiglo: Taimaitomik takolaungimarikpogut Israêlitine.

³⁴ Farisêerille oᴋarput: Sâtanasit anitipait Sâtanasit ataningatigut.

³⁵ Jêsuselo arvertarpok iglugasaksoatigut iglugasaktigullo ilûnaitigut, ajoᴋertuivlune katimavingine, oᴋautsillo tussarnertut nâlegauvingmik oᴋautigivlugit, inungnalo atsuiliungitut, ᴋanimajullo sunatuinait âᴋikpait.

³⁶ Inugasaksuillo takogamigit naiperᴋotigivait; perlilermatta siamangavlutiglo saugatitut mianerijeᴋangitutitut.

³⁷ Tagva ilinniartine oᴋautivait: Katersivik angijôvok, sanajuksalle ikidlarput.

³⁸ Tamanna pivlugo katitaksat inuat tuksiarvigisiuk, sanajuksanik tiliklerᴋovlugo katersivingminut.