Mattêuse 7 - Labrador Inuttitut Heritage Bible

Jêsusib oᴋâlaningata ᴋakᴋame sorairninga.

¹ Erᴋartuiniarase erᴋartortaulerᴋonase.

² Erᴋartuinipsingnut erᴋartortaujomârpose; ôktûtipsingnullo ôktortaujomârivose.

³ ᴋatangutivit ijingata sukkiutâ sôk takoviûk, ikak ijingnêtok maluginagô?

⁴ ᴋanorlo ᴋatangutit oᴋautsomaviûk: Ovatsiaro, sukkiut ijingnit pêromavara? Ahâglo, ikâk ijingnêpok.

⁵ Takkormôrtotit, ikâk ijingnit pêrᴋâruk; kingorngagut ᴋatangutivit sukkiutâ pêrasuaruk.

⁶ Ivsornaitok tunijaksaringilase ᴋingminut, sappangaselo egitaksaringilase kuingênginut; itigamingnut tullerajarlugit, sangulutiglo aliktoriarluse perᴋonagit.

⁷ Tuksiaritse, tunitjivioniarpose tagva; ᴋeneritse, nennisiniarpose tagva; avilortaritse, upkuerutjauniarpose tagva.

⁸ Tuksiartok pilârmat, ᴋenertorlo nennisilârmat, avilortartorlo upkuerutjaulârmat.

⁹ Inûb kia nelipse, erningata tuksiarvigikpago ᴋakᴋôjamik, ujarᴋamik tunitjiviginajarpaûk?

¹⁰ Mingeriamiglo tuksiarvigikpago, ᴋuglugiangojârtomik tunitjiviginajarpaûk?

¹¹ Ilipsele, piungitôgalloartose, ᴋitorngase tuntijivigijungnarapsigik tunergutinik ajungitunik, anginersamik ilâ Atâtapse ᴋilangmêtub tuksiartine tunitjiviginiarpait ajungitunik.

¹² Tamainik piniarviojomanipsingnik inungnut, tamakkoningatauk piniarvigisigik; tamadja perᴋojat nalautaijullo aglangit.

¹³ Itervikitokut iteritse. Itervik nerrotongmat, apᴋosinerlo silingmat, asserorsimanermut sangmijok; unuktoᴋsuillo tamanna atorpât.

¹⁴ Iterviglo nerrokipok, apᴋosinerlo amipok, inôgumut sangmijok, ikitullo nagvârpât.

¹⁵ Ulloreasugitse nalautainerluktunik; taipkoa saugat aminginik annorâᴋardlutik tikipâse; ilumikulle amarôvut kêsuktoksuit.

¹⁶ Paunganginit ilitarijaksarivase. Paunganik katersoijokasôngovâ ukpiganit kakilautilingnit, aᴋpiniglonêt perortunit kakilanartunît?

¹⁷ Taimâktauk napârtut ajungitut ilûnatik paungaᴋarput ajungitunik, napârtorle piungitok paungaᴋarpok piungitunik.

¹⁸ Napârtok ajungitok piungitunik paungaᴋarungnangilak, napârtorlo piungitok paungaᴋarungnanginivok ajungitunik.

¹⁹ Napârtut naliat, paungaᴋangitok ajungitunik, kipijauniarpok, egitauniarlunalo ikomamut.

²⁰ Tamanna pivlugo sulianginit ilitarijaksarivase.

²¹ Ilûnatiungitok uvamnut oᴋartut: Nâlegak, Nâlegak! Nâlegauvingmut ᴋilangmêtomut iterniarput, Atâtamale ᴋilangmêtub perᴋojanginik nâlektut kissimik.

²² Uvloksame naliutsomârtome unuktut oᴋautijomârpânga: Nâlegak, Nâlegak, atterne nalautsitiksanik oᴋalaungitogût? Sâtanasit atternut anitilaungilavût? Unuktuniglo tatamnartulilaungilagût atternût?

²³ Tâva akkijomârpakka: Sulle ilitarilaungimarikpapse; tamapse ᴋemaksinga, idluitulijose!

²⁴ Tamanna pivlugo, oᴋautsimnik makkoninga tussartok maliktorlo, tâmna adsiutipara angumut silatujomut, igloliortomut ᴋairtomut.

²⁵ Silaluksoalermat, kutjermallo, anoresuillo akᴋunadlarlutik iglo akkingmivigidlarmatsuk; ochungilak, ᴋairtomut tungagame.

²⁶ Makkoningalo oᴋautsimnik tussartub malingitublo adsigivâ angut silaitok igloliortok siorᴋanut.

²⁷ Silaluksoalermat, kutjermallo, anoresuillo akᴋunadlarlutik iglo akkingmivigidlarmatsuk; ochovok serᴋorpalludlarlunalo.

²⁸ Jêsusiblo oᴋautsit tamakkoa nângmagit, inuit ajoᴋertûtingit tataminiarivait.

²⁹ Kiblingnadlartomik oᴋâlangmat, aglangnik ilisimajutitungitorlo.