Mattêuse 8 - Labrador Inuttitut Heritage Bible

Kristûsib tatamnartulininginik. Jêsusemik malingnerub ilingajuksauninganik ᴋanok.

¹ ᴋakᴋamit atersârmat, inugasatsuit malikpât.

² Ahâglo, angut kalaktoᴋ tikitok, tuksiarvigivlugo oᴋarpok: Nâlegak, pijomaguvit kalagungnaititsungnaralloarparma.

³ Jêsusiblo aggane issakpait, aktorlâllo, oᴋarlune: Pijomavunga, kalagungnairit. Tagvainarlo kalagungnaisârpok.

⁴ Jêsusiblo oᴋautiva: Udjertulerit, assingnut tamattominga oᴋarniarnak; ainiarille ajoᴋertuijomullo takotilutit; tunergutiksarlo, Môsesib tunerᴋojanga tunivlugo, nalojungnairᴋovlugit kalagungnainernik.

⁵ Jêusele Kapernaumut itermat, sorsuktuksat angajoᴋângata tikipâ, tuksiarvigivlugo,

⁶ Oᴋarlunalo: Nâlegak, kivgara iglumne nalavok, tumângajôvlunalo ânilakteradlarpok.

⁷ Jêsusib oᴋautivâ: Aᴋijartoromavara.

⁸ Sorsuktuksat angajoᴋângat kiovok oᴋarlunalo: Nâlegak, nalopᴋotivunga ilingnik itertitsinermik iglumnut; oᴋarille oᴋautsemik atautsemik, tagva kivgara pijungnainiarpok.

⁹ Uvangatauk inôvunga atanilik, kivgaᴋarlarmalo sorsuktuksanik; ilanganullo oᴋaruma: Ailerit, aivok tâva: assianullo: ᴋait, ᴋaivok tâva; kivgamnullo: Sanalauruk una, sanavâ tâva.

¹⁰ Jêsusible tamanna tussaramiuk, tataminiarivâ, maliktinalo oᴋautivait: Âhamarik oᴋaupapse, taimâk angitigijomik okpernermik nagvâlaungilanga Israêlitine.

¹¹ Oᴋautivapsele: Inugasaksuit unangat pângallo tikitsomârput, Abrahalo, Isaarlo Jâkolo iksivaᴋatigijomârlugit nâlegauvingme ᴋilangmêtome.

¹² Nâlegauvingme ᴋitorngaujulle ajaktortaujomârput tâktokso armut ungardlerpâmut, tagvane ᴋeavaksoadlarneᴋaromârpok aglerulârneᴋaromârlunalo.

¹³ Jêsusiblo sorsuktuksat angajoᴋângat oᴋautivâ: Ailerit, okperijarnik pilârpotit. Kivgangalo stundeme tâpsomane pijungnairpok.

¹⁴ Jêsuselo Pêtrusib iglunganut pivok; sakkingalo (arnak) nalajok, ôlingnartomut ᴋanimavlune takovâ.

¹⁵ Aggangitigulle tigungmago, ôlingnartub ᴋemakpâ. Makidlunalo kivgartorpait.

¹⁶ Unnulermallo unuktunik Sâtanasilingnik pititsivut tâpsomunga. Anerniâluillo oᴋausênarnut anitipait, sunatuinarniglo ᴋanimasilit pijungnaitipait.

¹⁷ Nalautaijub Jesaiasib oᴋausingit nalautserᴋovlugit, oᴋarmat: Sangênivut ingminut pitidlugit, ᴋanimasivullo nangmarpait.

¹⁸ Jêsusiblo inugasaksuit ilumajine takogamigit, tesseᴋsûb akianut ikârᴋojivok.

¹⁹ Aglangniglo ilisimajok tikipok Jêsusemut oᴋautivlugo: Ajoᴋertuijok, maligomavagit, namullônêt aiguvit.

²⁰ Jêsusib oᴋautivâ: Tegianiat siteᴋarput, tingmitjallo ᴋilaub atânêtut uvloᴋarivut; Inûble Erninga peᴋangilarlônêt niaᴋorme innangaviksanganik.

²¹ Assiatalo, ilinniartingita ilangata, oᴋautivâ: Nâlegak, aiᴋâlaulanga, atâtaga iluveriartorlugo.

²² Jêsusible oᴋautivâ: Malinga, toᴋungajullo toᴋojiatik iluveriartorlitigik.

²³ Umiarmut ikivok, ilinniartingitalo malikpât.

²⁴ Ahâglo, ullajujaᴋsoakalerpok tesseᴋsoarme, mallillo umiak ittibjuavlugo pivât, Jêsusele sinikpok.

²⁵ Iinniartingitalo tikipât, tupârdlugolo oᴋautivât: Nâlegak piulitigut, sutailerapta.

²⁶ Tagva oᴋautivait: Ilipse okpernikitose, sôk nangiarᴋisê? Makiporlo, anorelo imarlo inerterpak; ikubliamarilerpok tâva.

²⁷ Inuille tataminiarput, oᴋarlutiglo: Kina una angut, anoriblo imablo nâlektangak!

²⁸ Tesseᴋsûblo akianut, Gergesênerit nunanganut pivok. Tagva Sâtanasilîk maggûk, iluvernit anijuk Jêsusemik naipitsivuk; erᴋsinartoksôngmaniglo, apᴋut tamanna atordlugo sapernarpok.

²⁹ Ahâglo, nipliadlarlutiglo oᴋarpuk: Jêsuse, Gûdib erninga, suniarpitigûk? Naliuterᴋârtinago kappiasuktitsartorpitigûk?

³⁰ ᴋaningitangane kuingêngigasaksoakarpok nerrijunik.

³¹ Tagva Satanasit tuksiarvigivât oᴋarlutiglo: Anititsomaguptigut, kuingêngigasaksoarnut tâpkununga pullarᴋotigut.

³² Oᴋarporlo: Aularitse! Anigamiglo, kuingêngigasaksoarnut pullavut. Ahaglo, kuingêngigasaksuit ilûnatik pangaliklutik sivinganariktomit ingmingnik ijukkâdlarput tesseᴋsoarmut, ipivlutiglo imâne.

³³ (Kuingênginik) mianersijullo ᴋemâvut, iglugasaksoarnullo aivlutik, tamannalo oᴋautigijartorpât, Sâtanaselîglo iliortaunîgik.

³⁴ Ahâglo, iglugasaksoarmiut ilûnatik anivut, Jêsuse pagrearlugo. Takogamitsuglo, tuksiarvigivât, nunamingnit aularᴋovlugo.