Mattêuse 5 - Labrador Inuttitut Heritage Bible

Jêsusib oᴋâlaninga ᴋakᴋame.

¹ Inugasaksuille takogamigit, ᴋakᴋamut majorarpok; ingimallo, ilinniartingita tikipât.

² ᴋaninalo angmardlugo ajoᴋertorpait oᴋarlunalo:

³ Piloridlarput aklujut anernerme: nâlegauvik ᴋilangmêtok pigileramitsuk.

⁴ Piloridlarput kiksartut; manigortaujomârmatta.

⁵ Piloridlarput ᴋenuêtut; nuna pigileramitsuk.

⁶ Piloridlarput kâktut imeruktullo idluarnermik; ilumertaujomârmatta.

⁷ Piloridlarput nâpkiniktut; nâpkigijaujomârmatta.

⁸ Piloridlarput ivjornaitunik ômatilit; Gûde takojomaramitsuk.

⁹ Piloridlarput ullapirsaijut; Gûdib ᴋitornganginik taijaujomârmatta.

¹⁰ Piloridlarput unangmijaudlartut idluarnek pitjutigilugo; nâlegauvik ᴋilangmêtok pigileramitsuk.

¹¹ Piloridlarpose, inuit suadlarpase uvanga pivlunga, unangmikpaselo, sunatuinarniglo oᴋarnerlugvigikpase, saglovlutik.

¹² Alliatitse, sivôraniaraselo, akkilertautsiaromârapse ᴋilangme. Taimâktauk nalautaijut sivorlise unangmigingmatigik.

¹³ Nunab sioraujarivâse. Sioraujak tarriornitsungnairpat, sumût tarriornititaunajarivâ? Atoraksaujungnairpok, egitaksauvlune inungnut tulleraksauvok.

¹⁴ Silaksoarmiut ᴋaumanerivâse. Iglugasiat ᴋakᴋab ᴋânganêtut takuksausuerungnangilat.

¹⁵ Nenergoak ikinginivât, ᴋattaujab atânut ilivlugo, nannergoarvingmulle pivok, iglomêtut ᴋaumavait tagva.

¹⁶ Taimâktauk nannergoase ᴋaumatisiuk inungnut, ajungitulinipsingnik takoᴋovlugit, Atâtase ᴋilangmêtok nakorijauᴋovlugo.

¹⁷ Pêjaijartorasuginiarasinga perᴋojanik, nalautaijullônêt aglanginik. Pêjariartungilakka, nâmaksitilugille piniarpakka.

¹⁸ Âhamarik oᴋautivapse: ᴋilaglo nunalo nungoᴋârtinagik, perᴋojane (aglaksimajune) mingnek, tittârsuglônêt nunguniangilak, tamakkua ilûnaita nâmakserᴋârtinagit.

¹⁹ Mâna perᴋojat ukkua ilanganik mingnermik nâlengitok, inuit taimâk ajoᴋertorlugit, tâmna mingnerpaunerartaujomârpok nâlegauvingme ᴋilangmêtome. Nâlektorle taimaglo ajoᴋertuijok, tâmna angijônerartaujomârpok nâlegauvingme ᴋilangmêtome.

²⁰ Oᴋautivapsele: Idluarnise nâmanersaungipat aglangnik ilisimajut Farisêerillo idluarninginit, nâlegauvingmut ᴋilangmêtomut piniatsangilase.

²¹ Tussalaukpose, sivorlise oᴋautjaungmatta: Inuartuksaungilatit; inuartorle erᴋartuivingmut pijaksauvok.

²² Uvangale oᴋautivapse: ᴋatangutiminut nâmaksingitok (pitjuteᴋarane) idluarsaivingmut pijaksautipok ingminik; ᴋatangutiminulle oᴋartok: Koinangnadlâluᴋên? kiglisiniarᴋatigêngnut pijaksautipok ingminik; oᴋartorle: Ominauteâluᴋotse, ingminik pijaksautipok ᴋôrᴋub piunginelukoviub ikomanganut.

²³ Tamanna pivlugo, tunergutit ilijomagungne tunerguservingmut tagvanalo erᴋaiguvit ᴋatangutingnut passijaunernik;

²⁴ Tunergutit tunerguserviub sânganut ᴋemaklugo, ᴋatangutit saimarsariartorᴋâlauruk, kingorngagullo tunergutit tunijartoruk.

²⁵ Ilingnut akkerartortok saimarsarsârniaruk, aiparêktilutik sulle apᴋome, akkerartortingnut unertûtigijauᴋonak kiglisiniartomut, kiglisiniartomullo pititaukonak kivgaminut, egitaukonaglo parngnanairsimavingmut.

²⁶ Âhamarik, oᴋautivagit: Tagvangat anititauniangilatit, akkiliksarpît kingorlerpârârsunganik akkilêrᴋârtinak.

²⁷ Tussalaukpose, sivorlise oᴋautjaungmatta: Nuliarêngnermik asseruijuksaungilatit.

²⁸ Uvangale oᴋautivapse; Arnamik takunârtub, ikligivlugo, tâpsoma ômamine nuliarêngnermik asserueᴋatigijarêrivâ.

²⁹ Ijivît talerpiub sunaungatikpatit, pêruk egilugolo. Ajunginersauvok ilingnut, timivît ilanga asserorpat, timit ilûnât egitaukonago âniatitsivingmut.

³⁰ Aggakpit talerpikpîllônêt sinaungatikpatit, nakkakit egilugillo. Ajunginersauvok ilingnut, avativît ilangat asserorpat, timit ilûnât egitaukonago âniatitsivingmut.

³¹ Taimâktauk oᴋarsimagivok: Nuliaminik avitsijub, tunitjivigijaksarivâ aglangnik avitsitiminik.

³² Uvangale oᴋautivapse: Nuliaminik avitsijub, anguniarnek pivlugo pingipat, nuliarêngnermik asseruitipâ; avitamiglo nulianiktub nuliarêngnek asserorivâ.

³³ Ama tussarmijose, sivorlise oᴋautjaungmatta: Gûdib atinga okpernartitsijutiksatut taivlugo angernerluktuksaungilatit; Gûdemulle angileruvit, maligaksarivatit oᴋautsitit.

³⁴ Uvangale oᴋautivapse; Angermariktuksautsangilase, ᴋilaglônêt taiᴋassiutivlugo, Gûdib iksivautaringmago;

³⁵ Nunalônêt taiᴋassiutivlugo, itigangita ikkoggaringmatsuk; Jerusalemelônêt taiᴋassiutivlugit, Atanersûb iglogasaksoaringmagit;

³⁶ Niaᴋuittauk taiᴋassiutivlugo angermariktuksaungilatit, nujak atauserlônêt ᴋaᴋorsititsungnanginangne ᴋernersititsungnanginangnelônêt.

³⁷ Oᴋausise imailerlit: Âhailâ, âhailâ, aukak, aukak; ununersat idluitomit pivut.

³⁸ Tussalaukpose oᴋalauktomik: Ije ijemik, kigut kigumik (akkeᴋariaᴋarpok).

³⁹ Uvangale oᴋautivapse: Idluitulivigikpase, akkiviginiarasigik; ullutjakulle talerpikut erᴋsârtauguvit, igluatauk manileruk.

⁴⁰ Akkerartoromajoᴋarpallo ilingnut, ullit tigujomavlugo, tâmna ulliksoarniktauk peᴋarle.

⁴¹ Kinamut mailemik atautsemik aipauᴋojauguvit, Maggûngnik aipariuk.

⁴² Ilingnit sumik ᴋenujok tunitjivigiuk; allarniarnagolo attartoromajok ilingnit.

⁴³ Tussalaukpose oᴋalauktomik: Inuᴋatingnik nagliktuksauvotit, ômigijillo ômigivlugo.

⁴⁴ Uvangale oᴋautivapse: Akkerartortise nagligisigik; ilipsingnut oᴋauserluktut saimartisigik; ômigijise ajungituliviginiarsigik; ilipsingnik kiksartitsijut unangmiklertullo tuksiarutisigik.

⁴⁵ ᴋitorngaulerᴋovluse Atâtapsingnut ᴋilangmêtomut. Tâpsoma seᴋinine nuerᴋongmago ajortunullo ajungitunullo, silaloᴋojilarmelo idluartunullo idluangitunullo.

⁴⁶ Ilipsingnigle naglingniktut kissêta nagligigupsigik, sumik tagva akkilertauniksaᴋaromârᴋisê? Pilukait taimailiunginivât?

⁴⁷ ᴋatangutise kissêta ilannâtuarigupsigik sumik pijarialingmik pivisê? Pilukait taimailiunginivât?

⁴⁸ Tamanna pivlugo nâmaksileritse, sorlo Atâtase ᴋilangmêtok nâmamaringmat.