Mattêuse 6 - Labrador Inuttitut Heritage Bible

Jêsuse oᴋâlanerminik ᴋakᴋame pigannerpok.

¹ Udjertoritse ajungitulerᴋonase inuit sângane, tautuktaujomavluse tâpkonunga; taimailiorupse, akkilertauniksaᴋangilase atâtapsingnut ᴋilangmêtomut.

² Taimâk pivlugo pilitsijomaguvit tunergutiksarnik, nipjausijarᴋojijuksaungilatit sivunerne, takkormôrtut ilusingititut katimavingne apᴋosineâlungnalo, nertortaujomavlutik inungnut. Âhamarik, oᴋautivapse: Akkilertaujarêrput.

³ Tunergutiksanik pilitsiguvit, saumît aggaktit nalolaulit tallerpikpît tunergutânik,

⁴ Tunijatit sagvartauᴋonagit. Atâtavillo, sagvangitomik tautuktub, akkileromârpâtit sagvartome.

⁵ Tuksiaruvit, takkormôrtutitun-ituksaungilatit. Taipkoa nangerput tuksiarlutiglo katimavingne, iglullo sângane, tautuktaujomavlutik inungnut. Âhamarik, oᴋautivapse: Akkilertaujarêrput.

⁶ Igville tuksiaromaguvit, iglungnut iterit, upkuangalo parngnanairlugo, Atâtallo sagvangitome tuksiarvigiuk. Atâtavillo, sagvangitomik tautuktub, akkileromârpâtit sagvartome.

⁷ Tuksiarupselo, oᴋausek tamnatsainak unuksitiniarasiuk nalojutitut; taipkoa tussartaunasugivut, oᴋauseᴋarangamik unuktunik.

⁸ Tamanna pivlugo taipkotitunaᴋ-ituksaungilase: Atâtapse atoriaᴋartase ᴋaujimavait, tuksiarvioᴋârane ilipsingnut.

⁹ Taimâk pivlugo imâk tuksiaritse: Atâtavut ᴋilangme! Attît nertortaule.

¹⁰ Nâlegauvît ᴋailaule. Pijomajat piniartaule nuname sorlo ᴋilangme.

¹¹ Uvlome piksaptingnik tunitjivigitigut.

¹² Idluinivut issumagijungnaikit, sorlo uvagut idluitulivigijivut issumagijungnaivigigaptigik.

¹³ Oktortaulungnermut pitinata. Piulitigulle ajortomit. Nâlegaunek, pitsartunerlo, ânanaunerlo pigigangne issoᴋangitomut. Amen.

¹⁴ Inuit idluituliningit issumagijungnairupsigik, Atâtapsetauk issumagijungnainiarivait idluitulinise.

¹⁵ Inuille idluituliningit issumagijungnaingikupsigik, Atâtapsetauk issumagijungnainianginivait idluitulinise.

¹⁶ Nerritailijarangapse, annûtuksaungilase takkormôrtutitut; kênatik tautorluktingmatsuk nerritailijarangamik, inungnut tautuktaujomavlutik. Âhamarik, oᴋautivapse: Akkilertaujarêrput.

¹⁷ Nerritailijarangaville, niaᴋuit mingoaruk, ermiklutillo.

¹⁸ Nerritailinernik takojauterᴋonak inungnut, Atâtangnulle sagvangitomêtomut. Atâtavîllo sagvangitomik tautuktub, akkileromârpâtit sagvartome.

¹⁹ Perᴋutinik pikuminartunik katersoijuksaungilase nuname, ᴋaurulillo mangertornerublo asseroiviginiartangine, tigliguillo itârviginiartangine tigligomavlutik.

²⁰ Perᴋutinigle pikuminartunik katersoiniaritse ᴋilangme, ᴋaurulillônêt mangertornerublônêt asseroivigijungnangitangine, tigliguillo itârvigijungnangitangine tigligveᴋarungnangitanginalo.

²¹ Perᴋuteᴋarvipsingne, ômatise tagvanênivut.

²² Timib ije ᴋaumanerivâ. Ijît taututsiarpat, timît ilûnane ᴋaumaniarivok.

²³ Ijît taututsiangipat, timît ilûnane târniarpok. ᴋaumajorle ilungnêtok tâᴋtôkpat, tâᴋtok nangminek angidlarniarpok ilâ!

²⁴ Angajoᴋângnut maggûngnut kivgartortokarungnangilak; aipâ ômigilârpâlônêt, aipâ nagligivlugo; ubvalo aipâ ungagilârpâ, aipanga nachogivlugo. Gûdelo nunab pingillo atautsikut kivgartorlugit saperpose.

²⁵ Tamanna pivlugo oᴋautivapse: Inôsise pivlugo siaklernairase, nerᴋiksapsingniglônêt imiksapsingniglônêt, timipselônêt annorâksanginik. Inôsise anernarnersaungilât nerᴋemît? Timiselo anernarnersaungilât annorânît?

²⁶ Tingmitjat ᴋilaub atânêtut nautsertorsigik: karngasuingilat, perorsianiglo katersingilat ᴋematulivingnut; taimaigallorartilugit, Atâtapse ᴋilangmêtub nerritipait. Taipkonangat anernarnersaungilasê?

²⁷ Nelise ingminik uiguksarsijungnarᴋâ tallertut atautsitut takitigijomik, siaklerutigigalloaruniûk?

²⁸ Sôklo annorât siaklerutigivisigîk? Paunaujaujârtut naternamêtut, ᴋanok perortut takunârsigik; sanangilat, pergaingilallônêt.

²⁹ Oᴋautivapse: Salomolônêt ânanaunermine ilûnâne annorârsimalaungilak taipkoa ilangatitut.

³⁰ Iviksukat naternamêtut, uvlome perortut, ᴋaukpallo kiaksaumut egitaksaujut Gûdib taimâk pinnarnartinamigit, annorârtitsomanersaringilâsê? Okpernikitose tagva!

³¹ Taimâk pivlugo issumanerluktuksaungilase oᴋarluse: Sumik nerriniarᴋitâ? Sumiglo imerniarᴋitâ? Sumiglônêt Annorâksaᴋarniarᴋitâ?

³² Makkoa tamaita nalojut pinasuarpait; Atâtapse ᴋilangmêtub ᴋaujimavâse, tamakkoninga tamainik pijariaᴋarapse.

³³ Gûdib nâlegauvinga idluarningalo pinasuarᴋârsigik, tagva tunitjivioniarpose tamakkoninga tamainik.

³⁴ Taimaimat ᴋauksaᴋ issumaginasiuk, ᴋauksak piksaminik pinialermat. Nâmakpoᴋ uvlut ilûnatik ingmikut siaklerviokpatta.